អគ្គស្នងការនគរបាលជាតិ លម្អិតព័ត៌មានថា ទឹកប្រាក់ ១០ម៉ឺនដុល្លារ ត្រូវបានក្រុមចោរប្លន់ពីធនាគារ អ អេច ប៊ី ឥណ្ដូឆៃណា ដែលស្ថិតនៅតាមបណ្ដោយផ្លូវ ម៉ៅ សេទុង ខណ្ឌចំការមន រាជធានីភ្នំពេញ នៅរសៀលថ្ងៃនេះ។
គេហទំព័រអគ្គស្នងការនគរបាលជាតិ ចុះផ្សាយនៅមុននេះ បានឲ្យដឹងថា ក្រុមចោរមានគ្នា ៥នាក់ ប្រដាប់ដោយកាំភ្លើងខ្លី បានដើរចូលទៅក្នុងធនាគារឥណ្ដូឆៃណា និងបានប្លន់យកប្រាក់អស់ ១០ម៉ឺនដុល្លារអាមេរិក ហើយបានរត់គេចខ្លួនបាត់ ប៉ុន្ដែ ករណីនេះ អាជ្ញាធរអះអាងថា មិនបានបង្ករបួសស្នាមដល់បុគ្គលិកធនាគារនោះទេ។
អគ្គស្នងការនគរបាលជាតិ ឲ្យដឹងទៀតថា កម្លាំងសមត្ថកិច្ចមូលដ្ឋាន និងក្រសួងមហាផ្ទៃ បានចុះទៅដល់កន្លែងកើតហេតុតែម្ដង ដើម្បីស្រាវជ្រាវរកមុខក្រុមជនសង្ស័យទាំងនោះ និងបានពិនិត្យមើលតាមរយៈកាមេរ៉ាសុវត្ថិភាពរបស់ធនាគារផងដែរ។
យ៉ាងណាក៏ដោយ វេបសាយអគ្គស្នងការនគរបាលជាតិមិនបានបញ្ជាក់ពីអត្តសញ្ញាណក្រុមចោរប្លន់ប្រដាប់អាវុធទាំងនោះទេ។
ក្នុងលិខិតចុះថ្ងៃទី២០ កក្កដាកន្លងទៅ ធនាគារជាតិនៃកម្ពុជា បានរំឭកដល់គ្រប់គ្រឹះស្ថានធនាគារ និងហិរញ្ញវត្ថុទាំងអស់ថា មិនគួរដាក់កម្លាំងប្រដាប់អាវុធយាមនៅក្នុង ឬនៅក្បែរស្ថាប័ននោះទេ ដោយថា បច្ចុប្បន្នកម្ពុជាមានសន្តិភាពពេញលេញហើយ៕
