ក្រសួងសុខាភិបាល បានហាមឃាត់ការនាំចូល ចែកចាយ និងផ្សព្វផ្សាយលក់សេរ៉ូម Glutanone 600 ដោយព្រមានថា សេរ៉ូមមួយប្រភេទនេះ នឹងបង្កមហន្តរាយដល់សុខភាពរហូតដល់ប្រឈមនឹងបង់បង់ជីវិតផងដែរ។
សេចក្តីជួនដំណឹងរបស់ក្រសួងសុខាភិបាល កាលពីថ្ងៃទី១៤ បានឲ្យដឹងថា សេរ៉ូម Glutaone 600 ជាប្រភេទឱសថដែលផលិតនៅប្រទេសថៃ គ្មានអាស័យដ្ឋានច្បាស់លាស់ គ្មានក្រុមហ៊ុននាំចូលត្រឹមត្រូវ គ្មានចុះបញ្ជីការ និងគ្មានការអនុញ្ញាតពីក្រសួងសុខាភិបាលឡើយ។
ក្រសួងនេះ បានលើកឡើងទៀតថា សេរ៉ូមមួយប្រភេទថែមទាំងត្រូវបានផ្សព្វផ្សាយបំផ្លើសទៀតផង ដោយថា វាធ្វើឲ្យស្បែកសបែបស៊ីជម្ពូ បំបាត់មុន ស្នាមជាំមុខ ជំនួយក្រចក និងធ្វើឲ្យស្អាតពីចុងសក់ដល់ចុងជើងជាដើម។
ក្រសួងសុខាភិបាល បានព្រមានថា សេរ៉ូមមួយប្រភេទនេះ អាចបង្កមហន្តរាយដល់សុខភាពអ្នកប្រើប្រាស់ ដោយវាអាចបណ្តាលឲ្យកើតជំងឺមហារីកស្បែក ឬអាចប៉ះពាល់ដល់អាយុជីវិតផងដែរ ដោយសារប្រតិកម្មពីការព្យូរសេរ៉ូមមិនត្រឹមត្រូវ។
ក្រសួងបានណែនាំទៅពលរដ្ឋ កុំឲ្យប្រើប្រាស់សេរ៉ូមប្រភេទនេះ ដើម្បីបញ្ចៀសមហន្តរាយដល់សុខភាព។
ក្រសួងសុខាភិបាលបានហាមឃាត់ការចែកចាយ និងប្រើប្រាស់ឱសថ ៧ប្រភេទរួចមកហើយនៅក្នុងខែសីហានេះ ដែលភាគច្រើននៃឱសថទាំងនោះ ត្រូវបានផ្សព្វផ្សាយលក់នៅលើបណ្ដាញទំនាក់ទំនងសង្គម៕
