តំណាងពលរដ្ឋមានជម្លោះដីធ្លី ស្នើទៅអាជ្ញាធរខេត្តកណ្តាល ឲ្យបន្តសម្របសម្រួល និងពន្លឿនដោះស្រាយបញ្ចប់វិវាទដីធ្លីជូនពួកគេ ខណៈការចចាររកដំណោះស្រាយនៅថ្ងៃនេះ ពលរដ្ឋមិនព្រមទទួលយកសំណង ដោយថា សំណងនោះមានចំនួនតិចតួចពេក។
តំណាងពលរដ្ឋចំនួន ២០នាក់ មកពីស្រុកកណ្ដាលស្ទឹង ត្រូវបានអាជ្ញាធរខេត្តកណ្ដាល ហៅទៅជួបប្រជុំ ដើម្បីស្វែងរកដំណោះស្រាយជុំវិញវិវាទដីធ្លីជាមួយក្រុមហ៊ុនមួយចំនួនដែលទទួលបានសិទ្ធិវិនិយោគលើដីនៅក្នុងស្រុកនេះ ហើយប៉ះពាល់ដល់ដីធ្លីរបស់អ្នកភូមិ។
តំណាងពលរដ្ឋម្នាក់លោក ភោគ ផាន់នី ប្រាប់វីអូឌីក្រោយចប់ប្រជុំថា អ្នកភូមិទាមទារសំណង ១គ្រួសារ៧០០ដុល្លារ ប៉ុន្តែ ការចចារនៅថ្ងៃនេះ គឺអាជ្ញាធរសម្រេចផ្តល់សំណងគោលនយោបាយឲ្យអ្នកភូមិ ១នាក់ ៥០ដុល្លារ ដែលលោកថា ចំនួននេះតិចតួចពេកមិនអាចទទួលយកបាន។
តំណាងពលរដ្ឋម្នាក់លោក ភោគ ផាន់នី
លោក ភោគ ផាន់នី ឲ្យដឹងថា ដីដែលក្រុមអ្នកភូមិកំពុងមានជម្លោះជាមួយបណ្តាក្រុមហ៊ុន និងឈ្មួញនោះជាដីរួមរបស់សហគមន៍ ដោយថា ត្រូវបានពលរដ្ឋមួយចំនួន និងអាជ្ញាធរមូលដ្ឋានឃុបឃិតគ្នាលក់ទៅឲ្យក្រុមហ៊ុនវិនិយោគឯកជន។
អភិបាលខេត្តកណ្តាលលោក ម៉ៅ ភិរុណ មានប្រសាសន៍ថា ក្រុមពលរដ្ឋដែលមកតវ៉ានោះ គឺស្នើសុំសំណងគោលនយោបាយ ដែលអាជ្ញាធរសម្របសម្រួលទៅ គឺភាគីក្រុមហ៊ុនសម្រេចផ្តល់សំណងជាគោលនយោបានម្នាក់ ៥០ដុល្លារ។
លោកបន្តថា អាជ្ញាធរមិនអាចសម្របសម្រួលឲ្យបានលើសពីនេះនោះទេ ដោយថា ដីនោះមានប័ណ្ណកម្មសិទ្ធិត្រឹមត្រូវដែលកាន់កាប់ដោយក្រុមហ៊ុនឯកជន។
អភិបាលខេត្តកណ្តាលលោក ម៉ៅ ភិរុណ
ជុំវិញវិវាទ និងភាពស្មុគស្មាញនៃជម្លោះដីធ្លីនេះ លោក ម៉ៅ ភិរុណ បានស្តីបន្ទោសទៅមន្រ្តីថ្នាក់ក្រោមដែរ ដោយថា ចេះតែចុះហត្ថលេខា និងធ្វើប័ណ្ណកម្មសិទ្ធិទាំងមិនចុះវាស់វែង ដោយសារទទួលលុយពីអ្នកពាក់ព័ន្ធទាំងនោះ ប៉ុន្តែ អភិបាលខេត្តរូបនេះមិនប្រាប់ថា មានក្រុមហ៊ុន និងបុគ្គលណាខ្លះជាប់ពាក់ព័ន្ធក្នុងជម្លោះដីធ្លីនេះទេ។
លោក ម៉ៅ ភិរុណ ឲ្យដឹងថា នៅឃុំអំពៅព្រៃមានពលរដ្ឋ ២១២០គ្រួសារ និងមានមនុស្ស ៨៧៨២នាក់ ប៉ុន្តែ លោកថា មានមនុស្សតែ ៧៨៤៤នាក់ដែលត្រូវទទួលសំណងគោលនយោបាយម្នាក់ ៥០ដុល្លារ ខណៈអ្នកផ្សេងទៀតមានឈ្មោះជាប់ពាក់ព័ន្ធលក់ដីនោះរួចទៅហើយ។
អ្នកភូមិរាប់រយនាក់នៅឃុំអំពៅព្រៃ បានប្រមូលផ្ដុំគ្នាតវ៉ានៅមុខសាលាខេត្តកណ្ដាលកាលពីខែមិថុនាកន្លងមក ដើម្បីស្វែងរកដំណោះស្រាយជុំវិញវិវាទដីធ្លីរបស់ពួកគេ ដែលក្រុមអ្នកភូមិបានចោទអាជ្ញាធរមូលដ្ឋានថា បានលួចលក់ដីទំហំ ៤០០ហិកតា ទៅឲ្យក្រុមហ៊ុនវិនិយោគឯកជន៕
