ធនាគារកណ្ដាលកម្ពុជា បានសម្រេចលុបចោលអាជ្ញាប័ណ្ណពីស្ថាប័នផ្ដល់កម្ចីនៅតាមជនបទជិត ៣០ មិនឲ្យធ្វើប្រតិបត្តិការផ្ដល់កម្ចីឥណទានដល់ប្រជាពលរដ្ឋកម្ពុជា ឆ្លើយតបទៅតាមការស្នើសុំរបស់បណ្ដាគ្រឹះស្ថានទាំងនោះ។
ក្នុងសេចក្តីប្រកាសព័ត៌មានចុះថ្ងៃទី៥ កញ្ញា ធនាគារជាតិបានសម្រេចដកអាជ្ញាប័ណ្ណគ្រឹះស្ថានឥណទាន ២ និងបញ្ឈប់គ្រឹះស្ថានឥណទានជនបទចំនួន ២៤ផ្សេងទៀត តាមសំណើរបស់គ្រឹះស្ថានទាំងនោះ។
អគ្គនាយកដ្ឋានត្រួតពិនិត្យធនាគារជាតិនៃកម្ពុជា បានបដិសេធផ្តល់ព័ត៌មានបន្ថែមដល់ VOD ដោយតម្រូវឲ្យដាក់លិខិតផ្លូវការដល់ស្ថាប័ននេះ។
ប្រធានគ្រប់គ្រងធនធានមនុស្សនៃអង្គការបង្អែកជីវភាពសហគមន៍ កញ្ញា បាន សីហា បានបញ្ជាក់ប្រាប់VOD នៅថ្ងៃនេះថា ការស្នើឲ្យធនាគារជាតិបញ្ឈប់ប្រតិបត្តិការនេះ គឺដោយសារអង្គការបានសម្រេចបញ្ឈប់ការផ្តល់ឥណទានរបស់ខ្លួនទៅឲ្យអតិថិជន។
ប្រធានគ្រប់គ្រងធនធានមនុស្សនៃអង្គការបង្អែកជីវភាពសហគមន៍ កញ្ញា បាន សីហា
ប្រធានគ្រប់គ្រងទូទៅនៃគ្រឹះស្ថានអន្តនហ្វាយនែន ភី.អិល.ស៊ី លោក រ៉ា វី មានប្រសាសន៍ថា គ្រឹះស្ថានរបស់លោកបានស្នើសុំបញ្ឈប់ប្រតិបត្តិការឥណទាន បន្ទាប់ពីស្ថាប័នលោកទទួលការខូចខាតច្រើន ក្រោយការកំណត់ពិដានអត្រាការប្រាក់ពីសំណាក់រដ្ឋាភិបាលកាលពីឆ្នាំមុន។
ប្រធានគ្រប់គ្រងទូទៅនៃគ្រឹះស្ថានអន្តនហ្វាយនែន ភី.អិល.ស៊ី លោក រ៉ា វី
អ្នកជំនាញសេដ្ឋកិច្ច លោក យ៉ង ប៉ាក់ យល់ថា ការប្រកាសបញ្ឈប់ប្រតិបត្តិការណ៍នេះ គឺជារឿងមិនល្អសម្រាប់វិស័យមីក្រូហិរញ្ញវត្ថុនៅកម្ពុជាដោយលោកថា ពលរដ្ឋនៅជនបទនឹងងាកទៅរកអ្នកចងការប្រាក់ដែលមានអត្រាការប្រាក់ខ្ពស់ជាងស្ថាប័នទាំងនេះ តែលោកសង្ឃឹមថា រដ្ឋាភិបាលតាមរយៈធនាគារអភិវឌ្ឍន៍ជនបទ អាចទប់ទល់បានជាមួយនឹងរបត់ថ្មីនេះ។
អ្នកជំនាញសេដ្ឋកិច្ច លោក យ៉ង ប៉ាក់
លោកនាយករដ្ឋមន្រី្តហ៊ុន សែន បានលើកឡើងកាលពីដើមខែមុនថា ធនាគារសម្រាប់គាំទ្រដល់សហគ្រាសធុនតូច និងមធ្យមដែលមានដើមទុនជាង ១០០លានដុល្លារ នឹងជិតចេញជាផ្លូវការហើយ ដើម្បីគាំទ្រដល់កសិករកម្ពុជា។
ធនាគារកណ្ដាលកម្ពុជា បានសម្រេចកំណត់ពិដានអត្រាការប្រាក់ត្រឹមតែ ១៨ភាគរយក្នុងមួយឆ្នាំ កាលពីខែមីនាឆ្នាំមុន ដោយថា ដើម្បីការពារផលប្រយោជន៍ពលរដ្ឋ កាត់បន្ថយបំណុលវ័ណ្ឌករ និងជម្រុញឲ្យមានការប្រើប្រាស់ឥណទានឲ្យមានប្រសិទ្ធភាព ប៉ុន្តែ ក្រុមអ្នកសេដ្ឋកិច្ចវិញយល់ថា វានឹងធ្វើឲ្យប៉ះពាល់ធ្ងន់ធ្ងរដល់ស្ថាប័នផ្តល់កម្ចី និងពលរដ្ឋ៕