នាយករដ្ឋមន្ត្រីស្តីទី លោក ស ខេង បញ្ជាឲ្យបង្កើតក្រុមប្រតិបត្តិការពិសេសមួយ ចេញពីក្រសួងមហាផ្ទៃទៅជួយទប់ស្កាត់បទល្មើសនៅខេត្តព្រះសីហនុ ខណៈតំបន់វិនិយោគជាប់មាត់សមុទ្រមួយនេះ មានកំណើនជនជាតិចិនហក់ឡើងយ៉ាងគំហុក ។
ក្នុងពិធីប្រកាសចូលកាន់តំណែងមន្ត្រីក្រសួងមហាផ្ទៃ នាថ្ងៃទី១២ខែកញ្ញានេះ លោក ស ខេង ថ្លែងថា ក្រុងកំពង់សោម ខេត្តព្រះសីហនុ ជាតំបន់វិនិយោគ ហើយកំណើតជនបរទេសបានហក់ឡើងយ៉ាងគំហុក ពិសេសជនជាតិចិន ដែលលោកបារម្ភថា បទល្មើសផ្សេងៗអាចនឹងកើតឡើង ដូចជាចោរកម្ម គ្រឿងញៀន អនាម័យ និងបរិស្ថាន ពិសេសទឹកសមុទ្រខណៈខេត្តនេះមិនទាន់ត្រៀមលក្ខណៈបានគ្រប់គ្រាន់នៅឡើយ។
លោក ស ខេង បញ្ជាឲ្យបង្កើតក្រុមប្រតិបត្តិការចម្រុះមួយ មានសមាសភាពមកពីអគ្គនាយករដ្ឋបាល អគ្គនាយកនគរបាល អន្តោប្រវេសន៍ និងអ្នកច្បាប់ ដើម្បីជួយទប់ស្កាត់បទល្មើសផ្សេងៗ ដែលអាចកើតឡើងនៅខេត្តនេះ។
នាយករដ្ឋមន្ត្រីស្តីទី លោក ស ខេង
គេហទំព័រនគរបាលជាតិ បានចុះផ្សាយជាញឹកញាប់ ពីការឃាត់ខ្លួនជនជាតិចិន នៅខេត្តព្រះសីហនុ ទាក់ទិននឹងបទល្មើសផ្សព្វផ្សាយសេវាផ្លូវភេទក្រោមរូបភាពម៉ាស្យា បង្កគ្រោះថ្នាក់ចរាចរណ៍ និងវាយតប់គ្នាក្នុងហាងផឹកស៊ីជាដើម។
ឯកអគ្គរដ្ឋទូតចិនប្រចាំកម្ពុជា លោក ស្យុង បូ កាលពីថ្ងៃទី៧កុម្ភៈ បានធ្វើសន្និសីទសារព័ត៌មាន ជំរុញឲ្យអាជ្ញាធរកម្ពុជាចាត់វិធានការណ៍ ទៅលើជនជាតិចិនណា ដែលប្រព្រឹត្តល្មើសច្បាប់កម្ពុជា ដោយថា កម្ពុជាមិនត្រូវព្រួយបារម្ហខ្លាចប៉ះពាល់ដល់ទំនាក់ទំនងនៃប្រទេសទាំងពីរ ដោយសារតែអនុវត្តច្បាប់ទេ ។
អ្នកសម្របសម្រួលសមាគមហុកការពារសិទ្ធិមុស្សប្រចាំខេត្តព្រះសីហនុ លោកស្រី ជៀប សុធារី សារទរចំពោះវិធានការរបស់ក្រសួងមហាផ្ទៃនេះ ដោយថាអ្វីដែលលោក ស ខេង ព្រួយបារម្ភដូចទៅនឹងការព្រួយបារម្ភរបស់សង្គមស៊ីវិលដែរ។
ប៉ុន្តែមន្ត្រីសង្គមស៊ីវិលរូបនេះ អះអាងថា ដើម្បីឲ្យវិធានការនេះ ទទួលបានជោគជ័យ ត្រូវពង្រឹងការអនុវត្តច្បាប់ បំបាត់អំពើពុករលួយ និងទប់ស្កាត់កុំឲ្យមានវប្បធម៌អន្តរាគមន៍ ពីមន្ត្រីមានអំណាច។
អ្នកសម្របសម្រួលសមាគមហុកការពារសិទ្ធិមុស្សប្រចាំខេត្តព្រះសីហនុ លោកស្រី ជៀប សុធារី
ទោះជាយ៉ាងណាក្នុងពិធីនោះដែរ លោក ស ខេង បានក្រើនរំឭកមន្ត្រីក្រោមឱវាទថា រដ្ឋាភិបាល បានដាក់ចេញនូវវិធានការកំណែទម្រង់ដ៏ពិតប្រាកដមួយសម្រាប់អាណត្តិថ្មីនេះ ក្នុងនោះមានការធ្វើកំណែទម្រង់កងកម្លាំងប្រដាប់អាវុធ ប្រព័ន្ធយុត្តិធម៌ និងទប់ស្កាត់អំពើពុករលួយ ។
បើតាមមន្ត្រីអាដហុក លំហូរជនជាតិចិនក្នុងខេត្តព្រះសីហនុនេះមានទាំងផលវិជ្ជមាន និងអវិជ្ជមាន។ វិជ្ជមានដោយសារតែតម្លៃដីនៅតំបន់នោះហក់ឡើងថ្លៃខ្ពស់ ជាឱកាសមានបានដល់អ្នកមានដី។
តែអ្នកមានមុខរបរតូចតាច ប្រឈមនិងបញ្ហាជីវភាព ដោយសារចិនប្រើសេវាកម្ម ជនជាតិចិនដូចគ្នា ទាំងសេវាដឹកជញ្ជូន និងអាហាដ្ឋាន ចំណែកភ្ញៀវទេសចរណ៍ខ្មែរ បានថយចុះដោយសារបារម្ភពីសុវត្ថិភាព ។