ប្រជាសហគមន៍ និងសាច់ញាតិអ្នកជាប់ឃុំដោយសារបញ្ហាដីធ្លីអំពាវនាវទៅលោកនាយករដ្ឋមន្រ្តី ហ៊ុន សែន ឲ្យជួយអន្តរាគមន៍ដោះលែងកូន និងតំណាងរបស់ពួកគេមានសេរីភាពវិញ ខណៈលោក ហ៊ុន សែន ប្រកាសបន្ធូរបន្ថយ និងលើកលែងទោសដល់ទណ្ឌិតក្នុងទ្រង់ទ្រាយធំនៅរដូវបុណ្យទានខាងមុខនេះ។
អ្នកស្រី ទេត្យ តេន ត្រូវជាម្តាយរបស់តំណាងពលរដ្ឋម្នាក់ដែលកំពុងជាប់ឃុំនៅពន្ធនាគារខេត្តកោះកុងដោយសារមានជម្លោះដីធ្លីជាក្រុមហ៊ុនស្ករអំពៅរបស់លោក លី យ៉ុងផាត់ ប្រាប់វីអូឌីថា ក្រោយឮប្រសាសន៍លោកនាយករដ្ឋមន្រ្តីអំពីការលើកលែងទោសទណ្ឌិតនេះ អ្នកស្រីសប្បាយចិត្ត ហើយថា នឹងពិភាក្សាជាមួយពលរដ្ឋក្នុងសហគមន៍ និងអង្គការសង្គមស៊ីវិលដើម្បីធ្វើសំណើមួយទៅលោក ហ៊ុន សែន ជួយដោះលែងកូនគាត់មានសេរីភាពវិញ។
អ្នកស្រី ទេត្យ តេន ត្រូវជាម្តាយរបស់តំណាងពលរដ្ឋម្នាក់ដែលកំពុងជាប់ឃុំនៅពន្ធនាគារខេត្តកោះកុង
តុលាការខេត្តកោះកុងកាលពីថ្ងៃទី២១ ខែសីហា បានប្រកាសសាលក្រមសុំណុំរឿងរបស់តំណាងសហគមន៍ព្រែកខ្សាច់គឺ លោក ហេង សុខ ដោយតុលាការមួយនេះសម្រេចឲ្យជាប់ពន្ធនាគារ១ឆ្នាំ ៦ខែ និងផាកពិន័យជាង២លានរៀល ដោយសារតំណាងរូបនេះទៅបោះបង្គោលព្រំលើដីកំពុងមានជម្លោះជាមួយក្រុមហ៊ុនលោក លី យ៉ុងផាត់ ស្ថិតក្នុងឃុំព្រែកខ្សាច់ ស្រុកគីរីសាគរ ខេត្តកោះកុង។
ចំណែកក្រុមពលរដ្ឋនៅស្រុកអូរជ្រៅ ខេត្តបន្ទាយមានជ័យ ក៏កំពុងប្រមូលស្នាមេដៃដាក់ទៅខុទ្ទកាល័យនាយរដ្ឋមន្រ្តី ក្រសួង យុត្តិធម៌ និងស្ថាប័នផ្សេងទៀត ដើម្បីសុំអន្តរាគមន៍ដោះលែងតំណាងរបស់ពួកគេម្នាក់ឈ្មោះ ឡុង សុគន្ធី ដែលកំពុងជាប់ពន្ធ នាគារដោយសារជម្លោះដីធ្លីជាមួយអ្នកមានលុយមានអំណាចក្នុងខេត្តនេះ។
ពលរដ្ឋខេត្តបន្ទាយមានជ័យម្នាក់លោក លឹម ឈុនទ្រី និយាយថា ករណីតុលាការឃុំខ្លួនតំណាងពួកគេនោះជារឿងអយុត្តិធម៌ដោយថា តំណាងរូបនោះមិនបានប្រព្រឹត្តកំហុសដូចការចោទប្រកាន់នោះទេ។
ពលរដ្ឋខេត្តបន្ទាយមានជ័យម្នាក់លោក លឹម ឈុនទ្រី
សកម្មជនដីធ្លីម្នាក់នៅខេត្តបន្ទាយមានជ័យអ្នកស្រី ឡុង គន្ធី ត្រូវបានតុលាការខេត្តនេះ កាត់ទោសឲ្យជាប់ពន្ធនាគារ១ឆ្នាំជុំវិញ ជម្លោះដីធ្លីក្នុងសហគមន៍ជាមួយឧកញ៉ា និងមន្ត្រីធំៗមួយចំនួននៅក្នុងខេត្តបន្ទាយមានជ័យ។
ដូចគ្នានេះដែរ ពលរដ្ឋមានជម្លោះដីធ្លីនៅសហគមន៍មួយក្នុងខេត្តព្រះសីហនុ ក៏ពុងពិភាក្សារគ្នាដើម្បីរកកិច្ចអន្តរាគមន៍ឲ្យមានការដោះលែងតំណាងពួកគេដែរ។
ប្រធានសមាគមដីធ្លីខេត្តព្រះសីហនុលោក ស៊ុន សុផាត ប្រាប់វីអូឌីថា នៅថ្ងៃនេះពួកគាត់ និងសហគមន៍កំពុងពិភាក្សាគ្នានៅឡើយ ដោយមិនទាន់សម្រេចថា ធ្វើយ៉ាងណានៅឡើយទេ។
តំណាងអ្នកភូមិម្នាក់ គឺអ្នកស្រី ឡុច ទូច និងពលរដ្ឋ៣នាក់ទៀតនៅឃុំអូរត្រេះ ស្រុកស្ទឹងហាវ ខេត្តព្រះសីហនុ ត្រូវបានតុលាការខេត្តនេះសម្រេចឃុំខ្លួនបណ្តោះអាសន្ន បន្ទាប់ពីមានជម្លោះជាមួយឧកញ៉ាម្នាក់ ឈ្មោះ តាន់ តាត់។
អ្នកនាំពាក្យក្រសួងយុត្តិធម៌លោក ជិន ម៉ាលីន មានប្រសាន៍ថា ការលើកលែងទោស គឺមានយន្តការពីរ ដោយថា ទី១ការលើកលែងទោសទូទៅ ដោយ១ឆ្នាំធ្វើ៣ដង និងមានការវាយតម្លៃលក្ខខណ្ឌគ្រប់ជ្រុងជ្រោយពីភាគីពាក់ព័ន្ធ ដែលករណីនេះរៀបចំឡើងដោយក្រសួងយុត្តិធម៌។ ប៉ុន្តែលោកថា ករណីលោកនាយករដ្ឋមន្រ្តី ហ៊ុន សែន ប្រកាសលើកលែងទោសដល់ទណ្ឌិតពេលថ្មីៗនេះជាករណីពិសេស ហើយថា ការដោះលែងពលរដ្ឋមានជម្លោះដីធ្លី ឬ ទណ្ឌិតណាម្នាក់នោះ វាអាស្រ័យលើការសម្រេចរបស់នាយករដ្ឋមន្រ្តី។
អ្នកនាំពាក្យក្រសួងយុត្តិធម៌លោក ជិន ម៉ាលីន
ប្រធានផ្នែកគ្រប់គ្រងផ្នែកអង្កេតនៅអង្គការលីកាដូ លោក អំ សំអាត មានប្រសាន៍ថា អ្នកដែលជាប់ពន្ធនាគារដោយសារជម្លោះដីធ្លីទាំងនោះគួរតែទទួលបានការលើកលែងទោស ដោយថា កន្លងមកលោកនាយករដ្ឋមន្រ្តីធ្លាប់មានប្រសាសន៍ថា មិនឲ្យ ពលរដ្ឋណាម្នាក់ជាប់ពន្ធនាគារដោយសារដីធ្លីនោះទេ។
ប្រធានផ្នែកគ្រប់គ្រងផ្នែកអង្កេតនៅអង្គការលីកាដូ លោក អំ សំអាត
ក្នុងពិធីសំណេះសំណាលជាមួយក្រុមកម្មករនៅខេត្តកណ្តាលកាលសប្តាហ៍មុន លោក ហ៊ុន សែន មានប្រសាសន៍ថា លោកនឹងសុំបន្ធូបន្ទាយ និងលើកលែងទោសដល់ទណ្ឌិតក្នុងទ្រុងទ្រាយធំនៅរដូវបុណ្យទានខាងមុខនេះ ដោយថា នឹងធ្វើឡើង៤ដង ក្នុងឆ្នាំនេះ ដូចជាពីធីបុណ្យភ្ជុំបិណ្ឌ បុណ្យអុំទូក បុណ្យឯករាជ្យជាតិ និងបុណ្យបញ្ចប់សង្គ្រាមតាមនយោបាយឈ្នះៗរបស់លោក ដែលនឹងត្រូវរៀបចំឡើងនៅនៅចុងឆ្នាំនេះ៕