រដ្ឋាភិបាលបានសម្រេចទទួលស្គាល់សាលាកសិកម្មរបស់លោក ម៉ុង ឬទ្ធី ជាវិទ្យាស្ថានកសិកម្ម តាមសំណើរបស់ក្រសួងអប់រំបន្ទាប់ពីសាលានេះដាក់ដំណើរការជាង៤ឆ្នាំ។
ក្នុងអនុក្រឹត្យចុះថ្ងៃទី៦ សីហាដែល VOD ទើបទទួលបានលោកនាយករដ្ឋមន្ត្រី ហ៊ុន សែន បានទទួលស្គាល់វិទ្យាស្ថានកសិកម្មឧកញ៉ា ម៉ុង ឬទ្ធី ដែលសរសេរកាត់ថា វកឧមឬ (OMRAI) ជាគ្រឹះស្ថានឧត្តមសិក្សាឯកជនមួយ ដែលមានទីតាំងស្ថិតនៅឃុំកែវផុស ស្រុកស្ទឹងហាវ ខេត្តព្រះសីហនុ។
វិទ្យាស្ថានកសិកម្មរបស់លោក ម៉ុង ឬទ្ធី នេះ ធ្វើការបណ្តុះបណ្តាលកម្រិតបរិញ្ញាបត្ររង និងបរិញ្ញាបត្រលើ៧ដេប៉ាតឺម៉ង់ដែលរួមមាន វេជ្ជសាស្ត្រសត្វ វិទ្យាសាស្ត្រកសិកម្ម វិស្វកម្មកសិកម្ម កសិ-ឧស្សាហកម្ម វិទ្យាសាស្ត្រជលផល ព័ត៌មានវិទ្យា និងភាសាអង់គ្លេស។
លោក ម៉ុង ឬទ្ធី បានបើកសាលាកសិកម្មនេះកាលពីដើមឆ្នាំ២០១៤ ដោយថាដើម្បីជួយពង្រឹងការយល់ដឹងពីផ្នែកកសិកម្មដល់ប្រជាជនខ្មែរ ក៏ដូចជាអភិវឌ្ឍន៍ជនបទកម្ពុជាឲ្យប្រសើរឡើង៕
