កម្ពុជានាំអង្ករចេញបានជាង៣៤ម៉ឺនតោនក្នុងរយៈពេល៨ខែថយចុះជិត៩%

កម្ពុជានាំអង្ករចេញបានចំនួនជាង៣៤ម៉ឺនតោន គិតក្នុងរយៈពេល៨ខែ ឆ្នាំ២០១៨នេះ ទៅកាន់ទីផ្សារលើពិភពលោកហើយចិនជាប្រទេសដែលកម្ពុជានាំទៅបានចំនួនច្រើនជាងគេ។

យោងតាមរបាយការណ៍ស្តីពីស្ថានភាពនាំអង្ករចេញរបស់លេខាធិការដ្ឋានច្រកចេញចូលតែមួយដែលVODទទួលបាន ឲ្យដឹងថា គិតចាប់ពីខែមករាដល់ខែសីហាឆ្នាំនេះ បរិមាណនាំចេញអង្កររបស់កម្ពុជាសម្រេចបានប្រមាណ៣៤១ ៦៣៨តោនទៅកាន់ទីផ្សារទិសដៅចំនួន៥៩ប្រទេស ក្នុងនោះចិនឈរលំដាប់លេខទីមួយ មានចំនួនជាង៧៤ពាន់តោន បន្ទាប់មកបារាំងជាង៥១ពាន់តោន និងម៉ាឡេស៊ីជាង២៤ពាន់តោន គឺជាប្រទេសដែលបានបញ្ជាទិញអង្ករច្រើនជាងគេពីកម្ពុជា។

របាយការណ៍ដដែលឲ្យដឹងដែរថា ការនាំចេញនេះថយចុះ ៨,៩% ក្នុងរយៈពេលដូចគ្នាប្រៀបធៀបនឹងឆ្នាំមុន។

ប្រភេទអង្ករដែលកម្ពុជានាំចេញក្នុងរយៈពេល៨ខែនេះមានដូចជា ប្រភេទអង្ករក្រអូប អង្ករសគ្រាប់វែង និងអង្ករចំហុយគ្រាប់វែង។