កូនប្រុសច្បងរបស់លោកនាយករដ្ឋមន្ត្រី ហ៊ុន សែន បានប្ដេជ្ញាថា នឹងស្មោះត្រង់ដាច់ខាតចំពោះប្រទេសជាតិ និងគោរពតាមរដ្ឋធម្មនុញ្ញរបស់ប្រទេស បន្ទាប់ពីលោកត្រូវបានតែងតាំងជាមេបញ្ជាការថ្មីនៃកងទ័ពជើងគោក។
ក្នុងសុន្ទរកថាសម្រាប់ថ្លែងនៅក្នុងពិធីសំណេះសំណាល និងផ្ទេរភារកិច្ចមេបញ្ជាការកងទ័ពជើងគោកកាលពីថ្ងៃម្សិលមិញនេះ លោកឧត្ដមសេនីយ៍ឯក ហ៊ុន ម៉ាណែត បានប្ដេជ្ញាថា លោកនឹងស្មោះត្រង់ដាច់ខាតចំពោះជាតិ សាសនា និងព្រះមហាក្សត្រ។
លោក ហ៊ុន ម៉ាណែត បានបន្តសុន្ទរកថានោះថា លោកក៏គោរពរដ្ឋធម្មនុញ្ញរបស់ប្រទេស ដើរតាមមាគា៌របស់រដ្ឋាភិបាល អាណត្តិថ្មីផងដែរ។
លោកក៏បានប្តេជ្ញាថា នឹងគោរព និិងអនុវត្តតាមគោលការណ៍ និងលក្ខន្តិកៈរបស់កងយោធពលខេមរភូមិន្ទ ឲ្យបានខ្ជាប់ខ្ជួន និងប្រឹងប្រែងអនុវត្តឲ្យបាននូវតួនាទី និងភារកិច្ចរបស់ខ្លួន ដោយហ៊ានបូជាជីវិត ដើម្បីបុព្វហេតុការពារប្រជាជននិងមាតុភូមិ។
លោក ហ៊ុន ម៉ាណែត ត្រូវបានព្រះមហាក្សត្រតែងតាំងជាមេបញ្ជាការកងទ័ពជើងគោកកាលពីថ្ងៃទី៦ ខែកញ្ញា ទៅតាមសំណើរបស់ឪពុករបស់លោក គឺលោកនាយករដ្ឋមន្ត្រី ហ៊ុន សែន។
បន្ទាប់ពីឡើងកាន់តំណែងជាមេទ័ពជើងគោកហើយនោះ លោក ហ៊ុន ម៉ាណែត ក៏គ្រប់គ្រងលើអង្គភាពយោធាចំនួន ៥ រួមមាន កងពលធំអន្តរាគមន៍លេខ២ កងពលធំអន្តរាគមន៍លេខ៣ កងពលតូចអន្តរាគមន៍លេខ១ កងពលតូចទ័ពពិសេសឆ័ត្រយោងលេខ៩១១ និងកងពលតូចលេខ៧០៕