នាយកដ្ឋាននគរបាលការពារអះអាងថា រយៈពេល៦ខែដើមឆ្នាំ២០១៨នេះ ខ្លួនបានបំពេញភារកិច្ចប្រកបដោយប្រសិទ្ធភាពនិងការទទួលខុសត្រូវ ដោយថា បានសម្រេចជោគជ័យ។
គេហទំព័រអគ្គស្នងការដ្ឋាននគរបាលជាតិកាលពីម្សិលមិញឲ្យដឹងថា ក្នុងរយៈពេល៦ខែឆ្នាំ២០១៨នេះ នាយកដ្ឋាននគរបាលការពារ បានចូលរួមការពារសុវត្ថិភាព សន្តិសុខ សណ្តាប់ធ្នាប់ក្នុងយុទ្ធនាការឃោសនារកសំឡេងឆ្នោត និងការប្រព្រឹត្តទៅនៃការបោះឆ្នោតជ្រើសតាំងតំណាងរាស្រ្តនីតិកាលទី៦ និងសុវត្ថិភាព សន្តិសុខ សណ្តាប់ធ្នាប់ ជូនបណ្តាគោលដៅទាំង៩៩។
គេហទំព័រដដែលបន្តថា ជាពិសេសស្ថាប័ននយោបាយ សេដ្ឋកិច្ច វប្បធម៌ និវេសដ្ឋានឥស្សរជនជាន់ខ្ពស់ ស្ថានទូត និវេសដ្ឋានឯកអគ្គរាជទូត រដ្ឋទូត គណៈប្រតិភូអន្តរជាតិដែលអញ្ជើញមកទស្សនកិច្ច និងពិធីបុណ្យជាតិ អន្តរជាតិបានសម្រេចជោគជ័យគួរជាទីមោទនៈក្រៃលែង ។
ទោះជាយ៉ាងណាក្នុងការងារធានាសុវត្ថិភាព សន្តិសុខ សណ្តាប់ធ្នាប់២៤ម៉ោងលើ២៤ម៉ោង នៅតាមបណ្តាគោលដៅសំខាន់ៗដូចជា ស្ថាប័នរដ្ឋ ស្ថានទូត និវេសដ្ឋានឯកអគ្គរាជទូត រដ្ឋទូត កើតមានបញ្ហាមិនប្រក្រតីឬសភាពការណ៍សន្តិសុខចំនួន៥៩លើក ក្នុងនោះស្ថាប័នរដ្ឋចំនួន៣៦លើក និងស្ថានទូត និវេសដ្ឋានឯកអគ្គរាជទូត រដ្ឋទូតចំនួន២៣លើក ។
