គ្រោះទឹកជំនន់ និងរាំងស្ងួត ធ្វើឲ្យប៉ះពាល់ផលដំណាំប្រជាពលរដ្ឋជាង១៤ម៉ឹនហិចតា និងបំផ្លាញឲ្យខូចខាតទាំងស្រុងប្រមាណ៣ម៉ឺនហិចតា។
យោងតាមរបាយការណ៍ប្រចាំខែសីហាដែល VOD ទទួលបានអគ្គនាយកដ្ឋានកសិកម្មឲ្យដឹងថា គិតត្រឹមថ្ងៃ២៣សីហាឆ្នាំ២០១៨នេះ គ្រោះធម្មជាតិ ដែលរួមមានគ្រោះទឹកជំនន់ និងគ្រោះរាំងស្ងួត នៅទូទាំងប្រទេសបានធ្វើឲ្យប៉ះពាល់ដីផ្ទៃដីកសិកម្ម និងឧស្សាហកម្មចំនួន ១៤៩ ០៦៥ ហិចតា កើនលើសឆ្នាំមុនជាង១០ម៉ឺនហិកតា និងបានធ្វើឲ្យខូចខាតផលដំណាំ ប្រមាណ ៣០ ២៤៥ ហិចតា។
បើតាមរបាយការណ៍នោះផលដំណាំស្រូវរងការខូចខាតប្រមាណ ២៨ ២៧០ ហិចតា។
នៅព្រឹកនេះក្រសួងកសិកម្មក៏បានកោះប្រជុំបន្ទាន់មួយផងដែរ ដើម្បីបូកសរុបផលប៉ះពាល់លើផលដំណាំ និងសត្វពាហនៈ រៀបចំផែនការចុះអន្តរាគមន៍ ដើម្បីស្តារឡើងវិញនៃការខូចខាត និងសិក្សាពីតម្រូវការរបស់ប្រជាកសិករ និងលទ្ធភាពនៃការផ្គត់ផ្គង់របស់ក្រសួងដូចជាស្រូវពូជ គ្រាប់ពូជដំណាំគ្រប់ប្រភេទ និងថ្នាំការពារជំងឺឆ្លងសត្វ។
អ្នកនាំពាក្យក្រសួងកសិកម្ម និងជាអគ្គនាយកនៃអគ្គនាយកដ្ឋានកសិកម្មលោក ហ៊ាន វណ្ណហន មានប្រសាសន៍ថាអគ្គនាយកបានត្រៀមគ្រាប់ពូជស្រូវជាង២ពាន់តោន និងគ្រាប់ពូជដំណាំរួមផ្សំផ្សេងទៀតជាង២៥តោនដើម្បីទុកផ្តល់ជូនកសិករយកទៅស្តារផលដំណាំរបស់ខ្លួនឡើងវិញ ខណៈដែលលោករំពឹងថានាចុងខែនេះទឹកជំនន់នៅតាមបណ្តាខេត្តមួយចំនួនអាចនឹងស្រកចុះ។
អ្នកនាំពាក្យក្រសួងកសិកម្ម និងជាអគ្គនាយកនៃអគ្គនាយកដ្ឋានកសិកម្មលោក ហ៊ាន វណ្ណហន
លោកហ៊ាន វណ្ណហន បានបញ្ជាក់ថាផលប៉ះពាល់នៃគ្រោះធម្មជាតិនៅឆ្នាំនេះមិនអាចធ្វើឲ្យប៉ះពាល់ដល់ការផ្តត់ផ្គង់ស្រូវក្នុងស្រុកក៏ដូចជានាំចេញនោះទេ។
អគ្គលេខាធិការសម្ព័ន្ធកសិករកម្ពុជាលោក ថេង សាវឿន មានប្រសាសន៍ថាជាមួយនឹងវិធានការត្រៀមសង្គ្រោះរបស់រដ្ឋ រដ្ឋាភិបាលគួរតែមានការផ្តល់កម្ចីជាសាច់ប្រាក់ដល់ប្រជាពលរដ្ឋផងដែរដើម្បីឲ្យពលរដ្ឋអាចមានលទ្ធភាពរក្សាជីវភាពរបស់ពួកគេក្នុងពេលរងគ្រោះធម្មជាតិនេះ។
អគ្គលេខាធិការសម្ព័ន្ធកសិករកម្ពុជាលោក ថេង សាវឿន
តាមរបាយការណ៍អគ្គនាយកដ្ឋានកសិកម្មក្នុងឆ្នាំ២០១៧ គ្រោះធម្មជាតិបានធ្វើឲ្យប៉ះពាល់ដល់ផ្ទៃដីកសិកម្មចំនួន ៣១ ០៩៥ ហិកតា និងបានធ្វើឲ្យខូចខាតដំណាំស្រូវជាង១១ ៧១៥ ហិកតា ខណៈដំណាំរួមផ្សំខូចខាតជាង៦១០ ហិកតា៕
