អាជ្ញាធរពន្ធដារកម្ពុជា បានក្រើនរម្លឹកដល់ម្ចាស់អចលនទ្រព្យនៅទូទាំងប្រទេស ឲ្យទៅបង់ពន្ធសម្រាប់ឆ្នាំ២០១៨នេះ ឲ្យបានមុនពេលផុតកំណត់ ដោយថា ដើម្បីបញ្ចៀសការពិន័យ។
ក្នុងសេចក្តីជូនដំណឹងកាលពីម្សិលមិញ អគ្គនាយកដ្ឋានពន្ធដារ បានប្រាប់ទៅម្ចាស់អចលនទ្រព្យទាំងនៅភ្នំពេញ និងខេត្តទាំងអស់ ឲ្យប្រញាប់ទៅប្រកាសបង់ពន្ធឲ្យបានមុនថ្ងៃទី៣០ កញ្ញាដែលជាថ្ងៃផុតកំណត់។
អគ្គនាយកដ្ឋានពន្ធដារ បន្តថា មានម្ចាស់អចលនទ្រព្យមួយចំនួននៅមិនទាន់បានបំពេញកាតព្វកិច្ចប្រកាសបង់ពន្ធប្រភេទនេះនៅឡើយទេ។
ក្នុងសេចក្តីជូនដំណឹងដដែល អគ្គនាយកដ្ឋានពន្ធដារបានបញ្ជាក់ថា ចំពោះការខកខានមិនបានដាក់លិខិតប្រកាសបង់ពន្ធទាន់ពេលកំណត់ ម្ចាស់អចលនទ្រព្យនឹងត្រូវរងទោសទណ្ឌតាមច្បាប់។
តួលេខចំណូលពន្ធកាលពីឆ្នាំ២០១៧ របស់អគ្គនាយកដ្ឋានពន្ធដារកម្ពុជា បានបង្ហាញថា ចំណូលពន្ធអចលនទ្រព្យបានកើនឡើង ៩ភាគរយ បើធៀបទៅនឹងឆ្នាំ២០១៦កន្លងមក។
ពន្ធដែលត្រូវប្រមូលពីអចលនទ្រព្យនេះ តម្រូវតែលើអចលនទ្រព្យដែលមានតម្លៃលើសពី ១០០,០០០,០០០(មួយរយលាន)រៀល។ អចលនទ្រព្យ សំដៅដល់ ដី ផ្ទះ អគារ និងសំណង់ ផ្សេងៗដែលសង់ភា្ជប់នឹងដីនោះ។
ពន្ធនេះត្រូវប្រមូលប្រចាំឆ្នាំតាមអត្រា ០,១% (សូន្យក្បៀសមួយភាគរយ) លើតម្លៃអចលនទ្រព្យ។ តម្លៃ ដី ផ្ទះ អគារ និងសំណង់ផ្សេងៗដែលសង់ភ្ជាប់នឹងដីនោះ ត្រូវកំណត់តាមតម្លៃទីផ្សារដោយ គណៈកម្មាការវាយតម្លៃអចលនទ្រព្យដែលបង្កើតដោយប្រកាសរបស់រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ៕
