អតីតគណបក្សប្រឆាំង និងក្រុមសិទ្ធិមនុស្សអន្ដរជាតិ បានជំរុញទៅរដ្ឋាភិបាលកម្ពុជា ឲ្យស្ដារលទ្ធិប្រជាធិបតេយ្យឡើងវិញ បន្ទាប់ពីមេដឹកនាំបក្សប្រឆាំង ត្រូវបានតុលាការដោះលែងបណ្ដោះអាសន្ន ប៉ុន្ដែ អ្នកនាំពាក្យគណបក្សកាន់អំណាចថា មិនអាចទៅរួច។
លោក កឹម សុខា ត្រូវបានសាលាដំបូងរាជធានីភ្នំពេញសម្រេចដោះលែងឲ្យនៅក្រៅឃុំនៅម៉ោងប្រមាណ ៣ទៀបភ្លឺថ្ងៃទី១០ ខែកញ្ញានេះ បន្ទាប់ពីលោកត្រូវបានឃុំខ្លួននៅពន្ធនាគារត្រពាំងផ្លុង ខេត្តត្បូងឃ្មុំ អស់រយៈជាង ១ឆ្នាំមកនោះ។
អ្នកនាំពាក្យសាលាដំបូងរាជធានីភ្នំពេញ បានអះអាងក្នុងសេចក្ដីប្រកាសព័ត៌មាននៅថ្ងៃនេះថា លោក កឹម សុខា ត្រូវបានដោះលែងក្រោមហេតុផលសុខភាពរបស់លោក និងមានការធានាថា លោកមិនអាចគេចពីនីតិវិធីរបស់តុលាការ។
ក្នុងដីកាសម្រេចកាលពីថ្ងៃម្សិលមិញនេះ លោក កឹម សុខា ត្រូវបានតុលាការហាមឃាត់មិនឲ្យចាកចេញពីលំនៅឋានដោយគ្មានការអនុញ្ញាតពីតុលាការ ត្រូវឆ្លើយតបចំពោះការកោះហៅពីគ្រប់បុគ្គលដែលចាត់តាំងដោយចៅក្រមស៊ើបសួរ មិនអាចទាក់ទងជាមួយថ្នាក់ដឹកនាំអតីតបក្សប្រឆាំង ជនបរទេស ឬបុគ្គលដែលពាក់ព័ន្ធនឹងសំណុំរឿង និងមិនអាចជួបជុំគ្នាក្នុងគោលដៅធ្វើសកម្មភាពនយោបាយណាមួយនោះឡើយ។
ក្រៅពីសាទរចំពោះការដោះលែងដៃគូនយោបាយលោកឲ្យស្ថិតនៅក្រៅឃុំបណ្ដោះអាសន្នហើយនោះ អតីតប្រធានគណបក្សសង្គ្រោះជាតិ លោក សម រង្ស៊ី បានថ្លែងនៅក្នុងកិច្ចប្រជុំមួយនៅប្រទេសកាណាដានៅថ្ងៃនេះថា វាមិនទាន់គ្រប់គ្រាន់នៅឡើយទេ ក្នុងការស្រោចស្រង់លទ្ធិប្រជាធិបតេយ្យនៅកម្ពុជាឲ្យរស់ឡើងវិញ។
លោក សម រង្ស៊ី ថ្លែងថា ជំហានបន្ទាប់នោះ គឺរដ្ឋាភិបាលរបស់លោក ហ៊ុន សែន ត្រូវអនុញ្ញាតឲ្យអតីតគណបក្សសង្គ្រោះជាតិរស់ឡើងវិញ អនុញ្ញាតឲ្យមន្ដ្រីអតីតបក្សប្រឆាំង១១៨រូបមានសិទ្ធិធ្វើនយោបាយ និងទាមទារឲ្យមានការបោះឆ្នោតម្ដងទៀត ដោយមានការចូលរួមពីអតីតគណបក្សប្រឆាំង និងការចូលរួមពីអន្ដរជាតិ។
អតីតប្រធានគណបក្សសង្គ្រោះជាតិ លោក សម រង្ស៊ី
នៅថ្ងៃនេះផងដែរ អង្គការអន្ដរជាតិចំនួន២ គឺក្រុមសមាជិកសភាអាស៊ានដើម្បីសិទ្ធិមនុស្ស (APHR) និងអង្គការឃ្លាំមើលសិទ្ធិមនុស្សអន្ដរជាតិ Human Rights Watch ក៏ទាមទារឲ្យទម្លាក់បទចោទប្រកាន់ទាំងអស់លើលោក កឹម សុខា ដោយថា ដើម្បីស្ដារលទ្ធិប្រជាធិបតេយ្យនៅកម្ពុជាឡើងវិញ។
ក្នុងសេចក្ដីថ្លែងការណ៍នោះ ក្រុមសមាជិកសភាអាស៊ានដើម្បីសិទ្ធិមនុស្ស ហៅការដោះលែងលោក កឹម សុខា នេះថា ធ្វើឡើងក្រោមហេតុផលនយោបាយ បន្ទាប់ពីគណបក្សកាន់អំណាចរបស់លោក ហ៊ុន សែន បានក្ដោបក្ដាប់អាសនៈទាំងអស់ក្នុងរដ្ឋសភា និងបង្កើតរដ្ឋាភិបាលដឹកនាំដោយសភាឯកបក្ស។
ក្រុមសមាជិកសភាអាស៊ានដើម្បីសិទ្ធិមនុស្ស លើកឡើងទៀតថា រដ្ឋាភិបាលរបស់លោក ហ៊ុន សែន កំពុងតែស្វែងរកភាពស្របច្បាប់ តាមរយៈការដោះលែងលោក កឹម សុខា ហើយថា នេះបង្ហាញថា រដ្ឋាភិបាលដឹកនាំដោយគណបក្សប្រជាជនកម្ពុជា កំពុងតែរំលោភអំណាច ដើម្បីកេងចំណេញនយោបាយរបស់ខ្លួន។
អ្នកនាំពាក្យគណបក្សប្រជាជនកម្ពុជា លោក សុខ ឥសាន មានប្រសាសន៍ថា ការដោះលែងលោក កឹម សុខា ឲ្យនៅក្រៅឃុំនេះ គឺជាការសម្រេចរបស់តុលាការ ដែលមើលទៅលើស្ថានភាពជំងឺរបស់ជនជាប់ចោទ។ ប៉ុន្ដែ លោកថា ចំពោះការទាមទារឲ្យគណបក្សសង្គ្រោះជាតិរស់ឡើងវិញ ឬរៀបចំការបោះឆ្នោតម្ដងទៀតនោះ គឺមិនអាចទៅរួចនោះទេ។
អ្នកនាំពាក្យគណបក្សប្រជាជនកម្ពុជា លោក សុខ ឥសាន
យ៉ាងណាក៏ដោយ ការដោះលែងមេដឹកនាំអតីតគណបក្សប្រឆាំងលោក កឹម សុខា ក៏ត្រូវបានគេមើលឃើញថា ធ្វើឡើងនៅមុនកិច្ចប្រជុំមួយនៅសភាសហភាពអឺរ៉ុប ដែលគ្រោងជជែកពីបញ្ហាសិទ្ធិមនុស្ស និងការបន្ដឃុំខ្លួនលើលោក កឹម សុខា នាថ្ងៃទី១៣ ខែកញ្ញាខាងមុខនេះ។
ចំណែកឯអ្នករាយការណ៍ពិសេសអង្គការសហប្រជាជាតិទទួលបន្ទុកកិច្ចការសិទ្ធិមនុស្សប្រចាំកម្ពុជា លោកស្រី រ៉ូណា ស្មីត ក៏បានដាក់របាយការណ៍បន្ថែមមួយទៀត ដែលនិយាយពីការបោះឆ្នោត បញ្ហាសិទ្ធិមនុស្ស និងលទ្ធិប្រជាធិបតេយ្យ ជូនទៅក្រុមប្រឹក្សាសិទ្ធិមនុស្សអង្គការសហប្រជាជាតិ កាលពីថ្ងៃទី៧ ខែកញ្ញានេះ។
របាយការណ៍របស់លោកស្រី រ៉ូណា ស្មីត នឹងស្ថិតនៅលើរបៀបវារៈទី១០ នៃកិច្ចប្រជុំក្រុមប្រឹក្សាសិទ្ធិមនុស្សអង្គការសហប្រជាជាតិលើកទី៣៩ ដែលនឹងធ្វើឡើងចាប់ពីថ្ងៃទី១០ ដល់ថ្ងៃទី២៨ ខែកញ្ញា។
ប្រធានអតីតគណបក្សសង្គ្រោះជាតិ លោក កឹម សុខា បានជាប់ឃុំក្នុងពន្ធនាគារអស់រយៈជាង១ឆ្នាំ ក្រោមការចោទប្រកាន់ពីសំណាក់រដ្ឋាភិបាលថា «ក្បត់ជាតិ» ពាក់ព័ន្ធនឹងការថ្លែងសារនយោបាយរបស់លោកនៅប្រទេសអូស្ដ្រាលី កាលពីឆ្នាំ២០១៣៕
