បេឡាជាតិរបបសន្តិសុខសង្គម និងក្រុមហ៊ុនធានារ៉ាប់រងសុខភាពហ្វីលីពីន បានចុះហត្ថលេខាលើអនុស្សរណៈ នៃការយោគយល់គ្នា ដើម្បីចែករំលែកពីការអនុវត្តកម្មវិធីធានារ៉ាប់រ៉ងសុខភាពជាតិ។
តាមទំព័រហ្វេសប៊ុករបស់ក្រសួងការងារនិងបណ្ដុះបណ្ដាលវិជ្ជាជីវៈដែលចេញកាលពីម្សិលមិញ ក្រុមហ៊ុនហ្វីលីពីនដែលចុះអនុស្សរណៈ ជាមួយបេឡាជាតិរបបសន្តិសុខសង្គមនោះមានឈ្មោះថា PhilHealth។
នាយកបេឡាជាតិរបបសន្តិសុខសង្គម លោក អ៊ុក សមវិទ្យា និងលោក Robert M.Salvador សមាជិកក្រុមប្រឹក្សាភិបាលក្រុមហ៊ុន PhilHealth បានចុះអនុស្សរណៈនៃការយោគយល់គ្នាមួយ ដើម្បីចែករំលែកនូវចំណេះដឹង និងការកសាងសមត្ថភាពលើការសិក្សា និងការអង្កេតពីយុទ្ធសាស្រ្ត និងការប្រព្រឹត្តទៅរបស់ PhilHealth ក្នុងការអនុវត្តកម្មវិធីធានារ៉ាប់រ៉ងសុខភាពជាតិ ដោយមានការចូលរួមធ្វើជាសាក្សីពីលោក អិុត សំហេង រដ្ឋមន្ត្រីនៃក្រសួងការងារ និងបណ្តុះបណ្តាលវិជ្ជាជីវៈផងដែរ។
តាមប្រសាសន៍របស់លោក អិុត សំហេង កាលពីម្សិលមិញ បានឲ្យដឹងថា បច្ចុប្បន្ននេះ PhilHealth បានផ្តល់នូវសេវាថែទាំសុខភាព ជាពិសេសជនងាយរងគ្រោះ អ្នកជម្ងឺ ជនចាស់ជរា ជនពិការ ស្រ្តី និងកុមារ ព្រមទាំងផ្តល់នូវសេវាថែទាំសុខភាពដោយឥតគិតថ្លៃដល់ទុគភ៌តជន៕
