មេដឹកនាំបក្សកាន់អំណាចប្រកាសថា នឹងបង្កើតឲ្យមានវេទិកាពិគ្រោះយោបល់ ជាមួយគណបក្សដែលបានចូលរួមប្រកួតការបោះឆ្នោតមុនបង្កើតរដ្ឋាភិបាលថ្មី ដើម្បីប្រមូលគំនិតជំរុញដល់ការអភិវឌ្ឍបែបប្រជាធិបតេយ្យ សេរី ពហុបក្ស។
ក្នុងពិធីជួបកម្មករ នៅរាជធានីភ្នំពេញ នាថ្ងៃពុធនេះ លោក ហ៊ុន សែន ថ្លែងថា ដើម្បីកុំឲ្យគណបក្សកាន់អំណាច នៅអាណត្តិទី៦នេះ ជិះសេះលែងដៃ លោកនឹងប្រើប្រាស់វិមានសន្តិភាព សម្រាប់ធ្វើជាកន្លែងជួបពិគ្រោះយោបល់ ជាមួយគណបក្សមួយចំនួនដែលបានចូលរួមបោះឆ្នោត។
លោក ហ៊ុន សែន អះអាងទៀតថា ការបង្កើតវេទិកានេះ ជាការប្រមូលគំនិត ជំរុញដល់ការអភិវឌ្ឍជាតិ តាបបែបប្រជាធិបតេយ្យសេរី ពហុបក្ស ។
លោកនាយករដ្ឋមន្ត្រី ហ៊ុន សែន
បើតាមមេដឹកនាំរូបនេះ តំណាងគណបក្សមួយចំនួន ដែលមិនជាប់ឆ្នោត អាចនឹងត្រូវតែងតាំងជាទីប្រឹក្សា ឬតំណែងផ្សេងទៀត នៅក្រសួងណាមួយ តាមជំនាញរបស់ពួកគេ ។
លោក ហ៊ុន សែន ក៏បានបង្ហើបដែរថា សភានៅអាណត្តិទី៦នេះ អាចមានតែមួយគណបក្ស ឬច្រើនបំផុតត្រឹម៣គណបក្ស ។
ប្រធានគណបក្សប្រជាធិបតេយ្យមូលដ្ឋាន លោក យ៉េង វីរៈ ដែលជាគណបក្សមួយបានចូលរួមប្រកួតការបោះឆ្នោតដែរនោះ មានប្រសាសន៍ថា លោកត្រូវការពេលបន្ថែមទៀតមុនឆ្លើយតបទៅនឹងសារអំពាវនាវ របស់មេដឹកនាំបក្សកាន់អំណាចនេះ។
ប៉ុន្តែមេដឹកនាំគណបក្សដែលមិនជាប់ឆ្នោតរូបនេះ អះអាងថាក្បាលម៉ាស៊ីនដឹកនាំរដ្ឋមួយ អាចធានាសេចក្តីសុខរបស់ពលរដ្ឋបាន ក្បាលម៉ាស៊ីនដឹកនាំនោះត្រូវរួមបញ្ចូលទាំងសំឡេងអង្គការសង្គមស៊ីវិល សហគមន៍ដែលអ្នករងគ្រោះដីធី្ល និងគ្មានការគំរាមកំហែងផ្នែកនយោបាយ។
ប្រធានគណបក្សប្រជាធិបតេយ្យមូលដ្ឋាន លោក យ៉េង វីរៈ
អ្នកវិភាគនយោបាយលោក បណ្ឌិត មាស នី គាំទ្រការបង្កើតវប្បធម៌សន្ទនា ប៉ុន្តែថាអ្វីដែលបានលេចចេញពេលនេះ ជាយុទ្ធសាស្ត្រចាស់ ដែលអ្នកនយោបាយធ្លាប់លេងកន្លងទៅ ក្រោយបង្កើតភ្លៀងរន្ទះ ត្រូវសម្រួលស្ថានការណ៍ឡើងវិញ ដើម្បីទាក់ទាញការគាំទ្រពីសហគមន៍ជាតិ និងអន្តរជាតិ ។
ប៉ុន្តែអ្នកវិភាគនយោបាយរូបនេះ យល់ថា ល្បែងនយោបាយចាស់ យកមកសម្តែងថ្មីទៀតនេះ ទំនងជា មានការពិបាកទាក់ទាញឲ្យសហគមន៍អន្តរជាតិជឿ បើធៀបទៅនឹងការសម្តែងកាលពីអតីតកាល។
អ្នកវិភាគនយោបាយលោក បណ្ឌិត មាស នី
ទោះជាយ៉ាងណាក្នុងពិធីនោះដែរ លោក ហ៊ុន សែន អះអាងថា ការប្រមូលគំនិតពីគណបក្សដែលមិនកាន់អំណាចបានចូលរួមចំណែកជំរុញក្បាលម៉ាស៊ីនដឹកនាំ ដំណើរការទៅតាមយន្តការពហុបក្ស។