សេដ្ឋកិច្ច

សង្គ្រាមពាណិជ្ជកម្មរវាងអាមេរិកនិងចិន ផ្តល់ផលប្រយោជន៍ដល់កម្ពុជា

លោក ហ៊ុន សិរីវឌ្ឍន៍
| ២១ សីហា ២០១៨
ម៉ោង ១៣:៥៤

លោក ដូណាល់ ត្រាំ និងលោក ស៊ី ជីងពីង

កម្ពុជាកំពុងទទួលប្រយោជន៍ពីសង្គ្រាមពាណិជ្ជកម្មអាមេរិក និងចិន ខណៈម្ចាស់ក្រុមហ៊ុនមួយចំនួនងាកមកបញ្ជារទិញពីកម្ពុជា។

អគ្គលេខាធិការរងសមាគមរោងចក្រកាត់ដេរកម្ពុជាលោក កាំង មូលីកា បានឲ្យVOD ដឹងថាចាប់ពីដើមឆ្នាំនេះទំហំនៃការបញ្ជាទិញរបស់ម្ចាស់ម៉ាកពីកម្ពុជាទៅកាន់សហរដ្ឋអាមេរិកមានការកើនឡើងច្រើន ខណៈអ្នកវិនិយោគវិស័យកាត់ដេរចិនមួយចំនួនបានមកពិភាក្សាជាមួយសមាគមក្នុងការបើកដំណើរការរោងចក្រនៅកម្ពុជាផងដែរ។

តាំងពីដើមឆ្នាំមក តាំងពីមុនមានជម្លោះពាណិជ្ជកម្មមកយើងឃើញថាការកម្មង់ទិញផលិតផលកាបូប និងស្បែកជើងគឺមានការកើនឡើងច្រើន

អគ្គលេខាធិការរងសមាគមរោងចក្រកាត់ដេរកម្ពុជាលោក កាំង មូលីកា

លោកកាំង ម៉ូលីកា មានជំនឿថាចាប់ពីឆ្នាំនេះតទៅផលិតផលពីកម្ពុជាអាចមាននៅលើទីផ្សារសហរដ្ឋអាមេរិកច្រើនជាពិសេសផលិតផលកាបូបធ្វើដំណើរ។

សង្គ្រាមពាណិជ្ជកម្មរវាងអាមេរិក និងចិន ចាប់ផ្តើមកាលពីថ្ងៃទី៦ កក្កដា បន្ទាប់ពីអាមេរិកបានសម្រេចដំឡើងពន្ធលើទំនិញនាំចូលពីចិន ហើយចិនក៏បានធ្វើការសងសឹកវិញភ្លាមៗដោយដំឡើងពន្ធនាំចូលលើទំនិញរបស់អាមេរិកដូចគ្នា។

ឥទ្ធិពលនៃសង្គ្រាមនេះ បានធ្វើឲ្យក្រុមហ៊ុនមួយចំនួនកំពុងសិក្សាពីការសម្រេចផ្លាស់ប្តូរទីតាំងផលិតរបស់ពួកគេ នេះបើតាមការចុះផ្សាយរបស់ការសែតBloomberg ដែលបានដកស្រង់ប្រសាសន៍របស់អនុប្រធានប្រតិបត្តិនៃសមាគមសំលៀកបំពាក់និងស្បែកជើងអាមេរិកលោក Steve Lamar។

Bloomberg ក៏បានដកស្រង់ប្រសាសន៍របស់ប្រធានក្រុមហ៊ុន Steven Madden លោក Edward Rosenfeld ថាថ្មីៗនេះក្រុមហ៊ុនកំពុងពិចារណាផ្លាស់ប្តូរផលិតកម្មកាបូបរបស់ខ្លួនពីប្រទេសចិនទៅកាន់កម្ពុជាផងដែរ។

អ្នកនាំពាក្យក្រសួងពាណិជ្ជកម្មលោក ស៊ាង ថៃ ថារហូតមកដល់ពេលនេះមិនទាន់មានព័ត៌មានជាក់លាក់នៅឡើយទេពីការផ្លាស់ប្តូរទីតាំងរោងចក្រទាំងនោះមកកម្ពុជានោះ តែប្រសិនបើមានការផ្លាស់ប្តូរមកកម្ពុជាពិតមែននេះជារឿងល្អ។

យើងឃើញថាក្រុមហ៊ុនដែលមកវិនិយោគ នៅកម្ពុជាធ្វើកាបូបហ្នឹងប្រហែលជា៦០បន្តិចបន្តួច ដែលមកមុន សង្គ្រាមពាណិជ្ជកម្មទៅទៀត ហើយឥឡូវប្រសិនជាសង្គ្រាមពាណិជ្ជកម្ម ហើយអ្វីទាក់ទងនឹងពាណិជ្ជកម្មចិនដែលនាំទៅ(អាមេរិក)មិនបាន ហើយវាហៀរមកយើងបន្ថែមទៀតយើងនឹងចំណេញច្រើន

អ្នកនាំពាក្យក្រសួងពាណិជ្ជកម្មលោក ស៊ាង ថៃ

កាលពីខែកក្កដា ឆ្នាំ២០១៦ សហរដ្ឋអាមេរិកបានផ្តល់ប្រព័ន្ធអនុគ្រោះពន្ធGSP ដល់កម្ពុជាដែលអនុគ្រោះពន្ធទៅលើផលិតផលសម្រាប់ធ្វើដំណើរដែលមានដូចជាវ៉ាលី កាបូបស្ពាយ កាបូបដៃ និងកាបូបលុយជាង២៨ប្រភេទ ចូលទៅសហរដ្ឋអាមេរិកដោយមិនបាច់បង់ពន្ធ។

យោងតាមទិន្នន័យរបស់ការិយាល័យស្ថិតិសហរដ្ឋអាមេរិកឲ្យដឹងថានៅឆមាសទី១នៃឆ្នាំ២០១៨នេះកម្ពុជាបាននាំទំនិញចូលទៅកាន់ទីផ្សារសហរដ្ឋមានតម្លៃជាង ១ ៧១៧លានដុល្លារ កើនឡើងជាង ៣៥០លានដុល្លារក្នុងរយៈពេលដូចគ្នាកាលពីឆ្នាំ២០១៧( ១ ៣៦២,២លានដុល្លារ)។

កាលពីថ្ងៃទី២៣ ខែមីនា ប្រធានាធិបតីអាមេរិក លោក ដូណាល់ ត្រាំ បានចុះហត្ថលេខាឲ្យបន្តប្រព័ន្ធអនុគ្រោះពន្ធទូទៅ ហៅកាត់ថា GSP ដល់កម្ពុជាដោយមានសុពលភាពរហូតដល់ចុងឆ្នាំ២០២០ បើទោះបីបញ្ហានយោបាយរវាងកម្ពុជា និងសហរដ្ឋអាមេរិកមួយរយៈចុងក្រោយនេះហាក់មានការរកាំរកូសជាមួយគ្នាក៏ដោយ៕

រក្សាសិទ្វិគ្រប់យ៉ាងដោយ ស៊ីស៊ីអាយអឹម

សូមបញ្ជាក់ថា គ្មានផ្នែកណាមួយនៃអត្ថបទ រូបភាព សំឡេង និងវីដេអូទាំងនេះ អាចត្រូវបានផលិតឡើងវិញក្នុងការបោះពុម្ពផ្សាយ ផ្សព្វផ្សាយ ការសរសេរឡើងវិញ ឬ ការចែកចាយឡើងវិញ ដោយគ្មានការអនុញ្ញាតជាលាយលក្ខណ៍អក្សរឡើយ។
ស៊ីស៊ីអាយអឹម មិនទទួលខុសត្រូវចំពោះការលួចចម្លងនិងចុះផ្សាយបន្តណាមួយ ដែលខុស នាំឲ្យយល់ខុស បន្លំ ក្លែងបន្លំ តាមគ្រប់ទម្រង់និងគ្រប់មធ្យោបាយ។ ជនប្រព្រឹត្តិ និងអ្នកផ្សំគំនិត ត្រូវទទួលខុសត្រូវចំពោះមុខច្បាប់កម្ពុជា និងច្បាប់នានាដែលពាក់ព័ន្ធ។