មន្ត្រីសមាគមការពារសិទ្ធិមនុស្សអាដហុក បានឲ្យដឹងថា មកទល់ពេលនេះ តុលាការបានចេញដីការកោះហៅមន្ត្រីរបស់ខ្លួន២នាក់និងអតីតមន្រ្តីម្នាក់របស់អង្គការនេះឲ្យចូលទៅដោះបន្ទុកក្នុងសំណុំរឿងសមគំនិតសូកប៉ាន់សាក្សី។
មន្ត្រីស៊ើបអង្កេតជាន់ខ្ពស់នៅសហគមអាដហុក លោក ស៊ឹង សែនករុណា បានប្រាប់វីអូឌីថ្ងៃនេះថា តុលាការបានចេញដីកាកោះហៅមន្ត្រីសិទ្ធិមនុស្សអាដហុក លោក យី សុខសាន្ត និង លោក ណៃ វ៉ង់ដា ឲ្យចូលសវនាការនៅថ្ងៃទី២៧ ខែសីហា ខាងមុខនេះ។
ចំណែកឯមន្រ្តីសិទ្ធិមនុស្សអាដហុក ២រូបផ្សេងទៀត មានលោក នី សុខា និងលោកស្រី លឹម មុន្នីដែលមានឈ្មោះក្នុងសំណុំរឿងនេះដែរនៅមិនទាន់ទទួលដីកាកោះហៅពីតុលាការនៅឡើយទេ។ បើតាមស៊ឹង សែនករុណា លោក នី ចរិយាដែលជាអតីតមន្រ្តីអាដហុកហើយបច្ចុប្បន្នជាអគ្គលេខាធិការរង គ.ជ.ប ក៏ទទួលបានដីការកោះឲ្យចូលបំភ្លឺនៅថ្ងៃដូចគ្នានេះដែរ។
កាលពីថ្ងៃទី១៦ខែសីហាសប្ដាហ៍មុន មូលនិធិការពារសិទ្ធិមនុស្សឈានមុខ(Front Line Defenders) ដែលការពារក្រុមអ្នកការពារសិទ្ធិមនុស្សបានជំរុញឲ្យកម្ពុជាទម្លាក់ចោលការចោទប្រកាន់ទាំងអស់ប្រឆាំងនឹង លោក ណៃ វ៉ង់ដា លោកនី សុខា លោកយី សុខសាន្ត អ្នកស្រី លឹម មុន្នី និងលោក នី ចរិយាដោយគ្មានលក្ខខណ្ឌ។
មន្ត្រីសិទ្ធិមនុស្សអាដហុក៤រូប និងអគ្គលេខាធិការរង គ.ជ.ប. លោក នី ចរិយា ត្រូវបានតុលាការសម្រេចឲ្យនៅក្រៅឃុំបណ្ដោះអាសន្នកាលពីល្ងាចថ្ងៃទី២៩ ខែមិថុនា ឆ្នាំ២០១៧ បន្ទាប់ពីត្រូវបានឃុំខ្លួនអស់រយៈពេលជាង ១ឆ្នាំ ក្រោមការចោទប្រកាន់ថា បានសូកប៉ាន់សាក្សី និងសមគំនិតក្នុងរឿងសូកប៉ាន់សាក្សី ពាក់ព័ន្ធនឹងសំណុំរឿងនាង ខុម ចាន់តារាទី ហៅស្រីមុំ ដែលត្រូវបានគេទម្លាយថា មានទំនាក់ទំនងស្នេហាចម្រូងចម្រាសជាមួយមេដឹកនាំអតីតបក្សប្រឆាំង លោក កឹម សុខា៕