ក្រសួងអប់រំ យុវជន និងកីឡា បានប្រកាសថា សិស្សប្រឡងជាប់បាក់ឌុបនៅឆ្នាំនេះ មានការកើនឡើងជាងឆ្នាំមុន ពោលគឺសិស្សប្រឡងជាប់មានចំនួនជាង ៦៦ភាគរយ ប៉ុន្តែ ចំនួនសិស្សទទួលបាននិទ្ទេស A បានថយចុះដល់ទៅជាង ៣០ភាគរយ។
ក្នុងសេចក្ដីប្រកាសព័ត៌មាននៅថ្ងៃនេះ ក្រសួងអប់រំ យុវជន និងកីឡា បានលើកឡើងថា បេក្ខជនប្រឡងជាប់នៅទូទាំងប្រទេសមានចំនួន ៧៥ ០៥៩នាក់ ឬស្មើនឹង ៦៦.២១ភាគរយ ក្នុងចំណោមបេក្ខជនដាក់ពាក្យប្រឡងសរុប ១១៥ ២៦៨នាក់ ពោលគឺច្រើនជាងឆ្នាំ២០១៧ ដែលមានចំនួន ៦៣.៨៤ភាគរយ។
ក្រសួងអប់រំឲ្យដឹងទៀតថា សិស្សទទួលបាននិទ្ទេស A មានចំនួន ២៩០នាក់ សិស្សនិទ្ទេស B មានចំនួន ១ ៥៣២នាក់ សិស្សនិទ្ទេស C មានចំនួន ៤ ៦៣១នាក់ សិស្សនិទ្ទេស D មានចំនួន ១៣ ៩៩៩នាក់ និងសិស្សនិទ្ទេស E មានចំនួន ៥៤ ៦០៧នាក់។
ចំនួនសិស្សប្រឡងជាប់ទទួលបាននិទ្ទេស A បានធ្លាក់ចុះពីចំនួន ៤២៤នាក់នៅឆ្នាំ២០១៧កន្លងមក មកនៅត្រឹម ២៩០នាក់នៅឆ្នាំនេះ ពោលគឺបានធ្លាក់ចុះដល់ទៅជាង ៣១ភាគរយ៕
