ក្រសួងអប់រំ យុវជន និងកីឡានឹងបង្កើតគណកម្មការដោះស្រាយបណ្តឹងនៅថ្ងៃស្អែកនេះ បន្ទាប់ពីបេក្ខជនមួយចំនួន មិនសុខចិត្តនឹងលទ្ធផលប្រឡងបាក់ឌុបលើវិញ្ញាសារគណិតវិទ្យា។
អ្នកនាំពាក្យក្រសួងអប់រំ យុវជន និងកីឡា លោក ឌី ខាំបូលី ប្រាប់ VOD នៅព្រឹកនេះ ថាក្រសួងទទួលពាក្យបណ្តឹងពីសិស្សតាំងពីម្សិលមិញនិងកំពុងរៀបចំបង្កើតគណកម្មការកោសល្យវិច្ច័យធ្វើការដោះស្រាយបណ្តឹងចាប់ពីថ្ងៃស្អែកតទៅ។
អ្នកនាំពាក្យក្រសួងអប់រំ យុវជន និងកីឡា លោក ឌី ខាំបូលី
លោក ឌី ខាំបូលី បន្តថាក្រសួងនៅមិនទាន់អាចប្រាប់បានពីលទ្ធផលនៅពេលណានៅឡើយទេ ប៉ុន្តែលោកថានឹងខិតខំដោះស្រាយការងារនេះ។
នៅពេលសួរថាតើនឹងអន្តរាគមន៍សុំពន្យារពេលកាលបិច្ឆេទទទួលពាក្យចូលរៀននៅសកលឬមហាវិទ្យាល័យឬកម្មវិធីអារូបករណ៍ទេ? អ្នកនាំពាក្យរូបនេះថានៅមិនទាន់មានគោលការណ៍តែនឹងពិនិត្យតាមលទ្ធភាពនិងអាចធ្វើតាមការស្នើសុំ។
ទីប្រឹក្សាសមាគមគ្រូបង្រៀនឯករាជ្យ លោក រ៉ុង ឈុន កោតសរសើរសេចក្តីក្លាហានរបស់សិស្សដែលមកតវ៉ាករណីនេះនិងសាទរចំពោះការខិតខំដោះស្រាយរបស់ក្រសួង តែទោះជាយ៉ាងណាលោកជឿថាបញ្ហានេះបណ្តាលមកពីកំហុសបច្ចេកទេស។
ទីប្រក្សាសមាគមគ្រូបង្រៀនឯករាជ្យ លោក រ៉ុង ឈុន
បេក្ខជនមកពីខេត្តកំពតដែលបានដាក់ពាក្យបណ្តឹងសើរើ និងរង់ចាំដំណោះស្រាយនៅមុខក្រសួងអប់រំជាមួយសិស្សដទៃ ហើយអះអាងថាខ្លួនជាសិស្សពូកែធ្លាប់ជាប់ជ័យលាភីមេដាយមាស ប្រាក់ និងសំរិទ្ធិលើវិញ្ញាសារគណិតវិទ្យាទាំងក្នុងនិងក្រៅប្រទេស ជឿជាក់ថាខ្លួនមិនអាចទទួលលទ្ធផលវិញ្ញាសារគណិតវិទ្យាត្រឹមនិទ្ទេស F ដូចលទ្ធផលប្រឡងកាលពីចុងសប្តាហ៍នេះទេ។ យុសិស្ស ឆាយ លីអាន ប្រាប់ VODថា ខ្លួនសំណូមពរឲ្យក្រសួងដោះស្រាយឲ្យបានឆាប់ដើម្បីបានដាក់ពាក្យសិក្សាបន្ត។
យុសិស្ស ឆាយ លីអាន មកពីខេត្តកំពត
ក្រសួងអប់រំ យុវជន និងកីឡា បានប្រកាសនៅមុនការរវ៉ារបស់បេក្ខជនថា សិស្សប្រឡងជាប់បាក់ឌុបនៅឆ្នាំនេះ មានការកើនឡើងជាងឆ្នាំមុន ពោលគឺសិស្សប្រឡងជាប់មានចំនួនជាង៦៦ភាគរយ ប៉ុន្តែចំនួនសិស្សទទួលបាននិទ្ទេស A បានថយចុះដល់ទៅជាង ៣០ភាគរយ៕
