តំណាងសហគមន៍ព្រែកខ្សាច់ក្នុងខេត្តកោះកុងដែលកំពុងមានជម្លោះដីធ្លីជាមួយក្រុមហ៊ុនស្ករអំពៅរបស់លោក លី យ៉ុងផាត់ ត្រូវបានតុលាការខេត្តនេះ កាត់ទោសឲ្យជាប់ពន្ធនាគារ១ឆ្នាំកន្លះក្រោមការចោទថា បានទៅបោះបង្គោលព្រំលើដីអ្នកដទៃដោយខុសច្បាប់។
តុលាការខេត្តកោះកុងនៅថ្ងៃនេះ បានប្រកាសសាលក្រមសុំណុំរឿងរបស់តំណាងសហគមន៍ព្រែកខ្សាច់គឺ លោក ហេង សុខ ដោយតុលាការមួយនេះសម្រេចឲ្យជាប់ពន្ធនាគារ១ឆ្នាំ ៦ខែ និងផាកពិន័យជាង២លានរៀល ខណៈតំណាងរូបនេះត្រូវបានឃុំខ្លួនរយៈ៦ខែរួចមកហើយ។ នេះបើតាមមន្រ្តីសម្របសម្រួលអង្គការលីកាដូខេត្តកោះកុង លោក ហ៊ួរ អ៊ីន។
លោក ហ៊ួរ អ៊ីន បានចាត់ទុកការសម្រេចរបស់តុលាការខេត្តកោះនេះថា ជារឿងមិនត្រឹមត្រូវ គួរតែដោះស្រាយតាមគណៈកម្មាការដោះស្រាយវិវាទដីធ្លីវិញ និងម្យ៉ាងទៀតផ្ទុយពីប្រសាសន៍របស់លោក នាយករដ្ឋមន្រ្តី ហ៊ុន សែន ដែលធ្លាប់និយាយថា គ្មានពលរដ្ឋណាម្នាក់ជាប់ពន្ធនាគារដោយសារជម្លោះដីធ្លីនោះដែរ។
មន្រ្តីសម្របសម្រួលអង្គការលីកាដូខេត្តកោះកុង លោក ហ៊ួរ អ៊ីន
ម្តាយលោក ហេង សុខ គឺអ្នកស្រី ទិត្យ តេន និយាយថាការសម្រេចឲ្យកូនគាត់ជាប់ឃុំ១ឆ្នាំកន្លះជារឿងអយុត្តិធម៌ ដោយថា គ្រួសារគាត់ត្រូវបានក្រុមហ៊ុនលោក លី យ៉ុងផាត់ រំលោភយកដីធ្លីហើយប្តឹងម្ចាស់ដីដាក់ពន្ធនាគារទៀត។
អ្នកស្រីបានអំពាវនាវទៅលោកនាយករដ្ឋមន្រ្តី ហ៊ុន សែន ឲ្យអន្តរាគមន៍ និងស្នើទៅលោក លី យ៉ុងផាត់ បញ្ឈប់រំលោភបំពាន យកដីធ្លីរបស់ពួកគាត់ទៀត។
អ្នកស្រី ទិត្យ តេន ម្តាយលោក ហេង សុខ
វីអូឌីមិនអាចសុំការឆ្លើយតបពីតំណាងក្រុមហ៊ុនស្ករអំពៅរបស់លោក លី យ៉ុងផាត់ បានទេជុំវិញបញ្ហាវិវាទដីធ្លីនេះ។
តំណាងសហគមន៍ព្រែកខ្សាច់លោក ហេង សុខ ត្រូវបានសមត្ថកិច្ចខេត្តកោះកុងចាប់ខ្លួនកាលពីថ្ងៃទី២២កុម្ភៈ ក្រោយពីតំណាងសហគមន៍រូបនេះ ចូលទៅបោះបង្គោលព្រំលើដីដែលកំពុងមានជម្លោះជាមួយក្រុមហ៊ុនលោក លី យ៉ុងផាត់ ស្ថិតក្នុងឃុំព្រែកខ្សាច់ ស្រុកគីរីសាគរ ខេត្តកោះកុង៕
