ធនាគារអេស៊ីលីដាប្រកាសបង្កើនដើមទុនជាង៣០លានដុល្លារបន្ថែមទៀត បន្ទាប់ពីជោគជ័យក្នុងមុខជំនួញរបស់ខ្លួន និងធានាដល់ហានិភ័យរបស់ធនាគារ។
ក្នុងសេចក្តីប្រកាសព័ត៌មានចុះថ្ងៃទី៣ ខែកញ្ញា ធនាគារអេស៊ីលីដាបានលើកឡើងថាស្ថាប័ននេះបានចាក់បញ្ចូលដើមទុនបន្ថែមចំនួន ៣៦ ៦៧៩ ១៤៩ដុល្លារ បន្ថែមទៅលើដើមទុនដែលមានស្រាប់ ៣៥៨ ៥៤៤ ៩៥៦ ដុល្លារ ដែលធ្វើឲ្យដើមទុនរបស់អេស៊ីលីដាបច្ចុប្បន្នកើនឡើងដល់ជិត៤០០លានដុល្លារ។
ប្រធានក្រុមប្រឹក្សាភិបាលនៃធនាគារអេស៊ីលីដាលោក ឆាយ សឿន បានលើកឡើងក្នុងសេចក្តីប្រកាសនោះថាមូលហេតុដែលធនាគារសម្រេចបង្កើនដើមទុនឲ្យកើនដល់ជិត៤០០លានដុល្លារនេះដោយសារអាជីវកម្មរបស់ធនាគារនេះមានការរីកចំរើន ហើយត្រូវរក្សាមូលដ្ឋានដើមទុនធនាគារឲ្យមានកំរិតនៃការប្រុងប្រយ័ត្នខ្ពស់ ក៏ដូចជាបង្កើនទំនុកចិត្តរបស់អតិថិជនរបស់ធនាគារផងដែរ។
បើតាមអេស៊ីលីដា នេះគឺជាលើកទី ១៥ ហើយដែលធនាគារនេះបង្កើនដើមទុនចុះបញ្ជីរបស់ខ្លួនចាប់តាំងពីស្ថាប័ននេះបានក្លាយខ្លួនជាធនាគារមួយនៅឆ្នាំ២០០០មក៕