គណបក្សកាន់អំណាចដែលទើបនឹងឈ្នះបានអាសនៈសភាទាំងអស់នៅក្នុងការបោះឆ្នោតអាណត្តិនេះ អះអាងថា នឹងគ្រប់គ្រងសភាឯកបក្ស ហើយបម្រើប្រជាពលរដ្ឋស្របតាមគោលការណ៍ប្រជាធិបតេយ្យ និងរដ្ឋធម្មនុញ្ញ។
បើតាមលទ្ធផលបោះឆ្នោតថ្នាក់ជាតិអាណត្តិទី៦នេះ គ.ជ.ប. ប្រកាសជាផ្លូវការកាលពីម្សិលមិញថា គណបក្សប្រជាជនកម្ពុជាទទួលបានអាសនៈសភា ១២៥ ខណៈគណបក្ស ១៩ផ្សេងទៀត មិនទទួលបានអាសនៈសូម្បីតែមួយ។
ក្នុងសន្និសីទសារព័ត៌មាននៅថ្ងៃនេះ អ្នកនាំពាក្យគណបក្សប្រជាជនកម្ពុជា លោក សុខ ឥសាន បានថ្លែងថា ក្រោយពីអតីតបក្សប្រឆាំងត្រូវបានរំលាយនៅអាណត្តិនេះ គណបក្សប្រជាជនកម្ពុជាទទួលបាន ១២៥អាសនៈ។
លោកបញ្ជាក់ថា កាលពីអាណត្តិមុន តំណាងរាស្ត្រអតីតគណបក្សសង្គ្រោះជាតិដែលទទួលបាន ៥៥អាសនៈក្នុងសភា បានចេញលិខិតអញ្ជើញ រដ្ឋមន្ត្រីមួយចំនួនសួរនាំពីចំណុចខ្វះខាត ប៉ុន្តែ លោកថា ក្នុងអាណត្តិនេះ ទោះបីជាមិនមានអតីតបក្សប្រឆាំងក៏ដោយ ក៏សភាឯកបក្សដឹកនាំដោយបក្សកាន់អំណាច នឹងអញ្ជើញរដ្ឋមន្ត្រីមួយចំនួនសួរនាំពីចំណុចខ្វះខាត។
អ្នកនាំពាក្យគណបក្សប្រជាជនកម្ពុជា លោក សុខ ឥសាន
មន្ដ្រីជាន់ខ្ពស់នៃកម្មវិធីផ្នែកអង្កេតរបស់អង្គការខុមហ្វ្រែល លោក កន សាវាង្ស មានប្រសាសន៍ថា ប្រទេសលោកសេរីធំៗលើពិភពលោក នៅក្នុងសភាមានបក្សយ៉ាងតិចពីរ ដើម្បីងាយស្រួលកោះហៅរដ្ឋមន្ត្រីសួរនាំ និងអនុម័តច្បាប់មានភាពល្អប្រសើរ។
មន្ដ្រីជាន់ខ្ពស់នៃកម្មវិធីផ្នែកអង្កេតរបស់អង្គការខុមហ្វ្រែល លោក កន សាវាង្ស
អ្វីដែលគួរឲ្យកត់សំគាល់ លោក សាវង្ស បញ្ជាក់ថា នៅកម្ពុជាអាណត្តិទី៦នេះ សភាដឹកនាំដោយបក្សតែមួយ មិនអាចធ្វើឲ្យកម្ពុជាមានការរីកចម្រើនលឿនដូចសភាពហុបក្សនោះទេ។
ទោះជាយ៉ាងណា ប្រទេសលោកសេរី ជាពិសេសសហភាពអឺរ៉ុប និងអាមេរិក មិនបានចេញសេចក្តីថ្លែងការគាំទ្រគណបក្សប្រជាជនកម្ពុជា ដែលការបោះឆ្នោតអាណត្តិទី៦នេះទេ ដោយថា ការបោះឆ្នោតអាណត្តិនេះ ដើរប្រាស់ចាកពីគន្លងប្រជាធិបតេយ្យ ខណៈអតីតបក្សប្រឆាំងត្រូវបានរំលាយ និងមន្ត្រី ១១៨រូប ត្រូវបានដកសិទ្ធិធ្វើនយោបាយ។
ប៉ុន្តែ ប្រទេសមហាអំណាចចិន ឡាវ និងវៀតណាមជាដើម បានផ្ញើលិខិតគាំទ្របក្សកាន់អំណាចដែលឈ្នះឆ្នោតអាណត្តិនេះ៕