អ្នកឃ្លាំមើលបង្ហាញការយល់ឃើញថា រដ្ឋាភិបាលអាចនឹងបរាជ័យពីការតាំងចិត្តប្រឆាំងនឹងអំពើពុករលួយ បើក្បាលម៉ាស៊ីនដឹកនាំថ្មីខ្វះយន្តការជំរុញឲ្យមេដឹកនាំរដ្ឋធ្វើជាគំរូដល់មន្ត្រីថ្នាក់ក្រោមពីអភិបាលកិច្ចល្អ។
កាលពីថ្ងៃអាទិត្យរដ្ឋមន្ត្រីក្រសួងមហាផ្ទៃ លោក ស ខេង បានផ្ញើសារនយោយលើទំព័រហ្វេសប៊ុករបស់លោក រំឭកមន្ត្រីក្រោមឱវាទ ឲ្យធ្វើតែអំពើល្អ ប្រឆាំងអំពើពុករលួយ មិនត្រូវរំលោភអំណាច មិនបក្ខពួកនិយម និងគ្រួសារនិយម។ លោកសរសេរបន្តថារដ្ឋាភិបាលអាណត្តិទី៦នេះ ប្តេជ្ញាចិត្តខ្ពស់បន្តពង្រឹងសុខសន្តិភាព ស្ថិរភាព និងការអភិវឌ្ឍដោយតម្កល់ផលប្រយោជន៍ជាតិធំជាងអ្វីៗទាំងអស់។
ប្រធានអង្គការសិទ្ធិមនុស្សដើម្បីតម្លាភាពនិងសន្តិភាព លោកស្រី ម៉ម ស៊ីថា ស្វាគមន៍ទៅនឹងការប្តជ្ញាចិត្ត របស់ថ្នាក់ដឹកនាំរដ្ឋាភិបាល បើទោះបីលោកស្រីថាសារនយោបាយនេះគ្មានប្រសិទ្ធិភាពច្រើនអាណត្តិមកហើយក៏ដោយ។
លោកស្រី ម៉ម ស៊ីថា យល់ថា រដ្ឋាភិបាលអាចនឹងបរាជ័យ លើសារនយោបាយនេះទៀត បើគ្មានយន្ត ការជំរុញមន្ត្រីជាន់ខ្ពស់ឲ្យបញ្ឈប់ប្រើប្រាស់វប្បធម៌អន្តរាគមន៍ជ្រែតជ្រែកក្រសួងស្ថាប័នរដ្ឋនានា ឬនៅតែ បិទលំហូប្រជាធិបតេយ្យ ដោយចាត់ទុកសំឡេងឯករាជ្យថា ជាអ្នកប្រឆាំងនឹងរដ្ឋាភិបាលនោះ។
ប្រធានអង្គការសិទ្ធិមនុស្សដើម្បីតម្លាភាពនិងសន្តិភាព លោកស្រី ម៉ម ស៊ីថា
នាយកប្រតិបត្តិសម័ន្ធគណនេយ្យភាពសង្គមកម្ពុជា លោក សន ជ័យ និយាយថា លោកហាក់គ្មានជំនឿថា រដ្ឋាភិបាលថ្មី នឹងធ្វើកិច្ចការនេះបានជោគជ័យទេ បើមេដឹកនាំកំពូលៗនៅតែប្រើឥទ្ធិពល តែងតាំងកូន ឬសាច់ញាតិឲ្យទៅកាន់មុខតំណែងណាមួយរបស់រដ្ឋដោយគ្មានការប្រឡងសមត្ថភាពដោយតម្លាភាពនោះ។
នាយកប្រតិបត្តិសម័ន្ធគណនេយ្យភាពសង្គមកម្ពុជា លោក សន ជ័យ
អ្នកឃ្លាំមើលពីការអភិវឌ្ឍសង្គម លោក ប៉ា ច័ន្ទរឿន ពន្យល់ថា វិធានការដែលមានប្រសិទ្ធិភាព ដើម្បីជំរុញអភិបាលកិច្ចល្អ ឬទប់ស្កាត់អំពើពុករលួយនោះ គឺត្រូវមានឆន្ទៈនយោបាយ និងមានតុល្យភាពអំណាចក្នុងក្បាលម៉ាស៊ីនដឹកនំារដ្ឋ។
អ្នកឃ្លាំមើលពីការអភិវឌ្ឍសង្គម លោក ប៉ា ច័ន្ទរឿន
ទោះជាយ៉ាងណាអ្នកតាមយល់ថា បើការប្តេជ្ញាចិត្តរបស់រដ្ឋាភិបាលធ្វើបានជោគជ័យ ពលរដ្ឋនឹងរឹតតែមានជំនឿលើគណបក្សកាន់អំណាចខ្លាំងជាងមុន ដោយថានៅអាណត្តិនេះ គណបក្សកាន់អំណាច បានគ្រប់គ្រងស្ថាប័នជាតិធំៗទាំងអស់ ដូចជារដ្ឋសភា ព្រឹទ្ធសភា និងរដ្ឋាភិបាល ៕
