សុខភាព

សមាគមមួយបារម្ភពីជំងឺប៉េសជ្រូកអាហ្វ្រិកដែលអាចរាលដាលមកកម្ពុជា

ដោយ វីអូឌី
| ២៩ សីហា ២០១៨
ម៉ោង ១៦:៤៦

កសិដ្ឋានចិញ្ចឹមជ្រូកមួយកន្លែង (រូបភាព៖ វេបសាយបរទេស)

សមាគមចិញ្ចឹមជ្រូកស្នើឲ្យសមត្ថកិច្ចពាក់ព័ន្ធពង្រឹងការត្រួតពិនិត្យនិងទប់ស្កាត់ពិពេសនៅតាមព្រំដែនជាប់ប្រទេសជិតខាងដោយបារម្ភថា ជំងឺប៉េសជ្រូកអាហ្រ្វិកអាចនឹងឆ្លងរាលដាលដល់កម្ពុជា។

ប្រធានសមាគមអ្នកចិញ្ចឹមសត្វជ្រូកកម្ពុជា លោក ស៊្រុន ពៅ បានឲ្យដឹងថា លោកមានការព្រួយបារម្ភខ្លាំងនិងបានប្រកាសឲ្យប្រជាកសិករ ក៏ដូចជាកសិដ្ឋានឲ្យមានការប្រុងប្រយ័ត្នខ្ពស់។

ផ្តាំផ្ញើហើយ ប្រកូកប្រកាសទៀត តាមក្រុម តាមអីទាំងអស់ឲ្យបងប្អូនប្រជាកសិករ ក៏ដូចជាកសិដ្ឋានឲ្យមានការប្រុងប្រយ័ត្នខ្ពស់ ជាពិសេសគឺសុំស្នើដល់ក្នុងនាមសមត្ថកិច្ចដែលត្រួតពិនិត្យតាមព្រំដែន តាមច្រកចូល សុំពិនិត្យឲ្យបានម៉ត់ចត់ ឲ្យបានត្រឹមត្រូវ

ប្រធានសមាគមអ្នកចិញ្ចឹមសត្វជ្រូកកម្ពុជា លោក ស៊្រុន ពៅ

តាមការចុះផ្សាយរបស់អង្គការស្បៀងអាហារ និងកសិកម្ម (FAO) កាលពីម្សិលមិញឲ្យដឹងថា ជំងឺប៉េសជ្រូកអាហ្វ្រិក (African Swine Fever) ត្រូវបានគេរកឃើញថាកំពុងតែរីករាលដាលយ៉ាងលឿននៅក្នុងប្រទេសចិន និងអាចរីករាលដាលដល់ប្រទេសផ្សេងទៀតនៅតំបន់អាស៊ី។

ជុំវិញបញ្ហានេះ លោក សេន សុវណ្ណ អគ្គនាយកនៃអគ្គនាយកដ្ឋានសុខភាពសត្វ និងផលិតកម្មសត្វនៃកសិកម្ម បានឲ្យដឹងថា ប៉េសជ្រូកអាហ្វ្រិកនេះមិនទាន់មានការរាលដាលដល់កម្ពុជានោះទេ ហើយលោកនឹងត្រៀមរៀបចំប្រជុំទ្វេភាគីជាមួយប្រទេសជិតខាងអំពីវិធានការជុំវិញជំងឺនេះផងដែរ។

ហានិភ័យនៅកម្ពុជាមានដរាបណាមានករណីនេះនៅប្រទេសថៃ ឬមួយនៅប្រទេសវៀតណាម ចឹងយើងក្នុងសប្តាហ៍ក្រោយនេះ ខ្ញុំមានរៀបចំប្រជុំទ្វេភាគីជាមួយនឹងអគ្គនាយកដ្ឋានសុខភាពសត្វ និងអភិវឌ្ឍន៍បសុសត្វរបស់ថៃ ហើយនឹងខែក្រោយនេះ ខ្ញុំនឹងប្រជុំទ្វេភាគីនឹងនាយកដ្ឋានសុខភាពសត្វប្រទេសវៀតណាម។

លោក សេន សុវណ្ណ អគ្គនាយកនៃអគ្គនាយកដ្ឋានសុខភាពសត្វ និងផលិតកម្មសត្វនៃកសិកម្ម

បើតាមអង្គការស្បៀងអាហារ និងកសិកម្ម ជំងឺប៉េសជ្រូកអាហ្វ្រិក មិនបង្កផលប៉ះពាល់ដោយផ្ទាល់ដល់សុខភាពមនុស្សទេ។ ប៉ុន្តែ ពុំមានវ៉ាក់សាំងណាមួយដែលអាចចាក់ការពារជ្រូកមិនឲ្យឆ្លងនិងកើតជំងឺនេះឡើយ។ ជ្រូកដែលឆ្លងជំងឺនេះ ១០០ភាគរយនឹងត្រូវងាប់តែម្តង។

រក្សាសិទ្វិគ្រប់យ៉ាងដោយ ស៊ីស៊ីអាយអឹម

សូមបញ្ជាក់ថា គ្មានផ្នែកណាមួយនៃអត្ថបទ រូបភាព សំឡេង និងវីដេអូទាំងនេះ អាចត្រូវបានផលិតឡើងវិញក្នុងការបោះពុម្ពផ្សាយ ផ្សព្វផ្សាយ ការសរសេរឡើងវិញ ឬ ការចែកចាយឡើងវិញ ដោយគ្មានការអនុញ្ញាតជាលាយលក្ខណ៍អក្សរឡើយ។
ស៊ីស៊ីអាយអឹម មិនទទួលខុសត្រូវចំពោះការលួចចម្លងនិងចុះផ្សាយបន្តណាមួយ ដែលខុស នាំឲ្យយល់ខុស បន្លំ ក្លែងបន្លំ តាមគ្រប់ទម្រង់និងគ្រប់មធ្យោបាយ។ ជនប្រព្រឹត្តិ និងអ្នកផ្សំគំនិត ត្រូវទទួលខុសត្រូវចំពោះមុខច្បាប់កម្ពុជា និងច្បាប់នានាដែលពាក់ព័ន្ធ។