គ្រូនិងសិស្ស១២នាក់ប្រព្រឹត្តកំហុសក្នុងពេលប្រឡងមធ្យមសិក្សាទុតិយភូមិ

ក្រសួងអប់រំយុវជន និងកីឡា បានរកឃើញថា សិស្ស និងគ្រូចំនួន១២នាក់ បានប្រព្រឹត្តកំហុស ដែលផ្ទុយពីការណែនាំ ក្នុងពេលប្រឡងមធ្យមសិក្សាទុតិយភូមិ រយៈពេល២ថ្ងៃនៅដើមសប្តាហ៍នេះ។​

យោងតាមសេចក្តីប្រកាសព័ត៌មានរបស់ក្រសួងអប់រំចេញផ្សាយកាលពីម្សិលមិញគឺ សិស្ស និងគ្រូជាអ្នកត្រួតពិនិត្យការប្រឡងចំនួន១០នាក់ បានប្រើប្រាស់ទូរសព្ទ ចំណែកសិស្ស២នាក់ទៀត បាននាំចូលសំណៅឯកសារចូលក្នុងបន្ទប់ប្រឡង។​

ក្នុងសេចក្តីប្រកាសព័ត៌មាននេះ មិនបានបញ្ជាក់ថា អ្នកប្រព្រឹត្តកំហុសទាំងនេះ ត្រូវរងការពិន័យយ៉ាងណានោះទេ។​

ក្រសួងក៏បានឲ្យដឹងទៀតថា សិស្សចំនួន៦៤នាក់ មានបញ្ហាសុខភាពធ្ងន់ធ្ងរ ប៉ះពាល់ដល់ដំណើរការប្រឡងរបស់ពួកគេ។​

ទីប្រឹក្សា​សមាគមគ្រូបង្រៀន​កម្ពុជាឯករាជ្យ លោក រ៉ុង ឈុន បានប្រាប់វីអូឌីថា សម្រាប់បេក្ខជនដែលមានបញ្ហាសុខភាពដូចជា ដួលសន្លប់មិនបានប្រឡង លោកចង់ឲ្យមានការរៀបចំឲ្យសិស្សទាំងនោះបានប្រឡងម្តងទៀត។​

ប្រធាន​មជ្ឈមណ្ឌល​ទស្សនវិជ្ជា​អនុវត្ដន៍​និង​សីលធម៌​កម្ពុជា​ លោក ប៉ា ច័ន្ទរឿន ពិនិត្យឃើញថា ការប្រឡងនៅឆ្នាំនេះ មានភាពល្អប្រសើរច្រើន កាត់បន្ថយអំពើពុករលួយ និងកំហុសផ្សេងៗទៀត។​

យោងតាមសេចក្តីប្រកាសព័ត៌មានរបស់ក្រសួងអប់រំបានឲ្យដឹងថា ចំនួនសិស្សដែលចូលរួមប្រឡងសរុបជាង១១ម៉ឺននាក់ ស្រីជាង៥ម៉ឺននាក់  ក្នុងនោះបេក្ខជនដែលអវត្តមានចំនួនជាង១ពាន់នាក់។​