ប្រជាសហគមន៍ជនជាតិភាគតិចទំពូននៅក្នុងខេត្តរតនគិរី ចោទអាជ្ញាធរមូលដ្ឋានថា បានញុះញុងប្រជាពលរដ្ឋឲ្យចូលរួមលក់ដីព្រៃដែនជម្រសត្វជាង ២០០ហិកតានៅក្នុងស្រុកលំផាត់ ទៅឲ្យក្រុមហ៊ុនឯកជន។
ក្នុងពាក្យបណ្ដឹងរបស់ប្រជាសហគមន៍ជនជាតិដើមភាគតិចទំពូនចុះថ្ងៃទី៣១ ខែសីហា ឆ្នាំ២០១៨ ដែលប្ដឹងទៅព្រះរាជអាជ្ញាខេត្តរតនគិរីនោះ តំណាងសហគមន៍ជនជាតិដើមភាគតិចទំពូន លោក ឆន ផល្លា បានរៀបរាប់ថា មេភូមិសាមុត្រក្រោម លោក ខាំ ផសាវ៉ាត និងអនុភូមិ លោក ប៊ុន ធានសឿន រួមជាមួយប្រធានសហគមន៍សាមុត្រក្រោម លោក ថាន់ ម្លែល បានកោះហៅប្រជាពលរដ្ឋភូមិសាមុត្រក្រោមចំនួន ១៣៣នាក់ឲ្យទៅចូលរួមក្នុងប្រជុំ។
ក្នុងកិច្ចប្រជុំនោះ មេភូមិ អនុភូមិ និងប្រធានសហគមន៍សាមុត្រក្រោម បានសួរទៅកាន់ប្រជាពលរដ្ឋថា ដីនេះលក់ ឬមិនលក់ ហើយបើលក់ ពួកគាត់នឹងឲ្យឈ្នួញមកមើលដីនេះ ក្នុងតម្លៃ ៣០០ដុល្លារក្នុង ១ហិកតា។
តំណាងសហគមន៍ជនជាតិភាគតិចទំពូន លោក ឆន ផល្លា ដែលអះអាងថាចូលរួមប្រជុំផងដែរនោះ បានលើកឡើងថា លោកបានដាក់ពាក្យបណ្ដឹងនេះទៅតុលាការរួចហើយ ពាក់ព័ន្ធនឹងអាជ្ញាធរភូមិបានប្រាប់ពួកគាត់លក់ដី ប៉ុន្តែ ប្រសិនបើប្រជាពលរដ្ឋមិនព្រមលក់ទេ ក្រុមហ៊ុននឹងយកដីដែនជម្រសត្វនោះ។
តំណាងសហគមន៍ជនជាតិភាគតិចទំពូន លោក ឆន ផល្លា
ប្រធានភូមិសាមុត្រក្រោម លោក ខាំ ផសាវ៉ាត បានច្រានចោលការចោទប្រកាន់នេះ ដោយថា នៅក្នុងកិច្ចប្រជុំកាលពីថ្ងៃទី៣០ ខែសីហាកន្លងទៅ លោកមិនបាននិយាយឲ្យប្រជាពលរដ្ឋលក់ដីព្រៃដែនជម្រសត្វព្រៃនោះទេ។
ប្រធានភូមិសាមុត្រក្រោម លោក ខាំ ផសាវ៉ាត
វីអូឌីមិនអាចសុំការអត្ថាធិប្បាយលោក ប៊ុនធាន សឿន និងលោក ថាន់ ម្លែល បានទេ ពាក់ព័ន្ធនឹងការចោទប្រកាន់នេះ។
ព្រះរាជអជ្ញាអមសាលាដំបូងខេត្តរតនគិរី លោក ជា ពេជ្រ មានប្រសាសន៍ថា លោកមិនទាន់ទទួលបានពាក្យបណ្ដឹងរបស់ក្រុមប្រជាពលរដ្ឋនៅឡើយ។
ព្រះរាជអជ្ញាអមសាលាដំបូងខេត្តរតនគិរី លោក ជា ពេជ្រ
អភិបាលខេត្តរតនគិរី លោក ថង សាវុន ពុំបានស្រាយបំភ្លឺជុំវិញបញ្ហានេះទេ ដោយលោកប្រាប់ថា កំពុងជាប់រវល់ប្រជុំ។
អ្នកនាំពាក្យក្រសួងបរិស្ថានលោក សៅ សុភាព បានប្រាប់វីអូឌីតាមប្រព័ន្ធតេឡេក្រាមថា មន្ទីរបរិស្ថាន និងអាជ្ញាធរខេត្តរតនគិរី បានទទួលព័ត៌មានស្ដីពីបញ្ហានេះហើយ ហើយលោកថា ស្ថាប័នទាំងពីរនេះ កំពុងតែសហការជាមួយព្រះរាជអាជ្ញាខេត្ត ដើម្បីចាត់វិធានការលើករណីនេះ។
អ្នកនាំពាក្យក្រសួងបរិស្ថានលោក សៅ សុភាព
មន្ត្រីសម្របសម្រួលនៃសមាគមការពារសិទ្ធិមនុស្សអាដហុកប្រចាំខេត្តរតនគិរី លោក ឌិន ខន្នី សាទរចំពោះចំណាត់ការនេះ ប៉ុន្តែលោកស្នើទៅក្រសួងឲ្យពន្លឿនដំណោះស្រាយបញ្ហាជាច្រើនទៀត។
មន្ត្រីសម្របសម្រួលនៃសមាគមការពារសិទ្ធិមនុស្សអាដហុកប្រចាំខេត្តរតនគិរី លោក ឌិន ខន្នី
ក្នុងពាក្យបណ្ដឹងរបស់សហគមន៍ជនជាតិដើមភាគតិចទំពូន បានអះអាងថា ដីដែនជម្រសត្វព្រៃដែលអាជ្ញាធរភូមិ និងប្រធានសហគមន៍ ឲ្យប្រជាពលរដ្ឋលក់នោះ មានទំហំ ២៦០ហិកតា ស្ថិតនៅចំណុចភ្នំអាក ភូមិសាមុត្រក្រោម ឃុំសេដា ស្រុកលំផាត់។
ដែនជម្រកសត្វព្រៃលំផាត់ស្ថិតក្នុងស្រុកលំផាត់ ខេត្តរតនគិរី និងស្រុកកោះញែក ខេត្តមណ្ឌលគិរី ដែលមានផ្ទៃដីជាង ២៥ម៉ឺនហិកតា ហើយត្រូវបានចេញអនុក្រឹត្យកំណត់ជាតំបន់អភិរក្សកាលពីឆ្នាំ២០១៧៕