អាជ្ញាធរវៀតណាម បានបដិសេធមិនឲ្យអ្នកការពារសិទ្ធិមនុស្សម្នាក់ចាកចេញពីព្រលានយន្តហោះរបស់ខ្លួនដើម្បីទៅចូលរួមវេទិកាសេដ្ឋកិច្ចពិភពលោកស្តីពីអាស៊ានដែលនឹងត្រូវធ្វើនៅថ្ងៃស្អែកនេះទេ។
យោងតាមសេចក្តីស្នើសុំជាបន្ទាន់របស់អង្គការសហព័ន្ធអន្តរជាតិដើម្បីសិទ្ធិមនុស្សហៅកាត់ថា FIHD ដែលចេញផ្សាយកាលពីម្សិលមិញ អគ្គលេខាធិការអង្គការអន្តរជាតិមួយនេះគឺអ្នកស្រី ដេបប៊ី ស្តស្យឺដ ត្រួវបានអាជ្ញាធរអន្តោប្រវេសន៍វៀតណាមឃាត់ខ្លួនហាមមិនឲ្យចេញពីព្រលានយន្តហោះក្រុងហាណូយឡើយ។
តាមប្រភពដដែលអ្នកស្រី ដេបប៊ី ស្តស្យឺដ បានទៅដល់អាកាសយានដ្ឋានអន្តរជាតិណូយបៃ ក្រុងហាណូយកាលពីម៉ោង៣រសៀលម្សិលមិញ ប៉ុន្តែភ្លាមៗអាជ្ញាធរវៀតណាមបានរារាំងនិងឃាត់ខ្លួនអ្នកស្រីក្រោមហេតុផលដើម្បីកាពារ សន្តិសុខ សណ្ដាប់ធ្នាប់ និង សុវត្ថិភាព ក្នុងសង្គមវៀតណាម។
តាមប្រភពខាងលើ អាជ្ញាធរវៀតណាមធ្លាប់បានប្រាប់ទៅសមាជិកវេទិកាសេដ្ឋកិច្ចពិភពលោករួចទៅហើយកាលពីថ្ងៃទី៦ខែកញ្ញា ថាអ្នកស្រី ដេបប៊ី ស្តស្យឺដ មិនអនុញ្ញាតឲ្យចូលទឹកដីវៀតណាមទេ ព្រោះថាអ្នកស្រីត្រូវបានវៀតណាមដាក់ចូលក្នុងបញ្ជីខ្មៅហើយ ដោយសារតែការងារការពារសិទ្ធិមនុស្សរបស់គាត់។
អ្នកស្រី ដេបប៊ី ស្តស្យឺដ ត្រូវបានអ្នករៀបចំវេទិកាសេដ្ឋកិច្ចពិភពលោកស្តីពីអាស៊ានអញ្ជើញឲ្យធ្វើជាវាគ្មិនក្នុងកិច្ចពិភាក្សាក្រោមប្រធានបទការច្នៃប្រឌិតក្រោមសម្ពាធនៅថ្ងៃទី១៣ខែកញ្ញា។
វេទិកាសេដ្ឋកិច្ចពិភពលោកស្តីពីអាស៊ាន នឹងធ្វើនៅទីក្រុងហាណូយប្រទេសវៀតណាមក្នុងរយៈពេល៣ថ្ងៃគឺចាប់ពីថ្ងៃទី១១ដល់ទី១៣ខែកញ្ញា។
ក្រោយការឃាត់ខ្លួន អ្នកស្រី ដេបប៊ី ស្តស្យឺដ បានសរសេរនៅលើ Twitter របស់់ខ្លួនថា អ្នកស្រីសង្ឃឹមថាការធ្វើជាម្ចាស់ផ្ទះនៃវេទិកាដ៏ពិសេសនេះនឹងអាចជួយឲ្យវៀតណាមដឹងពីសារៈសំខាន់នៃសិទ្ធិមនុស្សនិងសេរីភាពចំពោះការអភិវឌ្ឍសេដ្ឋកិច្ច។
យោងតាម Twitter ផ្លូវការរបស់អង្គការសហព័ន្ធអន្តរជាតិដើម្បីសិទ្ធិមនុស្ស អ្នកស្រី ដេបប៊ី ស្តស្យឺដ ត្រូវបានអាជ្ញាធរវៀតណាមដោះលែងហើយបន្ទាប់ពីឃាត់ខ្លួនរយៈពេល១៥ម៉ោងនៅក្នុងព្រលានយន្តហោះនោះ ហើយបញ្ជូនត្រលប់ទៅទីក្រុងកូឡាឡាំពួរវិញនៅព្រឹកមិញនេះ។
អ្នកស្រី ដេបប៊ី ស្តស្យឺដ មានអាយុ៥៤ឆ្នាំជាជនម៉ាឡេស៊ីហើយត្រូវបានគេបោះឆ្នោតជ្រើសរើសជាអគ្គលេខាធិការអង្គការសហព័ន្ធអន្តរជាតិដើម្បីសិទ្ធិមនុស្សនៅឆ្នាំ២០១៣។
លោកស្រី Debbie Stothard គឺជាអ្នកលើកកម្ពស់សិទ្ធិមនុស្សយ៉ាងសកម្មនៅក្នុងប្រទេសភូមានិងតំបន់អាស៊ាន។ ក្នុងរយៈពេល ៣២ ឆ្នាំ អ្នកស្រីបានធ្វើការជាអ្នកកាសែត អ្នកប្រឹក្សាយោបល់ផ្នែកអប់រំសហគមន៍ ទីប្រឹក្សារដ្ឋាភិបាលនៅប្រទេសម៉ាឡេស៊ី អូស្ត្រាលីនិង ថៃជាដើម។
អាជ្ញាធរវៀតណាមនៅតែរឹតបណ្ដឹងលើសិទ្ធិសេរីភាពសារព័ត៌មាន និងសកម្មជនសិទ្ធិមនុស្សនិងសកម្មជនប្រជាធិបតេយ្យនានា៕
