នគរបាលខេត្តក្រចេះ នៅតែមិនទាន់បំបែកសំណុំរឿងឃាតកម្មសម្លាប់មនុស្សមួយគ្រួសារនៅស្រុកចិត្របុរីបាននៅឡើយ ទោះបីជានគរបាលព្រហ្មទណ្ឌខេត្តនេះ បានឃាត់ខ្លួនមនុស្ស ៥នាក់ មកសាកសួរក៏ដោយ។
លោក ឆុំ ឈន និងភរិយា ព្រមទាំងកូន ២នាក់ទៀត ត្រូវបានប្រទះឃើញស្លាប់ទាំងគ្រួសារ នៅឯផ្ទះចម្ការរបស់លោក ស្ថិតនៅភូមិប្អៀរ ឃុំថ្មី កាលពីថ្ងៃទី៩ ខែសីហាកន្លងមកនេះ។
គេហទំព័ររបស់អគ្គស្នងការដ្ឋាននគរបាលជាតិ ចេញផ្សាយកាលពីម្សិលមិញ បានឲ្យដឹងថា ក្រោយការស៊ើបអង្កេតពីកម្លាំងនគរបាលជំនាញអស់រយៈពេលជាច្រើនថ្ងៃមក នគរបាលនៅមិនទាន់ស្រាវជ្រាវរកឃើញជនល្មើសនៅឡើយ ប៉ុន្ដែ នគរបាលខេត្តក្រចេះបានឃាត់ខ្លួនមនុស្សចំនួន ៥នាក់ មកសាកសួរកាលពីថ្ងៃម្សិលមិញនេះ ដោយសង្ស័យថា ជាប់ពាក់ព័ន្ធនឹងករណីឃាតកម្មនេះ។
បើតាមគេហទំព័រដដែល ជនសង្ស័យទាំង ៥នាក់នោះ សុទ្ធសឹងជាពលរដ្ឋរស់នៅក្បែរលំនៅដ្ឋានជនរងគ្រោះ។ ជាមួយគ្នានោះ នគរបាលបានចុះទៅរុករកវត្ថុតាង និងតម្រុយបទល្មើសបន្ថែមទៀត ដើម្បីឈានទៅដល់ការបំបែកសំណុំរឿងឃាតកម្មមួយនេះ។
ស្នងការរងនគរបាលខេត្តក្រចេះ លោក អ៊ុំ ភី បានបដិសេធផ្ដល់ព័ត៌មានលម្អិតជុំវិញឃាតកម្មនេះ ដោយថា សមត្ថកិច្ចកំពុងតែស៊ើបអង្កេតករណីឃាតកម្មមួយនេះនៅឡើយ។
លោក ឆុំ ឈន និងក្រុមគ្រួសាររបស់លោក ត្រូវបានសមត្ថកិច្ចខេត្តនេះសន្និដ្ឋានថា ត្រូវបានជនដៃដល់វាយសម្លាប់ ហើយដុតកម្ទេចសពចោល ដើម្បីបំភ័ន្ទភ្នែកសមត្ថកិច្ចជាករណីភ្លើងឆេះផ្ទះ៕