អាជ្ញាធរ និងកម្លាំងសមត្ថកិច្ចចម្រុះ បានចុះបង្រ្កាបទីតាំងចែកចាយឪសថក្លែងក្លាយ និងខូចគុណភាពមួយកន្លែងនៅរាជធានីភ្នំពេញ ដោយរឹបអូសបានឪសថចំនួន ៣៥មុខ ដែលសមត្ថកិច្ចថា សុទ្ធសឹងគ្មានច្បាប់អនុញ្ញាត និងខុសស្ដង់ដារ។
គណៈកម្មាធិការប្រយុទ្ធប្រឆាំងផលិតផលក្លែងក្លាយឲ្យដឹងថា កាលពីថ្ងៃទី១៦សីហាឆ្នាំ២០១៨ កម្លាំងសមត្ថកិច្ចចម្រុះ និងមូលដ្ឋាន បានចុះបង្ក្រាបទីតាំងនាំចូល និងចែកចាយឪសថមួយកន្លែងឈ្មោះ «រស្មី សួគ៌» ដែលមានទីតាំងនៅសង្កាត់អូរបែកក្អម ខណ្ឌសែនសុខ រាជធានីភ្នំពេញ និងមានម្ចាស់ឈ្មោះ ហោ ឈុន ជាជនជាតិខ្មែរ។ នេះដោយយោងតាមសេចក្ដីប្រកាសព័ត៌មានរបស់ក្រសួងមហាផ្ទៃ កាលពីថ្ងៃទី១៨សីហាម្សិលមិញ។
បើតាមសេចក្ដីប្រកាសព័ត៌មាន អាជ្ញាធរអះអាងថា រឹបអូសបានឪសថចំនួន ២៣មុខ សរុបចំនួន ៥០០កេស ស្មើនឹងជាង ១៣ម៉ឺនគ្រាប់ និងជិត ៧ម៉ឺនកញ្ចប់ ព្រមទាំងឪសថផុតសុពលភាពចំនួន ១២មុខទៀត សរុប ២០កេស។
ករណីនេះ គណៈកម្មាធិការចម្រុះសន្និដ្ឋានថា នេះអាចជាទីតាំងវេបខ្ចប់ និងកែសុពលភាពឪសថ រក្សាទុក និងចែកចាយផលិតផលក្លែងក្លាយ និងដំណើរការក្រុមហ៊ុនមិនអនុឡោមតាមច្បាប់។
ក្នុងសន្និសីទសារព័ត៌មានមួយកាលពីថ្ងៃទី៦ ខែសីហាឆ្នាំ២០១៨ ប្រធានគណៈកម្មាធិការប្រយុទ្ធប្រឆាំងផលិតផលក្លែងក្លាយ លោក មៀជ សុផាន់ណា មានប្រសាសន៍ថា ការកើនឡើងនៃផលិតផលក្លែងក្លាយ គឺស្របពេលដែលកម្ពុជាមានសេដ្ឋកិច្ចរីកចម្រើន ដែលបណ្ដាលឲ្យមានកំណើនតម្រូវការខ្ពស់ ជាហេតុធ្វើឲ្យជនខិលខូចមួយចំនួនឆ្លៀតកេងចំណេញ និងលួចផលិតផលិតផលក្លែងក្លាយ៕