ក្នុងរយៈពេលប៉ុន្មានឆ្នាំមកនេះ សាលារាជធានីភ្នំពេញ បានចេញបំរាមជាបន្តបន្ទាប់ដោយមិនអនុញ្ញាតឲ្យរថយន្តធំៗធ្វើចរាចរណ៍ពេលថ្ងៃក្នុងរាជធានីភ្នំពេញ ដើម្បីកាត់បន្ថយការកកស្ទះ និងគ្រោះថ្នាក់ចរាចរណ៍ ប៉ុន្តែរថយន្តធំៗនៅតែបន្តចូលទីក្រុងដ៏មមាញឹកមួយនេះដែល។
តំបន់បឹងទំពន់ ខណ្ឌមានជ័យ គឺជាឧទាហរណ៍នៃបញ្ហាដែលប្រជាពលរដ្ឋកំពុងតែព្រួយបារម្ភនៅឡើយដោយរថយន្តដឹកដី ដឹកខ្សាច់ ដឹកដែក និងដឹកសម្ភារផ្សេងៗទៀតបន្តចូលក្នុងទីក្រុងនាពេលថ្ងៃ។ ប្រជាពលរដ្ឋ និងអ្នកដែលធ្វើដំណើរតាមផ្លូវនាៗក្នុងតំបន់នោះ និងជាពិសេសផ្លូវ៣៧១ មានការព្រួយបារម្ភជាខ្លាំង ដោយសារតែរថយន្តធំៗមួយចំនួន បានបង្កគ្រោះថ្នាក់ និងការកកស្ទះយ៉ាងខ្លាំង។ ក្រៅពីនេះពលរដ្ឋអះអាងថា មានការរំខានយ៉ាងខ្លាំងពីសំឡេងរបស់រថយន្តធំៗទាំងនោះ។
កំពុងលក់កាហ្វេជូនភ្ញៀវ លោកស្រី ថុល្លី បានឲ្យដឹងថា នៅពេលដែលលោកស្រីជិះនៅពីក្រោយរថយន្តធំៗម្តងៗ លោកស្រីតែងតែបិទច្រមុះ និងនៅឲ្យឆ្ងាយពីរថយន្តទាំងនោះ ដោយសារតែខ្លាចមានគ្រោះថ្នាក់ និងមិនចង់ហិតផ្សែងហុយដែលចេញពីឡាន។
លោកស្រី ថុល្លី អ្នកលក់ដូរនៅម្ដុំបឹងទំពន់
ជុំវិញបញ្ហានេះ លោកស្រី ថុល្លី ក៏បានសំណូមពរដល់រដ្ឋាភិបាលក៏ដូចជាសាលារាជធានីភ្នំពេញឲ្យមានវិធានការច្បាស់លាស់ដើម្បីកុំឲ្យរថយន្តធំៗបើកបរនៅពេលថ្ងៃក្នុងទីក្រុង។
លោកស្រី ថុល្លី អ្នកលក់ដូរនៅម្ដុំបឹងទំពន់
កំពុងនិយាយគ្នាជាមួយអ្នកជិតខាង លោកស្រី លី ម៉ា ដែលរស់នៅតាមបណ្តោយ ផ្លូវ៣៧១ បានប្រាប់ឲ្យដឹងថា ចំពោះគ្រោះថ្នាក់គឺមានច្រើនរាប់មិនអស់ ហើយសម្លេងគឺលាន់ឮខ្លាំង ព្រោះតែផ្លូវរលាក់ដែលធ្វើឲ្យលោកស្រីពិបាកក្នុងការសម្រាន្ត។
លោកស្រី លី ម៉ា ដែលរស់នៅតាមបណ្តោយ ផ្លូវ៣៧១
លោកស្រី លី ម៉ា បន្តថា ផ្លូវក្នុងតំបន់នេះមានរថយន្តធុនធ្ងន់បើកបករឆ្លងកាត់ជាប្រចាំដែលធ្វើឲ្យផ្លូវរងនូវការខូចខាត និង រលាក់ដែលបង្កជាសំឡេងរំខានដល់ប្រជាពលរដ្ឋផងដែរ។ លោកស្រីសំណូមពរឲ្យសាលាក្រុងជួយសម្រួលផ្លូវ ដោយសារតែមានការរំខានពីសម្លេងលាន់ឮខ្លាំងពេលដែលឡានធំៗធ្វើដំណើរនៅលើផ្លូវនេះ។
លោកស្រី លី ម៉ា ដែលរស់នៅតាមបណ្តោយ ផ្លូវ៣៧១
លោក សុផល ដែលកំពុងគេងលើរ៉ឺម៉ក់កង់បី ដោយដៃកំពុងចុចទូរសព្ទបណ្តើរ និងកំពុងរងចាំភ្ញៀវបណ្តើរនោះ បានប្រាប់អ្នកសារព័ត៌មានវីអូឌីថា លោកបានឃើញគ្រោះថ្នាក់ដោយផ្ទាល់ជាច្រើនដងមកហើយដែលបង្កឡើងដោយរថយន្តធុនធំនៅលើផ្លូវ៣៧១ខណៈដែលលោកមានការព្រួយបារម្ភជាខ្លាំងពីបញ្ហានេះ។
លោក សុផល អ្នករត់រ៉ឺម៉កកង់បី
លោក សុផល បានបង្ហាញការងឿងឆ្ងល់ចំពោះចំណាត់ការរបស់សាលារាជធានីភ្នំពេញ ក្នុងការទប់ស្កាត់រថយន្តធន់ធំចូលក្នុងក្រុង។
លោក សុផល អ្នករត់រ៉ឺម៉កកង់បី
លោក សេង ហុង រស់នៅម្តុំបឹងទំពន់ និង ជាអ្នកធ្វើដំណើរតាម ផ្លូវ៣៧១ ជារៀងរាល់ថ្ងៃ បានប្រាប់វីអូឌីដែរថា លោកមានការបារម្ភជាខ្លាំងនៅពេលដែលរថយន្តធំៗបើកនៅក្បែរ ដោយសារតែខ្លាចធ្លាក់ថ្ម ដី ឬដែក មកលើគាត់។
លោក សេង ហុង រស់នៅម្តុំបឹងទំពន់
ដោយសារតែធ្លាប់បានឃើញគ្រោះថ្នាក់បណ្តាលមកពីរថយន្តធំៗនៅក្នុងលើទំព័រសារព័ត៌មានជាច្រើន ទើបលោក សេង ហុង មានការប្រុងប្រយ័ត្នខ្ពស់នៅពេលធ្វើដំណើរជិតរថយន្តធំៗទាំងនោះ។ លោកក៏បានសំណូមពរទៅសាលារាជធានីភ្នំពេញជួយពង្រឹងច្បាប់និងបទញ្ជាដែលខ្លួនបានដាក់ចេញជាបន្តបន្ទាប់នាពេលកន្លងមក ដើម្បីទប់ស្កាត់រថយន្តធំៗទាំងនោះចូលក្នុងក្រុង។
លោក សេង ហុង រស់នៅម្តុំបឹងទំពន់
ឆ្លើយតបនឹងក្តីបារម្ភរបស់ប្រជាពលរដ្ឋ អ្នកនាំពាក្យរបស់សាលារាជធានីភ្នំពេញ លោក ម៉េត មាសភក្តី បានប្រាប់វីអូឌីតាមទូរស័ព្ទថា ខាងសាលារាជធានីភ្នំពេញកំពុងតែមានចំណាត់ការលើការខ្វះខាតទៅលើការអនុវត្តរបស់បុគ្គល ឬមន្រ្តីមួយចំនួន និងពង្រឹងការអនុវត្តឲ្យស្របតាមគោលការណ៍របស់សាលាក្រុង។
អ្នកនាំពាក្យរបស់សាលារាជធានីភ្នំពេញ លោក ម៉េត មាសភក្តី
គួរបញ្ជាក់ថា កាលពីខែវិច្ឆិកា ឆ្នាំ២០១៣ សាលារាជធានីភ្នំពេញធ្លាប់បានចេញបម្រាមដែលហាមមិនឲ្យរថយន្តដឹកទំនិញធុនធ្ងន់ឆ្លងកាត់ទីក្រុងភ្នំពេញពេលថ្ងៃ។ ហើយបានចេញបទបញ្ជាម្តងទៀតកាលពីខែមីនា ឆ្នាំ២០១៦ ដោយអនុញ្ញាតឲ្យរថយន្តធុនធ្ងន់ឆ្លងកាត់ក្នុងទីក្រុងចាប់ពីម៉ោង៨ៈ០០នាទីយប់ដល់ម៉ោង៦ព្រឹកតែប៉ុណ្ណោះ។
កាលពីថ្ងៃទី០៩ ខែកុម្ភៈ ឆ្នាំ២០១៨ អភិបាលក្រុងភ្នំពេញ លោក ឃួង ស្រេង បានធ្វើកិច្ចប្រជំុត្រួតពិនិត្យចរាចរណ៍ចេញ-ចូលរបស់រថយន្តធុនធ្ងន់ ដើម្បីពង្រឹងការអនុវត្តច្បាប់ចរាចរណ៍ផ្លូវគោក កាត់បន្ថយឲ្យបានខ្ពស់បំផុតនូវការកកស្ទះចរាចរណ៍។ នៅក្នុងកិច្ចប្រជុំ លោក ឃួង ស្រេង បានព្រមានចាត់វិធានការតឹងរ៉ឹងចំពោះរថយន្តទាំងឡាយណាមិនគោរពបទដ្ឋានបច្ចេកទេស។
យោងតាមរបាយការណ៍របស់អគ្គស្នងការដ្ឋាននគរបាលជាតិបានឲ្យដឹងថាចាប់ពីខែមករា ដល់ ខែមិថុនា ឆ្នាំ២០១៨ មានគ្រោះថ្នាក់ចរាចរណ៍ កើតឡើងចំនួន ១៩៦៣លើកនៅទូទាំងប្រទេស ដោយបានសម្លាប់មនុស្សដល់ទៅ ៩៣០នាក់ និងបណ្ដាលឲ្យមនុស្ស ២៣៩៩នាក់រងរបួស។