មន្ត្រីនគរបាលជាតិ បានឲ្យដឹងថា ភ្នាក់ងារសន្តិសុខឯកជន បានចូលរួមបង្ក្រាបបទល្មើសដល់ទៅជាង ២ពាន់ករណីនៅក្នុងរយៈពេល៣ឆ្នាំចុងក្រោយមកនេះ។
ប្រធាននាយកដ្ឋានគ្រប់គ្រងសន្តិសុខឯកជន នៃនគរបាលជាតិ លោក លឹម សុខារស្មី ត្រូវបានគេហទំព័រនគរបាលជាតិដកស្រង់សម្ដី ដែលបានថ្លែងថា ភ្នាក់ងារសន្ដិសុខឯកជន បានសហការជាមួយសមត្ថកិច្ចបង្ការ និងបង្រ្កាបបទល្មើសបានជាង ២០០០ករណី នៅតាមគោលដៅសំខាន់ៗដែលពួកគេបានយាមកាម។
បើតាមគេហទំព័រនគរបាលជាតិ មន្ត្រីនគរបាលរូបនេះបានអះអាងបែបនេះក្នុងពិធីបើកវគ្គបំប៉នជំនាញភ្នាក់ងារសន្ដិសុខឯកជននៅថ្ងៃនេះ។
មន្ត្រីនគរបាលរូបនេះ បានប្រាប់វីអូឌីបន្ថែមថា ក្នុងរយៈពេល ៣ឆ្នាំចុងក្រោយនេះ ក្រុមសន្តិសុខឯកជន បានចូលរួមបង្ក្រាបបទល្មើសតូចតាច ដូចជា លួច ឆក់ឥវ៉ាន់ជាដើម។
លោកបានបន្ថែមថា ភ្នាក់ងារសន្ដិសុខឯកជនមានសិទ្ធិឃាត់ខ្លួនជនល្មើស និងបង្រ្កាបបទល្មើសជាក់ស្ដែង ប៉ុន្ដែ ត្រូវផ្ដល់ព័ត៌មានដល់សមត្ថកិច្ចភ្លាមៗ៕
