រដ្ឋាភិបាលកម្ពុជាបានច្រានចោលការទទូចរបស់អ្នកនាំពាក្យឧត្តមស្នងការអង្គការសហប្រជាជាតិ លោកស្រី Ravina Shamdasani ដែលបានជំរុញជាថ្មី ឲ្យមានការដោះលែងអ្នកទោសនយោបាយ អ្នកសារព័ត៌មាន និងអ្នកការពារសិទ្ធិមនុស្សទាំងអស់កំពុងជាប់ឃុំ។
ក្នុងសេចក្ដីប្រកាសព័ត៌មានកាលពីថ្ងៃទី១៨សីហា ដែលវីអូឌីទើបទទួលបាននៅថ្ងៃនេះ ស្ថានបេសកកម្មអចិន្ដ្រៃយ៍កម្ពុជាប្រចាំនៅអង្គការសហប្រជាជាតិ បានច្រានចោលការរិះគន់របស់លោកស្រី Ravina Shamdasani ថា មិនអាចទទួលយកបាន និងចាត់ទុកការអំពាវនាវនេះថា គឺមិនខុសពីធ្វើឲ្យរដ្ឋាភិបាលជ្រៀតជ្រែកអំណាចតុលាការ ដែលថា ជាស្ថាប័នឯករាជ្យ។
បើតាមសេចក្ដីប្រកាសព័ត៌មាន ស្ថានបេសកកម្មអចិន្ដ្រៃយ៍កម្ពុជាប្រចាំនៅអង្គការសហប្រជាជាតិក៏ឆ្លើយតបចំពោះការរិះគន់ទាំងឡាយ ដោយថា ការបោះឆ្នោតកាលពីថ្ងៃទី២៩ ខែកក្កដា គឺស្របតាមគោលការណ៍ប្រជាធិបតេយ្យសេរីពហុបក្ស មានពលរដ្ឋចេញទៅបោះឆ្នោតប្រមាណ ៨៣ភាគរយ និងដំណើរការដោយរលូន និងគ្មានអំពើហិង្សា។
ឆ្លើយតបចំពោះការអំពាវនាវឲ្យធានាបរិយាកាលនយោបាយល្អប្រសើរ និងមានការចូលរួមពីភាគីសង្គមស៊ីវិល ស្ថានបេសកកម្មអចិន្ដ្រៃយ៍កម្ពុជា អះអាងថា រដ្ឋាភិបាលកំពុងរៀបចំវេទិកាពិគ្រោះយោបល់មួយហើយ ដែលថា នឹងមានការចូលរួមពីគណបក្សនយោបាយចូលរួមប្រកួតប្រជែងបោះឆ្នោត។
កាលពីដើមខែមីនាកន្លងទៅ មន្ដ្រីជាន់ខ្ពស់ឧត្តមស្នងការអង្គការសហប្រជាជាតិទទួលបន្ទុកកិច្ចការសិទ្ធិមនុស្ស លោក Zeid Ra’ad Al Hussein ក៏ធ្លាប់បានអំពាវនាវឲ្យដោះលែងអ្នកទោសនយោបាយ និងអ្នកការពារសិទ្ធិមនុស្សនៅក្នុងកិច្ចប្រជុំកិច្ចមួយដែលផ្ដោតសំខាន់លើរបាយការណ៍ប្រចាំឆ្នាំស្ដីពីបញ្ហាសិទ្ធិមនុស្សលើសកលលោក៕