ពលរដ្ឋមួយចំនួន បង្ហាញក្តីបារម្ភអំពីគុណភាពនៃការផ្តល់សេវារបស់មន្ទីរពេទ្យគន្ធបុប្ផា បន្ទាប់ពីស្ថាបនិកមន្ទីរពេទ្យមួយនេះ បានទទួលមរណភាព។
ស្ថាបនិកនៃមន្ទីរពេទ្យគន្ធបុប្ផា លោកវេជ្ជបណ្ឌិត Beat Richner បានទទួលមរណភាពក្នុងជន្មាយុ ៧១ឆ្នាំ នៅប្រទេសស្វីស ប្រទេសកំណើតរបស់គាត់ កាលពីម្សិលមិញ បន្ទាប់ពីគាត់ទ្រាំទ្រនឹងជំងឺជាយូរមកហើយ។
ពេលផ្តល់បទសម្ភាសន៍ជាមួយសារព័ត៌មានវីអូឌី ខណៈកំពុងយកកូនតូចៗទៅព្យាលនៅមន្ទីរពេទ្យគន្ធបុប្ផាសាខាជិតព្រះបរមរាជវាំង ពលរដ្ឋរស់នៅទីក្រុងភ្នំពេញ លោក ជឹម វុទ្ធី រៀបរាប់ថា លោកពិតជាមានការតក់ស្លុត និងសោកស្តាយបំផុត ពេលលឺដំណឹងថា អ្នកគ្រប់គ្រងមន្ទីរពេទ្យគន្ធបុប្ផា លោកវេជ្ជបណ្ឌិត Beat Richner បានទទួលមរណភាព។
ពលរដ្ឋម្នាក់រស់នៅទីក្រុងភ្នំពេញ លោក ជឹម វុទ្ធី
បុរសវ័យ៤១ឆ្នាំរូបនេះ បង្ហាញក្តីបារម្ភថា ពេលអត់ពីស្ថាបនិកនៃមន្ទីរពេទ្យនេះទៅ មិនដឹងជាការផ្តល់សេវា និងការគ្រប់គ្រងមន្ទីរពេទ្យនេះបានល្អដូចមុន ឬអត់នោះទេ។
ពលរដ្ឋម្នាក់រស់នៅទីក្រុងភ្នំពេញ លោក ជឹម វុទ្ធី
មកពីខេត្តកំពង់ចាមដែលយកកូនមកព្យាបាលជំងឺទឹកនោមប្រៃនៅមន្ទីរពេទ្យគន្ធបុប្ផាសាខាជិតព្រះបរមរាជវាំងដែរនោះ អ្នកស្រី លន់ ធឹម និយាយថា ពេលដែលកូនគាត់ឈឺម្តងៗ គឺបានមន្ទីរពេទ្យមួយនេះហើយដែលជួយសង្គ្រោះជីវិតឲ្យរួចផុតពីការស្លាប់។
អ្នកស្រី លន់ ធឹម ពលរដ្ឋមកពីខេត្តកំពង់ចាម
ស្រ្តីវ័យ ៥០ឆ្នាំរូបនេះ ក៏បានបង្ហាញការសោកស្តាយចំពោះការបាត់បង់លោក Beat Richner ពីមន្ទីរពេទ្យគន្ធបុប្ផាផងដែរ ដោយថា ពេលអត់ពីរូបគាត់ទៅ ការផ្តល់សេវា និងជំនួយផ្សេងៗរបស់មន្ទីរពេទ្យមួយនេះ ប្រហែលមិនដូចមុនទៀតនោះទេ។
អ្នកស្រី លន់ ធឹម ពលរដ្ឋមកពីខេត្តកំពង់ចាម
មកពីខេត្តតាកែវ អ្នកស្រី ឈាវ សុភ័ណ្ឌ យកកូនមកព្យាលជំងឺនៅមន្ទីរពេទ្យគន្ធបុប្ផាសាខាជិតវត្តភ្នំ បានរៀបរាប់ថា ការផ្តល់សេវារបស់ក្រុមគ្រូពេទ្យ និងថ្នាំព្យាបាលរបស់មន្ទីរពេទ្យគន្ធបុប្ផានាពេលកន្លងមក បានល្អប្រសើរខ្លាំងណាស់ បើប្រៀបធៀបជាមួយមន្ទីរពេទ្យរដ្ឋផ្សេងៗ។
អ្នកស្រី ឈាវ សុភ័ណ្ឌ បានស្នើទៅមន្ទីរពេទ្យមួយនេះ ឲ្យនៅតែបន្តផ្តល់សេវា និងឧបត្ថម្ភដល់កុមារកម្ពុជាបែបនេះជារៀងរហូត បើទោះជា គ្មានវត្តមានលោកវេជ្ជបណ្ឌិត Beat Richner គ្រប់គ្រង និងដឹកនាំតទៅទៀត។
មកពីខេត្តតាកែវ អ្នកស្រី ឈាវ សុភ័ណ្ឌ
យកកូនមកព្យាយជំងឺបេះដូងអ្នកស្រី ប៊ូ សុភាកញ្ញា មានស្រុកកំណើតនៅខេត្តកំពង់ឆ្នាំង បានសុំទៅរដ្ឋាភិបាលឲ្យបន្តជួយគាំទ្រមន្ទីរពេទ្យគន្ធបុប្ផា ដោយផ្តល់ជំនួយជាថវិកា សម្ភារៈ ដោយធ្វើយ៉ាងឲ្យការផ្តល់សេវាព្យាបាលរបស់មន្ទីរពេទ្យមួយនេះ មានគុណភាពជារៀងរហូត។
អ្នកស្រី ប៊ូ សុភាកញ្ញា មានស្រុកកំណើតនៅខេត្តកំពង់ឆ្នាំង
ក្នុងពិធីគោរពវិញ្ញាណខណ្ឌលោកវេជ្ជបណ្ឌិត Beat Richner នៅទីស្តីក្រសួងនៅថ្ងៃនេះ រដ្ឋមន្រ្តីសុខាភិបាល លោក ម៉ម ប៊ុនហេង មានប្រសាសន៍ថា ក្រសួងនឹងខិខំសហការជាមួយក្រុមការងារមូលនិធិគន្ធបុប្ផា ដើម្បីធានានូវនិរន្តរភាពសម្រាប់មន្ទីរពេទ្យគ្រប់កន្លែងទាំងអស់។
រដ្ឋមន្រ្តីសុខាភិបាល លោក ម៉ម ប៊ុនហេង
លោកវេជ្ជបណ្ឌិត Beat Richner បានបង្កើតមន្ទីរពេទ្យគន្ធបុប្ផាលើកដំបូងកាលពីឆ្នាំ១៩៩២ ដើម្បីផ្ដល់សេវាសុខាភិបាលដល់កុមារកម្ពុជារាប់លាននាក់ ដោយក្នុងរយៈពេលជាង ២៦ឆ្នាំមកនេះ លោកវេជ្ជបណ្ឌិត Beat Richner បានពង្រីកសាខាមន្ទីរពេទ្យគន្ធបុប្ផារហូតដល់ ៥កន្លែងទាំងនៅភ្នំពេញ និងខេត្តសៀមរាប។
បើតាមវេបសាយមូលនិធិមន្ទីរពេទ្យគន្ធបុប្ផា កុមារកម្ពុជាមិនតិចជាង ១៣លាននាក់ទេ ទទួលបានសេវាសុខាភិបាលពីមន្ទីរពេទ្យគន្ធបុប្ផាទាំងនៅភ្នំពេញ និងនៅឯខេត្តសៀមរាប៕