អគ្គស្នងការដ្ឋាននគរបាលជាតិ បានឲ្យដឹងថា តុលាការខេត្តក្រចេះបានសម្រេចឃុំខ្លួនយុវជនម្នាក់ទាក់ទិននឹងករណីសម្លាប់មនុស្សមួយគ្រួសារនៅស្រុកចិត្របុរី។
អ្នកនាំពាក្យអគ្គស្នងការដ្ឋាននគរបាលជាតិ លោក គៀត ចន្ទថារិទ្ធិ បានប្រាប់វីអូឌីតាមទូរសព្ទនៅថ្ងៃនេះថា តុលាការបានឃុំខ្លួនជនសង្ស័យម្នាក់ ហើយនគរបាលនឹងបន្ដរកជនដៃដល់ និងជនមេខ្លោងប្រព្រឹត្តថែមទៀត។
មន្រ្ដីតុលាការមួយរូបនៅខេត្តក្រចេះដែលសុំមិនបញ្ចេញឈ្មោះ បានប្រាប់វីអូឌីតាមទូរសព្ទនៅថ្ងៃនេះថា កាលពីថ្ងៃទី១៩ ខែសីហា ចៅក្រមខេត្តក្រចេះសម្រេចឃុំខ្លួនបុគ្គលមួយរូបឈ្មោះ អ៊ីវ សុខលីវ ក្រោមការចោទប្រកាន់ពីបទឃាតកម្មគិតទុកជាមុនទាក់ទិននឹងករណីសម្លាប់ផ្ដាច់ពូជមួយគ្រួសារនៅស្រុកចិត្របុរី។
កាលពីពាក់កណ្ដាលអាធាត្រថ្ងៃទី៩ ខែសីហា កើតមានករណីឃាតកម្មសម្លាប់ផ្ដាច់ពូជនៅខេត្តក្រចេះ ដែលត្រូវជនដៃដល់វាយសម្លាប់មួយគ្រួសារ និងដុតកម្ទេចសពចោលដើម្បីបំភ័ន្ដភ្នែកសមត្ថកិច្ចជាករណីភ្លើងឆេះផ្ទះ៕