អាជ្ញាធរអះអាងថា ក្លឹមកម្សាន្តមួយស្ថិតក្នុងខណ្ឌដូនពេញ ត្រូវបានខូចខាតអស់ស្ទើរទាំងស្រុង ដោយសារអគ្គីភ័យឆាបឆេះនៅព្រឹកថ្ងៃនេះ។
ប្រធាននាយកដ្ឋានពន្លត់អគ្គីភ័យនៃក្រសួងមហាផ្ទៃលោក នេត វន្ថា ប្រាប់អ្នកសារព័ត៌មានកន្លែងកើតហេតុថា ហេតុការណ៍ភ្លើង ឆេះក្លឹបកម្សាន្ត 2ND ស្ថិតតាមបណ្តោយផ្លូវប៉ាស្ទ័រក្នុងខណ្ឌដូនពេញ រាជធានីភ្នំពេញនោះ បានកើតឡើងតាំងពីម៉ោងប្រហែលម៉ោង ៦ព្រឹក ថ្ងៃទី១១ ខែកញ្ញា ដោយក្រុមពន្លត់អគ្គីភ័យប្រតិបត្តិការពន្លត់អស់ទាំងស្រុងវិញ នៅម៉ោងប្រហែល៩កន្លះព្រឹកនេះ ហើយពុំមានមនុស្សអ្នករងរបួសក្នុងហេតុការណ៍នេះទេ។
លោក នេត វន្ថា មិនទាន់អាចបញ្ជាក់ពីមូហេតុបានទេពេលកំពុងប្រតិបត្តិការពន្លត់អគ្គីភ័យនេះ ខណៈការខូចខាតទ្រព្យសម្បត្តិវិញ លោកថា អាចខូចខាតខ្ទង់លានដុល្លារ។
លោកបានអំពាវនាវទៅប្រជាពលរដ្ឋដូចជា ម្ចាស់សំណង ម្ចាស់ខុដូ និងម្ចាស់អាគារទាំងអស់ត្រូវតែបង្កា ឬបំពាក់ប្រព័ន្ធបង្ការអគ្គីភ័យនេះឲ្យបានសមស្របតាមលក្ខណៈបច្ចេកទេស ដើម្បីងាយស្រួលអន្តរាគមន៍ពេលកើតហេតុអគ្គីភ័យអាចជួយពន្លត់ទាន់ពេលវេលា។
របាយការណ៍ក្រសួងមហាផ្ទៃបានឲ្យដឹងថាក្នុងឆ្នាំ២០១៧ អគ្គីភ័យបានកើតឡើងចំនួន៥១៤លើកនៅទូទាំងប្រទេស ដោយបានសម្លាប់មនុស្ស២២នាក់ និងបណ្តាលឲ្យរបួសមនុស្ស១២៨នាក់៕
