អ្នកនាំពាក្យថ្មីក្រសួងអប់រំ យុវជន និងកីឡា បានប្ដេជ្ញាឆ្លើយតបទៅនឹងសំណួរពីក្រុមអ្នកសារព័ត៌មាន បន្ទាប់ពីពួកគេត្រូវបានក្រសួងសម្រេចតែងតាំងឲ្យកាន់តួនាទីនេះ ជំនួសអ្នកនាំពាក្យចាស់ ដែលត្រូវបានផ្លាស់ប្ដូរ។
ក្នុងសេចក្តីសម្រេចកាលពីម្សិលមិញនេះ ក្រសួងអប់រំ យុវជន និងកីឡា បានតែងតាំងអ្នកនាំពាក្យពីររូប គឺ លោក រស់ សុវាចា និង លោក ឌី ខាំបូលី បន្ថែមលើមុខងារបច្ចុប្បន្ន។
លោក រស់ សុវាចា ទទួលបានសញ្ញាប័ត្របណ្ឌិតមកពីក្រៅប្រទេស ហើយជាអតីតទីប្រឹក្សាឯករាជ្យ ធ្លាប់ធ្វើការនៅអង្គការយូណេស្កូ និងអង្គការសហប្រជាជាតិ។
លោក រស់ សុវាចា ប្រាប់ VOD នៅថ្ងៃនេះថា លោកនឹងព្យាយាមឲ្យអស់លទ្ធភាព ដើម្បីឆ្លើយតបនឹងសំណួរអ្នកសារព័ត៌មាន។
ចំណែក លោក ឌី ខាំបូលី បញ្ជាក់ប្រាប់ VOD ដែរថា លោករីករាយធ្វើការជាមួយគ្រប់អ្នកសារព័ត៌មានទាំងអស់ ទាក់ទងនឹងវិស័យអប់រំ ហើយថា នឹងឆ្លើយតបជាមួយអ្នកសារព័ព៌មានគ្រប់ពេលវេលា។
លោក ឌី ខាំបូលី ត្រូវបានគេស្គាល់ថា ជាអ្នកនិពន្ធសៀវភៅប្រវត្តិសាស្ត្រកម្ពុជាប្រជាធិបតេយ្យ(១៩៧៥-១៩៧៩) ដែលស្នាដៃរបស់លោកត្រូវបានដាក់បញ្ចូលទៅក្នុងកម្មវិធីសិក្សាកម្រិតមធ្យមរបស់ក្រសួងអប់រំ។
អ្នកនាំពាក្យថ្មីទាំងពីររូបនេះ សុទ្ធតែបញ្ចប់ការសិក្សាថ្នាក់បណ្ឌិតមកពីបរទេស មុននឹងលោកត្រូវបានតែងតាំងឲ្យកាន់តួនាទីនេះ ជំនួសអ្នកនាំពាក្យចាស់ លោក រស់ សាលីន ដែលត្រូវបានផ្លាស់ប្ដូរ៕