កម្មករបម្រើការងារនៅរោងចក្រ JULEE APPREL ក្នុងខណ្ឌពោធិ៍សែនជ័យ រាជធានីភ្នំពេញ ព្រមានតវ៉ាបិទផ្លូវម្តងទៀតប្រសិនបើបញ្ហាបន្តអូសបន្លាយ ហើយពួកគេនៅតែមិនទទួលបានប្រាក់សំណងបន្ទាប់ពីថៅកែស្លាប់។
កាលពីសប្តាហ៍មុនកម្មកររាប់សិបនាក់បម្រើការងារនៅរោងចក្រកាត់ដេរសម្លៀកបំពាក់ JULEE APPREL ស្ថិតក្នុងភូមិចំការឱឡឹក សង្កាត់កាកាប បានតវ៉ាបិទផ្លូវមុខរោងចក្រជាងកន្លះម៉ោង ដើម្បីជំរុញទៅភាគីពាក់ព័ន្ធជួយរកដំណោះស្រាយជុំវិញថៅកែស្លាប់ និងអ្នកគ្រប់គ្រងក្រុមហ៊ុនរត់ចោលដោយមិនបើកប្រាក់ឈ្នួលជូនពួកគេ។
កម្មករម្នាក់លោក ញៀន ពិសិដ្ឋ ប្រាប់វីអូឌីថា រហូតមកដល់ថ្ងៃនេះមានរយៈពេលកន្លះខែហើយដែលក្រុមកម្មកររងចាំបើកប្រាក់ឈ្នួល ខណៈមន្រ្តីក្រសួងការងារបានត្រឹមសន្យាដោះស្រាយ។
លោកបន្តថា ក្រុមកម្មករអាចនឹងតវ៉ាបិទផ្លូវម្តងទៀតដោយសារគ្មានជំរើស ដើម្បីផ្ញើសារទៅស្ថាប័នពាក់ពន្លឿនដោះស្រាយសំណងជូនពួកគេ។
កម្មករម្នាក់លោក ញៀន ពិសិដ្ឋ
អគ្គលេខាធិការរង នៃគណៈកម្មការទទួលបន្ទុកដោះស្រាយកូដកម្ម និងបាតុកម្ម លោក វង្ស សុវណ្ណ ដែលទទួលបន្ទុកដោះស្រាយករណីនោះមានប្រសាសន៍ថា ក្រុមការងារគាត់កំពុងធ្វើការងារនេះ និងបានដាក់សំណើរទៅដល់ទីស្តីការគណៈរដ្ឋមន្ត្រីរយៈពេល១សប្តាហ៍ហើយដើម្បីសុំប្រាក់បុរេប្រទានពីរដ្ឋាភិបាលយកទៅទូទាត់សំណងជូនកម្មករទាំងនោះ។
អគ្គលេខាធិការរង នៃគណៈកម្មការទទួលបន្ទុកដោះស្រាយកូដកម្ម និងបាតុកម្ម លោក វង្ស សុវណ្ណ
លោក វង្ស សុវណ្ណ សុំមិនប្រាប់ពីពេលវេលាដោះស្រាយ និងចំនួនទឹកប្រាក់ដែលត្រូវយកទៅទូទាត់សំណងជូនកម្មករទេ ដោយថា រងចាំការសម្រេចពីថ្នាក់លើសិន។
ក្នុងពិធីជួបសំណេះសំណាលជាមួយកម្មករនៅខេត្តកំពង់ស្ពឺកាលពីថ្ងៃទី៨ខែសីហា លោកនាយករដ្ឋមន្រី្ត ហ៊ុន សែន បានបញ្ជាទៅមន្រ្តីក្រោមឱវាទត្រូវដោះស្រាយសំណងឲ្យបានឆាប់ជូនកម្មករ JULEE APPREL ស្ថិតក្នុងខណ្ឌពោធិសែនជ័យ ដែលម្ចាស់ក្រុមហ៊ុនបានចងកសម្លាប់ខ្លួនកាលពីចុងខែកក្កដា។
លោកនាយករដ្ឋមន្រី្ត ហ៊ុន សែន
ក្រុមកម្មករឲ្យដឹងថា រោងចក្រ ជូលី អឹភើរឹល (JULEE APPREL) មានកម្មករសរុប២៧០នាក់ និងមានថៅកែជាជនជាតិកូរ៉េខាងត្បូងបានចង់កសម្លាប់ខ្លួនក្រោយថ្ងៃបោះឆ្នោត ហើយថៅកែរោងចក្រនេះ ជំពាក់ប្រាក់ឈ្នួលកម្មករម្នាក់ៗចន្លោះពី២៥០ដុល្លារទៅ៣០០ដុល្លារ៕