ក្រុមអង្គការអន្ដរជាតិដែលធ្វើការលើផ្នែកសិទ្ធិមនុស្ស បានរិះគន់ថា រដ្ឋាភិបាលរបស់លោកនាយករដ្ឋមន្ដ្រី ហ៊ុន សែន កំពុងស្វែងរកការទទួលស្គាល់ពីសហគមន៍អន្ដរជាតិតាមរយៈការដោះលែងមេដឹកនាំអតីតគណបក្សប្រឆាំងលោក កឹម សុខា ឲ្យមានសេរីភាពវិញ។
លោក កឹម សុខា ត្រូវបានសាលាដំបូងរាជធានីភ្នំពេញសម្រេចដោះលែងឲ្យនៅក្រៅឃុំជាបណ្ដោះអាសន្ន នៅវេលាម៉ោង ៣ទៀបភ្លឺថ្ងៃទី១០កញ្ញានេះ បន្ទាប់ពីលោកត្រូវបានឃុំខ្លួននៅពន្ធនាគារត្រពាំងផ្លុង ខេត្តត្បូងឃ្មុំ អស់រយៈជាង ១ឆ្នាំមកនោះ។
ប៉ុន្ដែ ក្នុងសេចក្ដីថ្លែងការណ៍នៅថ្ងៃនេះ ក្រុមសមាជិកសភាអាស៊ានដើម្បីសិទ្ធិមនុស្ស (APHR) ហៅការដោះលែងលោក កឹម សុខា នេះថា ធ្វើឡើងក្រោមហេតុផលនយោបាយ បន្ទាប់ពីគណបក្សប្រជាជនកម្ពុជារបស់លោក ហ៊ុន សែន បានក្ដោបក្ដាប់អាសនៈទាំងអស់ក្នុងរដ្ឋសភា និងបង្កើតជារដ្ឋាភិបាលដឹកនាំដោយសភាឯកបក្ស។
ក្រុមសមាជិកសភាអាស៊ានដើម្បីសិទ្ធិមនុស្ស លើកឡើងក្នុងសេចក្ដីថ្លែងការណ៍ទៀតថា រដ្ឋាភិបាលលោក ហ៊ុន សែន កំពុងតែស្វែងរកភាពស្របច្បាប់របស់ខ្លួន តាមរយៈការដោះលែងលោក កឹម សុខា ឲ្យមានសេរីភាព ហើយថា នេះក៏បង្ហាញថា រដ្ឋាភិបាលដឹកនាំដោយគណបក្សប្រជាជនកម្ពុជា កំពុងតែរំលោភអំណាចដើម្បីកេងចំណេញនយោបាយរបស់ខ្លួនផងដែរ។
ក្នុងសេចក្ដីថ្លែងការណ៍មួយនៅថ្ងៃនេះផងដែរ អនុប្រធានអង្គការឃ្លាំមើលសិទ្ធិមនុស្សអន្ដរជាតិប្រចាំនៅតំបន់អាស៊ី លោក Phil Robertson យល់ថា កម្ពុជាមិនអាចស្ដារលទ្ធិប្រជាធិបតេយ្យឡើងវិញនោះទេ ប្រសិនបើតុលាការមិនទម្លាក់បទចោទប្រកាន់លើលោក កឹម សុខា បើកឲ្យមន្ដ្រីអតីតបក្សប្រឆាំង ១១៨រូប មានសិទ្ធិធ្វើនយោបាយ និងអនុញ្ញាតឲ្យអតីតគណបក្សសង្គ្រោះជាតិអាចដំណើរការឡើងវិញ។
បន្ទាប់ពីកម្ពុជាបានបញ្ចប់ការបោះឆ្នោតជ្រើសតាំងតំណាងរាស្ដ្រីនីតិកាលទី៦ឆ្នាំ២០១៨ ដែលគ្មានវត្តមានចូលរួមរបស់អតីតគណបក្សសង្គ្រោះជាតិ ហើយលោក កឹម សុខា ក៏កំពុងជាប់ឃុំនាពេលនោះ ក្រុមប្រទេសលោកសេរីមួយចំនួននាំមុខដោយសហភាពអឺរ៉ុប និងសហរដ្ឋអាមេរិក រិះគន់ថា មិនអាចទទួលយកបាននោះឡើយ។
បន្ថែមលើសពីនេះ ក្រុមប្រទេសលោកសេរីទាំងនោះក៏មិនបានចាត់តាំងតំណាងស្ថានទូតរបស់ខ្លួនទៅចូលរួមកិច្ចប្រជុំសភាលើកដំបូងរបស់គណបក្សប្រជាជនកម្ពុជា កាលពីថ្ងៃទី៥ខែកញ្ញាទៀតផង៕
