គិតត្រឹមថ្ងៃនេះ មេដឹកនាំអតីតគណបក្សសង្គ្រោះជាតិ លោក កឹម សុខា ត្រូវបានអាជ្ញាធរចាប់ដាក់ឃុំនៅឯពន្ធនាគារត្រពាំងផ្លុងអស់រយៈពេល ១ឆ្នាំ និង ២ថ្ងៃរួចមកហើយ ចាប់តាំងពីលោកត្រូវបានចាប់ខ្លួនកាលពីយប់ថ្ងៃទី៣ ខែកញ្ញាឆ្នាំមុន ក្រោមការចោទប្រកាន់ពីរដ្ឋាភិបាលថា «ក្បត់ជាតិ»។
បើយើងត្រឡប់ទៅក្រោយបន្តិចតែប៉ុន្មានថ្ងៃប៉ុណ្ណោះមុនសេចក្ដីសម្រេចបែបនេះរបស់តុលាការនោះ សកម្មជននយោបាយអតីតគណបក្សសង្គ្រោះជាតិ ១១រូប អតីតតំណាងរាស្ត្របក្សប្រឆាំងលោក អ៊ុំ សំអាន អតីតអ្នកសារព័ត៌មានអាស៊ីសេរី ២នាក់ អ្នកវិភាគនយោបាយលោក គឹម សុខ និងសកម្មជនដីធ្លីបឹងកក់ អ្នកស្រី ទេព វន្នី សុទ្ធតែត្រូវបានដោះលែងឲ្យមានសេរីភាពជាបន្តបន្ទាប់កាលពីចុងខែសីហាកន្លងមកនេះ ក្រោយពីត្រូវបានព្រះមហាក្សត្រលើកលែងទោស តាមការស្នើសុំពីលោកនាយករដ្ឋមន្ត្រី ហ៊ុន សែន។
តែសម្រាប់ករណីលោក កឹម សុខា វិញ មិនត្រឹមតែត្រូវបានចាប់ដាក់ឃុំបណ្ដោះអាសន្នអស់រយៈពេល ១ឆ្នាំរួចមកហើយនោះទេ មេដឹកនាំអតីតបក្សប្រឆាំងដ៏ធំរបស់កម្ពុជារូបនេះ ត្រូវបានតុលាការសម្រេចបន្តឃុំខ្លួនរូបលោកនៅក្នុងពន្ធនាគារត្រពាំងផ្លុងរយៈពេល ៦ខែបន្ថែមទៀត បើទោះបីជាមានការស្នើសុំពីក្រុមមេធាវីការពាររូបលោក ឲ្យដោះលែងលោកនៅក្រៅឃុំក៏ដោយ។
សេចក្ដីសម្រេចពីរដែលផ្ទុយគ្នាបែបនេះ បានជំរុញឲ្យមានការចោទសួរថា តើហេតុអ្វីបានជាមេដឹកនាំអតីតគណបក្សសង្គ្រោះជាតិ លោក កឹម សុខា មិនត្រូវបានដោះលែងឲ្យនៅក្រៅឃុំ ឬក៏មិនត្រូវបានលើកលែងទោសទៅវិញ?
វាពិបាកនឹងឆ្លើយថា តើមានមូលហេតុអ្វីឲ្យប្រាកដបានជាលោក កឹម សុខា មិនត្រូវបានដោះលែងឲ្យស្ថិតនៅក្រៅឃុំ ឬក៏មិនត្រូវបានលើកលែងទោសដូចអ្នកដទៃទៀតនោះ។
ទោះជាយ៉ាងណា មានចំណុចខ្លះៗ អាចទាញឲ្យយកមកពិនិត្យមើល ដើម្បីស្វែងយល់អំពីសំណុំរឿងលោក កឹម សុខា ពោលគឺការពិនិត្យលើនីតិវិធីច្បាប់ និងទិដ្ឋភាពនយោបាយនៅកម្ពុជា។
តាមនីតិវិធីច្បាប់ ការលើកលែងទោសដល់លោក កឹម សុខា ពិតជាមិនអាចធ្វើទៅបាននោះឡើយ ខណៈដែលសំណុំរឿងលោក មិនទាន់ត្រូវបានជំនុំជម្រះវិនិច្ឆ័យទោសនៅឡើយ និងស្ថិតនៅក្នុងដំណាក់កាលបណ្ដឹងជំទាស់នីតិវិធីឃុំខ្លួនចាប់ពីសាលាដំបូងរហូតដល់តុលាការកំពូល។
មួយវិញទៀត នៅពេលសំណុំរឿងនេះត្រូវបាននាំទៅជំនុំជម្រះ លោក កឹម សុខា ក៏អាចស្ថិតនៅក្រោមការឃុំខ្លួនបន្តទៀត អំឡុងពេលតស៊ូក្ដីនៅតុលាការគ្រប់ជាន់ថ្នាក់ ចាប់ពីសាលាដំបូងរហូតដល់តុលាការកំពូលផងដែរ ប្រសិនបើក្រុមមេធាវី និងលោក កឹម សុខា សម្រេចប្ដឹងជំទាស់នឹងសេចក្ដីសម្រេចរបស់តុលាការថ្នាក់ក្រោម ដាក់ទោសរូបលោកនោះ។
បន្ទាប់ពីនីតិវិធីតុលាការត្រូវបានបញ្ចប់ទាំងស្រុង កូនសោរលើកលែងទោសលោក កឹម សុខា ឲ្យមានសេរីភាពឡើងវិញ ស្ថិតនៅលើលោកនាយករដ្ឋមន្ត្រី ហ៊ុន សែន ថា តើលោកនឹងទូលថ្វាយព្រះមហាក្សត្រ ឲ្យលើកលែងទោសដល់លោក កឹម សុខា ឬក៏យ៉ាងណា។
ចំណុចមួយដែលជាក់ច្បាស់នោះគឺថា គេដឹងរួចទៅហើយថា លោក កឹម សុខា នឹងមិនត្រូវបានដោះលែងឲ្យនៅក្រៅឃុំនោះឡើយ ពោលនឹងត្រូវជាប់ឃុំខ្លួនបន្តទៀត បន្ទាប់ពីលោកនាយករដ្ឋមន្ត្រី ហ៊ុន សែន បានថ្លែងជាសាធារណៈកាលពីថ្ងៃទី២៩ ខែសីហាថា គ្មាននរណាដោះលែងលោក កឹម សុខា នោះឡើយ ដែលការថ្លែងលោក ហ៊ុន សែន កើតឡើងមួយថ្ងៃមុនការសាកសួរលោក កឹម សុខា នៅឯពន្ធនាគារត្រពាំងផ្លុង។
លោកនាយករដ្ឋមន្ត្រី ហ៊ុន សែន
នាយិកាអង្គការសីលកា អ្នកស្រី ធីតា ឃឹះ បានបង្ហាញនូវការយល់ឃើញថា លោក កឹម សុខា គឺជាអ្នកនយោបាយមានជំហររឹងមាំ និងទទួលបានការគាំទ្រពីប្រជាពលរដ្ឋយ៉ាងទូលំទូលាយនៅទូទាំងប្រទេស ដែលជាមូលហេតុមួយជំរុញឲ្យការដោះលែងរូបលោក ជួបប្រទះនូវបញ្ហាលំបាក។
នាយិកាអង្គការសីលកា អ្នកស្រី ធីតា ឃឹះ
ក្រៅពីមើលឃើញដូចទៅនឹងអ្នកស្រី ធីតា ឃឹះ ហើយនោះ នាយកប្រតិបត្តិនៃអង្គការតម្លាភាពកម្ពុជា លោក ព្រាប កុល បានបង្ហាញនូវទស្សនៈរបស់លោកថា ការចោទប្រកាន់ទៅលើលោក កឹម សុខា គឺជាសំណុំរឿងដ៏ធំ ដែលចាំបាច់ត្រូវមានហេតុផលសមរម្យ ដើម្បីធានាថា សហគមន៍អន្តរជាតិ មើលឃើញថា ការចាប់ខ្លួនមេដឹកនាំបក្សប្រឆាំងរូបនេះ សមហេតុសមផល។
នាយកប្រតិបត្តិនៃអង្គការតម្លាភាពកម្ពុជា លោក ព្រាប កុល
លោក ព្រាប កុល មានប្រសាសន៍បន្ថែមថា៖
នាយកប្រតិបត្តិនៃអង្គការតម្លាភាពកម្ពុជា លោក ព្រាប កុល
ទោះជាយ៉ាងណា ទាំងអ្នកស្រី ធីតា ឃឹះ និងលោក ព្រាប កុល សុទ្ធតែជឿជាក់ថា កូនសោរសម្រាប់ដំណោះស្រាយបញ្ហានយោបាយកម្ពុជានាពេលសព្វថ្ងៃនេះ គឺស្ថិតនៅក្នុងដៃលោកនាយករដ្ឋមន្ត្រី ហ៊ុន សែន ខណៈដែលសម្ពាធពីសហគមន៍អន្តរជាតិ ជាពិសេសការព្រមានដកហូតប្រព័ន្ធអនុគ្រោះពន្ធពីកម្ពុជា នឹងជំរុញឲ្យមេដឹកនាំកម្ពុជាពិចារណាឡើងវិញ វិលទៅរកដំណោះស្រាយបញ្ចប់បញ្ហានយោបាយនេះ៕