លោកនាយករដ្ឋមន្ត្រី ហ៊ុន សែន សម្រេចបង្កើតគណៈបញ្ជាការ ការពារសន្តិសុខ និងសុវត្ថិភាពជូនលោក និងភរិយានៅក្នុងភូមិសាស្ត្រផ្ទះរបស់លោកនៅក្នុង រាជធានីភ្នំពេញ និងខេត្តកណ្តាល។
ក្នុងសេចក្តីសម្រេចចុះថ្ងៃទី១៦ កក្កដា ដែលVOD ទើបទទួលបាន លោក ហ៊ុន សែន បានតែងតាំងអនុរដ្ឋលេខាធិការក្រសួងការពារជាតិលោក ហ៊ុយ ពិសិដ្ឋ ជាប្រធានគណៈបញ្ជាការការពារសន្តិសុខ។
តាមសេចក្តីសម្រេចនេះ លោក ហ៊ុយ ពិសិដ្ឋ មានតួនាទីដឹកនាំ លោក យូ ស៊ុនឡុង លោក ទូច ណារ៉ុថ និងលោក ជួន សុវណ្ណ រួមទាំងមេបញ្ជាការយោធភូមិភាគពិសេស មេបញ្ជាការកងរាជអាវុធហត្ថរាជធានី និងកងអន្តរាគមន៍ចំណុះបញ្ជាការកងអង្គរក្សផ្សេងទៀត។
តាមប្រភពដដែល គោលបំណងបង្កើតគណៈបញ្ជាការនេះដើម្បីត្រៀមការពារសន្តិសុខជូនលោក និងភរិយាក្នុងភូមិសាស្ត្រផ្ទះទី១របស់លោកដែលមានទីតាំងនៅក្នុងខណ្ឌដូនពេញរាជធានីភ្នំពេញ ក្រុមនេះហៅកាត់ថា X2 ។
ក្នុងសេចក្តីសម្រេចដាច់ដោយឡែកមួយទៀតដែលចុះថ្ងៃទី១៨ កក្កដា ក្រោយគ្នាតែ២ថ្ងៃបន្ទាប់ពីការសម្រេចបង្កើតក្រុម X2 លោក ហ៊ុន សែន បានសម្រេចបង្កើតគណបញ្ជាការមួយទៀតហៅកាត់ថាX1 ដែលគណៈបញ្ជាការនេះដឹកនាំដោយមេកងអង្គរក្សរបស់លោកគឺលោក ហ៊ីង ប៊ុនហៀង ឲ្យដឹកនាំលោក យូ ស៊ុនឡុង និងមេបញ្ជាការយោធភូមិភាគពិសេស អភិបាលខេត្តកណ្តាល មេបញ្ជាការរងកងអង្គរក្ស រួមទាំងមេបញ្ជាការកងរាជអាវុធហត្ថខេត្តកណ្តាល ស្នងការនគរបាល និងកងអន្តរាគមន៍ចំណុះបញ្ជាការកងអង្គរក្សផ្សេងទៀត ដើម្បីត្រៀមការពារសន្តិសុខជូនលោក និងភរិយាក្នុងភូមិសាស្ត្រផ្ទះទី២របស់លោកដែលមានទីតាំងក្នុងក្រុងតាខ្មៅ ខេត្តកណ្តាល។
គណៈបញ្ជាការ X1 និង X2 នេះមានតួនាទីការពារសន្តិសុខ សុវត្ថិភាព សណ្តាប់ធ្នាប់សាធារណៈនៅជុំវិញភូមិគ្រឹះលោក ហ៊ុន សែនទាំងពីរ និងតាមផ្លូវធ្វើដំណើររបស់លោក និងភរិយានៅតាមភូមិសាស្ត្រខេត្ត និងរាជធានីទាំងពីរដែលអ្នកទាំងពីរទៅ ជាពិសេសគណៈបញ្ជាការនេះត្រូវដោះស្រាយ និងទប់ស្កាត់នូវរាល់បញ្ហាដែលកើតមានជាយថាហេតុដូចជាបាតុកម្ម កូដកម្ម ឬការតវ៉ាផ្សេងៗ នៅមុខ និងជុំវិញផ្ទះរបស់លោក។
បើពិនិត្យមើលថ្ងៃដែលលោក ហ៊ុន សែន បង្កើតគណៈបញ្ជាការទាំងពីរនេះគឺធ្វើឡើងតែជាងមួយសប្តាហ៍មុនថ្ងៃបោះឆ្នោត២៩ កក្កដា ប៉ុណ្ណោះ។
មេបញ្ជាការកងអង្គរក្សលោក ហ៊ុន សែន គឺនាយឧត្តមសេនីយ៍ហ៊ីង ប៊ុនហៀង បានបញ្ជាក់យ៉ាងខ្លីប្រាប់វី.អូ.ឌី ថាការបង្កើតនេះគឺគ្រាន់តែដើម្បីការពារសន្តិសុខប៉ុណ្ណោះគ្មានគោលបំណងអ្វីផ្សេងនោះទេ។
នាយឧត្តមសេនីយ៍ហ៊ីង ប៊ុនហៀង
ប្រធានក្រុមអ្នកវិភាគវ័យក្មេងកញ្ញា លី ស្រីស្រស់ យល់ថាការបង្កើតគណៈបញ្ជាការឲ្យការពារជុំវិញផ្ទះលោកហ៊ុន សែន នេះក៏អាចជាចំណែកមួយនៃការភ័យខ្លាចរបស់លោកហ៊ុន សែន ទៅលើឥទ្ធិពលនៃអ្នកគាំទ្របក្សសង្គ្រោះជាតិក្នុងអំឡុងពេលបោះឆ្នោតដែលនៅពេលនោះស្ថានការណ៍ហាក់បានកើនកម្តៅខ្លាំង។ កញ្ញាបានបង្ហាញក្តីបារម្ភពីការចំណាយដ៏ច្រើនទៅលើកងអង្គរក្សទាំងនេះដែលកញ្ញាយល់ថាមិនមានការចាំបាច់ណាមួយទាល់តែសោះនោះ។
ប្រធានក្រុមអ្នកវិភាគវ័យក្មេងកញ្ញា លី ស្រីស្រស់
កាលពីខែតុលា ឆ្នាំ២០១៧ ស្របពេលដែលស្ថានការណ៍នយោបាយហាក់កើនឡើងកម្តៅដែលនោះ រដ្ឋាភិបាលកម្ពុជា បានសម្រេចបង្កើតក្រុមការងារចុះរៀបចំកិច្ចការសន្តិសុខ សុវត្ថិភាព ជូនលោកនាយករដ្ឋមន្ត្រី ហ៊ុន សែន និងភរិយា នៅគ្រប់គោលដៅ ដែលអ្នកទាំងពីរអញ្ជើញចូលរួមប្រារព្ធពិធីនានា ក្នុងព្រះរាជាណាចក្រកម្ពុជា ដោយថាជាតម្រូវការចាំបាច់៕
