ផ្ទះតូចៗជាច្រើនបានសង់នៅលើទឹក រីឯបង្គោលឈើជាច្រើនត្រូវបានបោះទៅក្នុងទឹកដើម្បីធ្វើជាបង្គោលសំរាប់ចងភ្ជាប់ទូកជាង២០០ ដែលអណ្ដែតនៅលើផ្ទៃទឹក។ ផ្ទះឈើតូចៗដែលសង់លើផ្ទៃទឹកទាំងនោះកំពុងជួបប្រទះបញ្ហាលំបាកជាច្រើនដោយសារតែកម្ពស់ទឹកទន្លេហក់ឡើងខ្ពស់។ ជាពិសេសកប៉ាល់ធំៗបរកាត់ដែលធ្វើឲ្យរលកធំៗបក់ផ្ទប់នឹងផ្ទះតូច និងទូកបណ្ដាលឲ្យរងការខូតខាតយ៉ាងដំណំនៅច្រាំងទន្លេមេគង្គ ក្នុងខណ្ឌជ្រោយចង្វា រាជធានីភ្នំពេញ។
ការរស់នៅលាយឡំជាមួយការព្រួយបារម្ភដែលបង្កឡើងដោយទឹកជំនន់ ជាបញ្ហាចម្បងរបស់អ្នកនៅច្រាំងទន្លេនិងលើទូក។ ពេលភ្លៀងម្ដងៗ ខ្យល់កន្រ្ទាក់ស្ទើរតែពាំនាំផ្ទះឈើតូចៗទៅជាមួយ។ តំណក់ទឹកភ្លៀងហូរចូលទៅតាមចន្លោះស័ង្កសីឬតង់កៅស៊ូដែលមានប្រហោង រាល់ពេលមានភ្លៀងម្ដងៗ។
រដូវទឹកឡើងនិងរដូវហាមឃាត់នៃការនេសាទ ជាឧបសគ្គចំពោះបណ្ដាប្រជាជនដែលផ្ងើជីវិតនៅលើទឹកនេះ។ កម្ពស់ទឹកខ្ពស់ និងលំហូរទឹកទន្លេដែលជាផលលំបាកនៃការនេសាទ ក៏ដូចជាការស្នាក់អាស្រ័យនៅលើទឹកនេះផងដែរ។
ស្រ្ដីចំណាស់ម្នាក់មានស្នាមជ្រីវជ្រួញលើផែនថ្ពាល់ទាំងសងខាង និយាយទាំងទឹកមុខក្រៀមក្រំថា សព្វថ្ងៃនេះការរស់នៅលើទូកជួបប្រទះនូវការលំបាកជាច្រើន ហើយរបរនេសាទត្រីនេះរកប្រាក់ចំណូលបានតិចតួច។
ស្រ្ដីមេផ្ទះ អ្នកស្រី រ៉ហ៊ីម៉ាស ជាខ្មែរ-ឥស្លាម បានប្រាប់វី.អូ.ឌីថា អ្នកស្រីរស់នៅច្រាំងទន្លេមេគង្គ ក្នុងខណ្ឌជ្រោយចង្វា ជាង២០ឆ្នាំហើយ។ គ្រួសាររបស់អ្នកស្រីមានសមាជិក១១នាក់ ដោយប្រកបរបរជាអ្នកនេសាទត្រី។ ប៉ុន្ដែបច្ចុប្បន្ន របរនេសាទត្រីមិនសូវកាក់កកនោះទេ ដោយថ្ងៃខ្លះចាប់មិនបានត្រីមួយផង ដែលធ្វើឲ្យគ្រួសារអ្នកស្រីមានបញ្ហាខ្វះខាតនូវជីវភាព។ ជារៀងរាល់ឆ្នាំ អ្នកស្រីតែងតែខ្ចីប្រាក់អ្នករកស៊ីចងការប្រាក់ នៅរដូវទឹកឡើង ហើយសងគេវិញនៅរដូវរកត្រីបាន។
អ្នកស្រី រ៉ហ៊ីម៉ាស បាននិយាយថា៖
អ្នកស្រី រ៉ហ៊ីម៉ាស បានប្រាប់វី.អូ.ឌីថា រាល់ថ្ងៃអ្នកស្រីមានការព្រួយបារម្ភណាស់ ចំពោះផ្ទះសំបែងរបស់អ្នកស្រី ដោយសារបញ្ហាទឹកហក់ឡើងខ្ពស់ លិចរោង និងទំនើរដែលអ្នកស្រីកំពុងរស់នៅ ព្រមទាំងបារម្ភចៅធ្លាក់ទឹកពេលយប់ផងដែរ។
និយាយបណ្ដើរក្អកបណ្ដើរ អ្នកស្រីរ៉ហ៊ីម៉ាសបានរៀបរាប់ថា៖
ក្រៅពីបញ្ហាខាងលើ អ្នកស្រីក៏បានលើកឡើងថា បញ្ហាសុខភាពនាពេលបច្ចុប្បន្នកំពុងតែប្រឈមជាមួយជម្ងឺជាច្រើន។
អ្នកស្រី រ៉ហ៊ីម៉ាស បានបន្ដថា៖
អ្នកស្រីរ៉ហ៊ីម៉ាស និងក្រុមគ្រួសារចង់រស់នៅលើដីគោក ព្រោះរដូវទឹកឡើងម្តងៗមានការជួបប្រទះនូវបញ្ហាជាច្រើនក្នុងការស់នៅ។ ប៉ុន្តែគ្រួសារអ្នកស្រីពុំមានលទ្ធភាពទិញផ្ទះឬដីនោះទេ។
អ្នកស្រី រ៉ហីម៉ាស បានបន្ថែមថា៖
ផ្ទះតូចៗភាគច្រើនបានរើមកកាន់ទីជម្រាលលើគោកនៃច្រាំងទន្លេ ដោយសារតែកម្លាំងទឹកហូរបានបំផ្លិចបំផ្លាញផ្ទះរបស់ពួកគាត់។ ម៉ូតូជាច្រើនបានផ្ដួលនៅតាមជម្រាលនៃច្រាំងទន្លេ ក្បែរទូកនិងផ្ទះតូចៗទាំងនោះ។ មានកាកសំណល់ជាច្រើនអណ្ដែតទៅមកតាមបណ្ដោយច្រាំងទន្លេ។ មានជនជាតិខ្មែរ និង ខ្មែរ-ឥស្លាមរស់នៅក្នុងសហគមនេះ ប៉ុន្តែភាគច្រើនជាខ្មែរ-ឥស្លាម។
អ្នកស្រី សាវេន ជនជាតិខ្មែរ ជាអ្នករស់នៅលើទូក និងមានផ្ទះតូចនៅលើទឹកបានឲ្យដឹងថា គ្រួសារអ្នកស្រីទើបតែរើមកនៅបាន ២ ទៅ ៣ ឆ្នាំទេ។ គ្រួសាររបស់អ្នកស្រីមានសមាជិកចំនួន៩នាក់ ដែលប្ដីរបស់អ្នកស្រីជាជាងសំណង់ ហើយអ្នកស្រីជាអ្នកស៊ីឈ្នួលចាក់បាញ់ឆែវ។
មុនផ្ដល់បទសម្ភាសន៍អ្នកស្រីបានលូនចេញពីផ្ទះតូចរបស់អ្នកស្រីទៅកាន់ផ្ទះតូចរបស់ប្រជាពលរដ្ឋផ្សេងទៀតដែលបានសង់នៅលើទួលទម្រេតលើច្រាំងទន្លេ។ អ្នកស្រីបានរៀបរាប់ទុក្ខលំបាករបស់អ្នកស្រីថា ពេលយប់ខ្លះទឹកទន្លេហក់ខ្ពស់មកដល់រនាបផ្ទះតូច ហើយជ្រៀបចូលផ្ទះដែលធ្វើឲ្យសើមជោគខោអាវពេលដែលកូនអ្នកស្រីកំពុងគេង។ ពេលខ្លះរលកបក់ផ្ទប់ផ្ទះខូចខាតឥវ៉ាន់ក៏មាន។
អ្នកស្រី សាវេន ជនជាតិខ្មែរ ជាអ្នករស់នៅលើទូក និងមានផ្ទះតូចនៅលើទឹក
អតីតអ្នកនេសាទ លោក លឹម នឹងអ្នកស្រី ខ ជនជាតិខ្មែរ-ឥស្លាម បច្ចុប្បន្នជាអាជីវករលក់ដូរបានប្រាប់វី.អូ.ឌីឲ្យដឹងថា មកដល់ពេលនេះគាត់រុះរើផ្ទះតូចរបស់គាត់ពីទឹកចំនួន៥ ដងហើយ ហើយប្រហែលជាបន្ដរើម្ដងទៀតមកលើជម្រាលច្រាំងដោយសារតែរលកបក់ផ្ទប់ផ្ទះរបស់គាត់ ដែលរងការខូតខាតជាច្រើន។ ដោយសារមានសមាជិកគ្រួសារច្រើន ផ្ទះតូចមិនអាចរស់នៅទាំងអស់គ្នាបាននោះទេ កូនរបស់គាត់ខ្លះគេងនៅលើទូក។
អ្នកស្រី ខ ជនជាតិខ្មែរ-ឥស្លាម បច្ចុប្បន្នជាអាជីវករលក់ដូរ
ប្រធានមជ្ឈមណ្ឌលព័ត៌មានមូស្លីមកម្ពុជា លោក ស្លេះ ណាស៊ី បានប្រាប់វី.អូ.ឌីតាមទូរសព្ទឲ្យដឹងថា បច្ចុប្បន្នមានបងប្អូនជនជាតិ ខ្មែរ-ឥស្លាម ចំនួនប្រមាណ១លាននាក់ដែលរស់នៅប្រទេសកម្ពុជា ប៉ុន្ដែពុំទាន់មានទិន្នន័យច្បាស់លាស់នោះទេ ចំពោះបងប្អូនជនជាតិខ្មែរ-ឥស្លាមដែលស្នាក់អាស្រ័យនៅលើទូក។
លោក ស្លេះ ណាស៊ី បានមានប្រសាសន៍ថា អង្គការមួយចំនួនបានទិញដីនៅលើគោកជូនដល់បងប្អូនខ្មែរ-ឥស្លាម និងសង់ផ្ទះឲ្យប៉ុន្ដែមិនបានគ្រប់គ្នានោះទេ។ ខ្មែរឥស្លាមមួយចំនួនបានប្តូរទៅរស់នៅខេត្តព្រៃវែង បន្ទាប់ពីពួកគេទទួលបានដី។
ប្រធានមជ្ឈមណ្ឌលព័ត៌មានមូស្លីមកម្ពុជា លោក ស្លេះ ណាស៊ី
ចំពោះការរកទីកន្លែងស្នាក់នៅថ្មី លោក ស្លេះ ណាស៊ី បាននិយាយថា កំពុងជួបប្រទះបញ្ហាដោយសារតែបងប្អូន ខ្មែរ-ឥស្លាម ភាគច្រើនជាអ្នកនេសាទ។ ដូច្នេះទើប ពួកគេពិបាកក្នុងការរកមុខរបរថ្មី។
ប្រធានមជ្ឈមណ្ឌលព័ត៌មានមូស្លីមកម្ពុជា លោក ស្លេះ ណាស៊ី
ចាប់ពីខែកក្កដា ដល់ខែសីហា ឆ្នាំ២០១៨នេះ ក្រសួងធនធានទឹក និងឧតុនិយមបានចេញសេចក្តីជូនដំណឹងជាបន្តបន្ទាប់ ដោយអំពាវនាវដល់ប្រជាពរដ្ឋរស់នៅតាមបណ្តោយទន្លេមេគង្គមានការប្រុងប្រយ័ត្ន ព្រោះកម្ពស់ទឹកបានឡើងដល់កម្រិតប្រកាសអាសន្ន។អាជ្ញាធរខេត្តស្ទឹងត្រែង ក្រចេះ និង ត្បូងឃ្មុំ ចាប់ផ្តើមជម្លៀសប្រជាជនទៅទីទួលសុវត្ថិភាព ដោយសារជំនន់ទន្លេមេគង្គ។