កសិកម្ម

កម្ពុជាបញ្ជូននិសិ្សតជាង២០០នាក់ទៅសិក្សាផ្នែកកសិកម្មនៅប្រទេសអ៊ីស្រាអែល

លោក ហ៊ុន សិរីវឌ្ឍន៍
| ០៤ កញ្ញា ២០១៨
ម៉ោង ១០:៣០

លោក វេង សាខុន បានអញ្ជើញជាអធិបតីភាពក្នុងពិធីសំណេះសំណាលជាមួយនិស្សិតកម្មសិក្សាជំនាន់ទី១១ ក្នុងនោះមាននិស្សិតមកពីសាកលវិទ្យាល័យភូមិន្ទកសិកម្ម ថ្ងៃទី ០៣ កញ្ញា ២០១៨ (រូបភាព៖ វេបសាយក្រសួងកសិកម្ម)

និសិ្សតកម្ពុជាជាង២០០នាក់នឹងត្រូវបានបញ្ជូនទៅបំពេញកម្មសិក្សារយៈពេលជិត១ឆ្នាំនៅប្រទេសអ៊ីស្រាអែល តាមរយៈកិច្ចសហប្រតិបត្តិការអន្តរជាតិជាមួយក្រុមហ៊ុនសិក្សាកសិកម្ម Agro-studies របស់អ៊ីស្រាអែល។

លោកវេង សាខុន បានសរសេរក្នុងហ្វេសបុករបស់លោកកាលពីម្សិលមិញថា ជារៀងរាល់ឆ្នាំសាកលវិទ្យាល័យភូមិន្ទកសិកម្ម និងសាលាជាតិកសិកម្មបានបញ្ជូននិស្សិតឆ្នាំទី៣ ដែលកំពុងសិក្សាឲ្យទៅចូលរួមធ្វើកម្មសិក្សារយៈពេល១១ខែ នៅប្រទេសអ៊ីស្រាអែល ដែលនៅឆ្នាំ២០១៨នេះមាននិស្សិតចំនួន២១០នាក់ ក្នុងនោះស្រី៣៧នាក់នឹងត្រូវបញ្ជូនឲ្យទៅសិក្សា។

បើតាមលោកវេង សាខុន និសិ្សត២១០នាក់នោះមាននិស្សិតសាលាជាតិកសិកម្មព្រែកលៀប ១០នាក់ សាលាជាតិកសិកម្មកំពង់ចាម ១០នាក់ និងសាកលវិទ្យាល័យភូមិន្ទកសិកម្ម ១៩០នាក់។

សាកលវិទ្យាធិការនៃសាកលវិទ្យាល័យភូមិន្ទកសិកម្ម លោកង៉ោ ប៉ុនថាន មានប្រសាសន៍ប្រាប់ VOD ថានិស្សិតដែលបានទៅធ្វើកម្មសិក្សានៅអ៊ីស្រាអែលនោះនឹងត្រូវបែងចែកជា៦ក្រុមចេញដំណើរពីកម្ពុជាចាប់ពីថ្ងៃទី ៤ កញ្ញា ដល់ថ្ងៃទី៦ តុលា។ លោកបញ្ជាក់ថាក្រុមហ៊ុន Agro-studies ជាអ្នកទទួលបន្ទុក រកសាកលវិទ្យាល័យឲ្យនិស្សិតកម្ពុជាសិក្សា និងកសិដ្ឋានដល់និស្សិតឲ្យធ្វើការ ហើយនិស្សិតកម្ពុជាអាចទទួលបានចំណេះដឹង និងប្រាក់ខែបានតាមរយៈនៃការធ្វើកម្មសិក្សានេះ។

និស្សិតយើងទៅនៃគឺត្រូវបង់លុយខ្លួនឯង ទិញសំបុត្រយន្តហោះទៅខ្លួនឯង ។ ហើយទៅដល់នោះក្រុមហ៊ុន គេយកទៅដាក់តាមកសិដ្ឋានដែលធ្វើការហ្នឹង ហើយនឹងយកមករៀននៅសកលវិទ្យាល័យ អញ្ចឹងនិស្សិតដែលទៅធ្វើការបានលុយហើយ។ គាត់អាចកាត់កងបង់ចូលសាលាប៉ុន្មានអញ្ចឹងទៅ ហើយសល់ប៉ុន្មានគាត់អាចទុកចាយខ្លួនគាត់។ អញ្ចឹងអត់មានអ្នកណាជួយអ្នកណាទេ ក្រុមហ៊ុនក៏គេបានចំណេញ យើងក៏បានចំណេះ និងសញ្ញាប័ត្រត្រលប់មកវិញផង

សាកលវិទ្យាធិការនៃសាកលវិទ្យាល័យភូមិន្ទកសិកម្ម លោកង៉ោ ប៉ុនថាន

លោក ង៉ោ ប៉ុនថាន បានបន្ថែមថាតាមរយៈការចុះកម្មសិក្សានេះនឹងធ្វើនិស្សិតកម្ពុជាបានទទួលការហាត់ពត់លត់ដំខ្លួន រួមជាមួយចំណេះដឹងកសិកម្មទំនើបរបស់អ៊ីស្រាអែល និងពង្រឹងភាសាអង់គ្លេសរបស់ខ្លួនផងដែរ។

ទីប្រឹក្សាមជ្ឈមណ្ឌលសិក្សា និងអភិវឌ្ឍន៍កសិកម្មកម្ពុជាហៅកាត់ថាសេដាកលោក សម វិទូ យល់ថាជារឿងល្អដល់និស្សិតកម្ពុជាដែលអាចទទួលបាននូវអ្វីថ្មីលើវិស័យកសិកម្មបន្ថែមពីការសិក្សាដែលមាននៅកម្ពុជា។

យើងឃើញហើយថា អ៊ីស្រាអែលមានការរីកចំរើនលើវិស័យកសិកម្មជាខ្លាំង ព្រោះថាអ៊ីស្រាអែលដីរបស់គេអត់មានជីវជាតិក៏ដោយតែគេអាចដាំដុះដំណាំ ហើយអាចនាំចេញទៀត។ តែមិនថាតែប្រទេសអ៊ីស្រាអែលទេ! គួរទៅប្រទេសណាដែលមានលក្ខណៈល្អជាងយើងដែលយើងអាចរៀនសូត្រពីគេបាន ដូចជាកសិកម្មនៅប្រទេសថៃ នៅវៀតណាមដែលជិតៗយើង ដែលមានលក្ខណៈភូមិសាស្ត្រអីប្រហាក់ប្រហែលស្រដៀងយើង រឿងហ្នឹងក៏ជាការដែលជួយឲ្យនិស្សិតទទួលបានទាំងចំណេះដឹងទ្រឹស្តី និងការអភិវឌ្ឍ

ទីប្រឹក្សាមជ្ឈមណ្ឌលសិក្សា និងអភិវឌ្ឍន៍កសិកម្មកម្ពុជាហៅកាត់ថាសេដាកលោក សម វិទូ

ចាប់ពីឆ្នាំ២០០៨ មកមាននិស្សិតកម្ពុជាចំនួន ៦៨០នាក់ហើយដែលបានទៅធ្វើកម្មសិក្សានៅប្រទេសអ៊ីស្រាអែលតាមកិច្ចសហប្រតិបត្តិការណ៍ជាមួយក្រុមហ៊ុន Agro-studies នេះ៕

រក្សាសិទ្វិគ្រប់យ៉ាងដោយ ស៊ីស៊ីអាយអឹម

សូមបញ្ជាក់ថា គ្មានផ្នែកណាមួយនៃអត្ថបទ រូបភាព សំឡេង និងវីដេអូទាំងនេះ អាចត្រូវបានផលិតឡើងវិញក្នុងការបោះពុម្ពផ្សាយ ផ្សព្វផ្សាយ ការសរសេរឡើងវិញ ឬ ការចែកចាយឡើងវិញ ដោយគ្មានការអនុញ្ញាតជាលាយលក្ខណ៍អក្សរឡើយ។
ស៊ីស៊ីអាយអឹម មិនទទួលខុសត្រូវចំពោះការលួចចម្លងនិងចុះផ្សាយបន្តណាមួយ ដែលខុស នាំឲ្យយល់ខុស បន្លំ ក្លែងបន្លំ តាមគ្រប់ទម្រង់និងគ្រប់មធ្យោបាយ។ ជនប្រព្រឹត្តិ និងអ្នកផ្សំគំនិត ត្រូវទទួលខុសត្រូវចំពោះមុខច្បាប់កម្ពុជា និងច្បាប់នានាដែលពាក់ព័ន្ធ។