នៅសល់តែបួនថ្ងៃទៀតប៉ុណ្ណោះការប្រឡងមធ្យមសិក្សាទុតិយភូមិឬ បាក់ឌុបនឹងខិតចូលមកដល់ សិស្សានុសិស្សដែលត្រូវប្រឡង កំពុងយកចិត្តទុកដាក់ក្នុងការសិក្សាយ៉ាងខ្លាំង ទន្ទេញមេរៀន ព្រមទាំងរៀនគួរបន្ថែមនៅតាមសាលាឯកជន។
សិស្សានុសិស្សជាច្រើននាក់បានបង្ហាញពីអារម្មណ៍ភ័យព្រួយចំពោះការប្រឡង ខណៈដែលសាស្រ្តាចារ្យនិងនិស្សិតបានបង្ហាពីគន្លឹះមួយចំនួនសំរាប់ត្រៀមមុនប្រឡងដើម្បីទទួលបាននូវលទ្ធផលល្អប្រសើរ។
នាយកសាលាបង្រៀនគួរជ័យថាវី និង ជាសាស្ត្រាចារ្យផ្នែកគីមីវិទ្យា លោក ជ័យ ថាវី ដែលមានបទពិសោធន៍បង្រៀនសិស្សជិត៣០ឆ្នាំ បានប្រាប់ពីគន្លឹះនៃការរៀនគួរបន្ថែមសម្រាប់សិស្សដែលត្រូវប្រឡងបាក់ឌុបថា សិស្សទាំងអស់ត្រូវខំប្រឹងរៀនតាំងពីដើមឆ្នាំដើម្បីជាមួលដ្ឋាលគ្រឹះ និងបំពេញបន្ថែមវានៅពេលចុងឆ្នាំជាពេលដែលសិស្សានុសិស្សមើលឃើញចំនុចខ្វះខាតរបស់ខ្លួននូវចំនុចណាមួយ។
លោក ជ័យ ថាវី នាយកសាលាបង្រៀនគួរជ័យថាវី និង ជាសាស្ត្រាចារ្យផ្នែកគីមីវិទ្យា
លោក ជ័យ ថាវី បានបន្តថា ការសិក្សាពីគន្លឹះផ្សេងៗតាមមុខវិជ្ជាមុនប្រឡងគឺជាកត្តាសំខាន់។ ប៉ុន្តែការជ្រើរើសវិញ្ញាសារប្រឡងឆ្នាំមុនៗមករៀន និងបង្រៀនក៏ជាចំនុចមួយដែលមិនអាចមើលរំលងផងដែរ។
លោក ជ័យ ថាវី នាយកសាលាបង្រៀនគួរជ័យថាវី និង ជាសាស្ត្រាចារ្យផ្នែកគីមីវិទ្យា
សិស្សទី១២ នៅវិទ្យាល័យទួលទំពូងវិញ កញ្ញា អ៊ុំ ច័ន្ទធីតា បានប្រាប់អ្នកព័ត៌មានវីអូឌីឲ្យដឹងដែរថា សម្រាប់ការប្រឡងបាក់ឌុប ក្រៅពីរៀននៅសាលា កញ្ញាក៏បានទៅរៀនគួរបន្ថែម និងរៀនជាក្រុមជាមួយមិត្តភ័ក្រផងដែរ។ ប៉ុន្តែទោះយ៉ាងណាក៏ដោយ កញ្ញាក៏មានការព្រួយបារម្ភខ្លះដែរសម្រាប់ការប្រឡងថ្នាក់ជាតិនៅប៉ុន្មានថ្ងៃខាងមុខនេះ ដោយកញ្ញាគិតថាមិនទាន់បានត្រៀមខ្លួនរួចរាល់នៅឡើយ។
សិស្សទី១២ នៅវិទ្យាល័យទួលទំពូងវិញ កញ្ញា អ៊ុំ ច័ន្ទធីតា
ចំណែកឯសិស្សទី១២ នៅវិទ្យាល័យបាក់ទូក ស៊ិន សុភ័ក្រ បាននិយាយប្រាប់វីអូឌីថា គាត់បានត្រៀមខ្លួនរួចហើយសម្រាប់ថ្ងៃប្រឡង ទាំងចិត្ត ទាំងមេរៀន។
លោក ស៊ិន សុភ័ក្រ សិស្សទី១២ នៅវិទ្យាល័យបាក់ទូក
និស្សិតសាកលវិទ្យាល័យភូមិន្ទកសិកម្ម កញ្ញា ទ្រី វិចិត្រមុន្នី បានចូលរួមចែករំលែកគន្លឹះខ្លះៗសម្រាប់ការប្រឡង។ កញ្ញា បាននិយាយាថា អ្វីដែលបេក្ខជនជំនាន់ក្រោយមិនគួរសំរុករៀននៅប៉ុន្មានថ្ងៃចុងក្រោយនេះទេ ពោលគឺរៀនទន្ទេញល្មមៗ ទុកពេលឲ្យខួរក្បាលសម្រាក និងម៉្យាងទៀតគួរយកចិត្តទុកដាក់ជាមួយមុខវិទ្យាសាស្រ្តសង្គមផងដែរ ព្រោះវាក៏អាចជាផ្នែកមួយជួយឲ្យបាននិទ្ទេសកាន់តែល្អផងដែរ។
និស្សិតសាកលវិទ្យាល័យភូមិន្ទកសិកម្ម កញ្ញា ទ្រី វិចិត្រមុន្នី
សិស្សថ្នាក់ទី១២ ម្នាក់ទៀត នៅវិទ្យាល័យ ជា ស៊ីម សាមគ្គី គឺកញ្ញា សេង ស៊ីនាង បានបា្រប់វីអូឌីថា មកដល់ពេលនេះ កញ្ញាមិនហ៊ានប្រាថ្នានិទ្ទេសខ្ពស់ៗ ដូចដែលធ្លាប់ប៉ងនោះទេ ពោលគឺសុំត្រឹមតែអាចឆ្លងផុតការប្រលងនេះប៉ុណ្ណោះ។
កញ្ញា សេង ស៊ីនាង សិស្សថ្នាក់ទី១២ នៅវិទ្យាល័យ ជា ស៊ីម សាមគ្គី
បន្ថែមពីនេះទៀតលោក ជ័យ ថាវី បានជូនពរទៅដល់សិស្សានុសិស្សដែលត្រូវប្រឡងនៅថ្ងៃចន្ទ សប្តាហ៍ក្រោយនេះ និងក្រើនរំលឹកនូវចំណុកមួយចំនួនទៀតដែលពួកគេត្រូវធ្វើផងដែរ។
លោក ជ័យ ថាវី នាយកសាលាបង្រៀនគួរជ័យថាវី និង ជាសាស្ត្រាចារ្យផ្នែកគីមីវិទ្យា
យោងតាមសេចក្តីប្រកាសព័ត៌មានរបស់ក្រសួងអប់រំបានឲ្យដឹងថា ប្រឡងមធ្យមសិក្សាទុតិយភូមិ នឹងធ្វើឡើងនៅថ្ងៃទី២០-២១ ខែសីហា ឆ្នាំ២០១៨ ដោយមានបេក្ខជនចូលយរួមប្រឡងជាង១០ម៉ឺននាក់។ ក្រសួងនឹងរឹតបន្តឹងការប្រឡង ដោយដាក់ពង្រាយអ្នកសង្កេតការណ៍ប្រមាណ៦ពាន់នាក់តាមមណ្ឌលប្រឡង មកពីអង្គភាពប្រឆាំងអំពើពុករលួយ។
បក្ខជនចូលរួមប្រឡងមធ្យមសិក្សាទុតិយភូមិ ក្នុងឆ្នាំ២០១៧មានប្រមាណ១០១ ៤១៣នាក់ ហើយបក្ខជនប្រឡងជាប់មាន ៦៣ ៦៦៨នាក់ ស្មើនឹង ៦៣.៨៤%។
ដោយ ផេង សុភានាថ និង លឹម តូនីតា