សេដ្ឋកិច្ច

លោក ហ៊ុន សែន ជំរុញប្រទេសតំបន់ទន្លេមេគង្គបង្កើតសមាគមប្រទេសនាំចេញអង្ករ

លោក ហ៊ុន សិរីវឌ្ឍន៍
| ១៣ កញ្ញា ២០១៨
ម៉ោង ១២:៣៣

លោក ហ៊ុន សែន អញ្ជើញចូលរួមវេទិកាសេដ្ឋកិច្ចពិភពលោក លើកទី២៧ នៅទីក្រុងហាណូយ នៅព្រឹកថ្ងៃ១២ ខែកញ្ញា ឆ្នាំ២០១៨ (រូបភាព៖ ហ្វេសប៊ុកលោក ហ៊ុន សែន)

លោកនាយករដ្ឋមន្ត្រី ហ៊ុន សែន បានរម្លឹកពីគោលបំណងរបស់លោកក្នុងការជំរុញបណ្ដាប្រទេសនៅតាមតំបន់ទន្លេមេគង្គ ឲ្យបង្កើតជាសមាគមប្រទេសនាំចេញអង្ករ ដោយថា ដើម្បីជំរុញនូវការអភិវឌ្ឍកសិកម្មរបស់ប្រទេសក្នុងតំបន់ ឲ្យក្លាយជាជង្រុកស្រូវរបស់អាស៊ី។

ថ្លែងក្នុងកិច្ចប្រជុំស្តីពីចក្ខុវិស័យថ្មីសម្រាប់តំបន់មេគង្គ នៅប្រទេសវៀតណាម លោកនាយករដ្ឋមន្ត្រី ហ៊ុនសែន បានលើកឡើងថា បណ្ដាប្រទេសដែលជាសមាជិក ACMECS ទាំងអស់ដែលរួមមាន កម្ពុជា វៀតណាម ឡាវ ថៃ មីយ៉ាន់ម៉ា អាចក្លាយជាប្រទេសដែលមានកសិកម្មរីកចម្រើនខ្លាំង និងជាជង្រុកស្រូវរបស់អាស៊ី ប្រសិនជាប្រទេសទាំងនោះរួមគ្នាបង្កើតជាសមាគមប្រទេសនាំចេញអង្ករ។

លោក ហ៊ុន សែន ថ្លែងក្នុងវេទិកាសេដ្ឋកិច្ចពិភពលោកថា៖

រយៈពេល ១៥ឆ្នាំហើយ គឺសមាគមប្រទេសនាំចេញអង្ករមិនទាន់បង្កើតបានជារូបរាងទេ។ ប្រសិនជាយើងបង្កើតបាននូវសមាគមប្រទេសនាំចេញអង្ករ យើងមិនមែនគ្រាន់តែជាដៃគូរប្រកួតប្រជែងទេ ក៏ប៉ុន្តែ យើងរួមសហការគ្នា ដើម្បីជំរុញវិស័យកសិកម្មរបស់យើងឲ្យក្លាយជាជង្រុកស្រូវរបស់អាស៊ីតែម្ដង

លោកនាយករដ្ឋមន្ត្រី ហ៊ុន សែន

អគ្គនាយកក្រុមហ៊ុននាំចេញអង្ករ AMRU Rice លោក សុង សារ៉ន គាំទ្រចំពោះការលើកឡើងរបស់នាយករដ្ឋមន្ត្រីដោយសង្ឃឹមថាសមាគមនេះនឹងអាចនាំឲ្យមានការរីកចំរើនវិស័យកសិកម្មកម្ពុជា ក៏ដូចជាជំរុញឲ្យមានស្ថិរភាពស្បៀងអាហារពិភពលោកផងដែរ តែលោកក៏បានបង្ហាញក្តីបារម្ភមួយចំនួនផងដែរ។

យើងគិតលើចំណុចរួមដូចដែលខ្ញុំបានលើកឡើងអំបាញ់មិញនូវការចែករំលែកបទពិសោធន៍នូវភាពរុងរឿង ចែករំលែកការរីកចម្រើនមកយើងអាចស្មឹងស្មាតស្មារតីមកយើងអាចជោគជ័យ តែបើយើងបង្កើតមកដើម្បីតែប្រកួតប្រជែងគ្នាអាហ្នឹងក៏យើងងាប់ដែរ។ វាអាស្រ័យលើគោលនយោបាយប្រសិនជាបង្កើតមកលើផ្លូវត្រូវ និងជំរុញឲ្យមានស្ថិរភាពស្បៀងអាហារពិភពលោក ព្រោះអាស៊ានបានផ្លូវផ្គង់ស្បៀងអាហារជាង៥០ភាគរយលើពិភពលោកគ្រាន់តែ១០ប្រទេសនេះ

អគ្គនាយកក្រុមហ៊ុននាំចេញអង្ករ AMRU Rice លោក សុង សារ៉ន

ទីប្រឹក្សាមជ្ឈមណ្ឌលសិក្សា និងអភិវឌ្ឍន៍កសិកម្មកម្ពុជា ហៅកាត់ថា សេដាក លោក សម វិទូ យល់ថា ប្រសិនជាប្រទេសនៅតំបន់ទន្លេមេគង្គអាចបង្កើតជាសមាគមប្រទេសនាំចេញអង្ករបានមែន គឺកម្ពុជាអាចទទួលបានទីផ្សារច្រើន តែអ្វីដែលកម្ពុជាប្រឈមនោះ គឺបញ្ហាតម្លៃ ដោយសារកសិកម្មកម្ពុជាមានតម្លៃថ្លៃជាងប្រទេសនៅក្នុងតំបន់។

លោកមិនជឿថា ប្រទេសទាំងនោះនឹងយល់ស្របតាមការលើកឡើងរបស់លោក ហ៊ុន សែន នោះទេ ដោយថា បើធៀបពីសក្ដានុពលកសិកម្មនោះ គឺកម្ពុជាដើរក្រោយប្រទេសទាំងនោះច្រើនណាស់។

យើងហ៊ាននិយាយថាអញ្ចេះដោយសារវៀតណាមគេមានសក្ដានុពលខ្ពស់ជាងយើង ភូមាឥឡូវដោយសារតែប្រទេសគេចាប់ផ្ដើម អញ្ចឹងគេក៏មានសក្ដានុពលខ្ពស់ដែរក្នុងការផលិត។ អញ្ចឹងយើងប្រទេសតូចហើយឱកាសនៃការផលិតហ្នឹងវាទាបជាងគេ ការចំណាយក្នុងការផលិតខ្ពស់ជាងគេអញ្ចឹង យើងទៅបបួលគេគឺពិបាកជាងប្រទេសធំៗដែលគេមកបបួលយើងវិញ

ទីប្រឹក្សាមជ្ឈមណ្ឌលសិក្សា និងអភិវឌ្ឍន៍កសិកម្មកម្ពុជា ហៅកាត់ថា សេដាក លោក សម វិទូ

បើតាមលោក សម វិទូ កម្ពុជាគួរកែសម្រួលសេវាសាធារណៈ ហេដ្ឋារចនាសម្ព័ន្ធ និងបង្កើនចំណេះពលរដ្ឋពីវិស័យកសិកម្មនេះ ឲ្យខ្លាំងក្លាសិនទើបអាចជំរុញឲ្យប្រទេសទាំងនោះចាប់អារម្មណ៍ចំពោះការលើកឡើងរបស់ខ្លួន។

លោកនាយករដ្ឋមន្ត្រីហ៊ុន សែន បានប្រកាសកាលពីដើមខែសីហាថា ប្រទេសកម្ពុជាជោគជ័យច្រើនលើវិស័យស្រូវអង្ករ បើទោះបីជាការនាំចេញទៅទីផ្សារអន្តរជាតិនៅរយៈពេល ៨ខែនៃឆ្នាំ២០១៨នេះ បានថយចុះក៏ដោយ។

ករណីនៃការនាំចេញថយចុះនេះ ត្រូវបានក្រសួងកសិកម្មបន្ទោសទៅលើសមត្ថភាពរបស់រោងម៉ាស៊ីនកិនស្រូវ និងអ្នកនាំចេញ ដែលថា ពុំមានឃ្លាំងស្តុកគ្រប់គ្រាន់សម្រាប់បម្រើដល់ការនាំចេញ។

យោងតាមគេហទំព័រ worldtopexports.com ប្រទេសនៅតំបន់ទន្លេមេគង្គដែលនាំចេញអង្ករច្រើនជាងគេមានថៃ និងវៀតណាម ខណៈកម្ពុជាឈរលេខរៀងទី៣ ដែលនៅពីលើប្រទេសមីយ៉ានម៉ា និងឡាវ។

យោងតាមរបាយការណ៍ក្រសួងកសិកម្ម កម្ពុជានាំអង្ករជាង ៦៣ម៉ឺនតោន ទៅកាន់ទីផ្សារអន្តរជាតិក្នុងឆ្នាំ២០១៧កន្លងទៅ ឬកើនឡើង ១៧,៣ភាគរយ បើធៀបនឹងការនាំចេញកាលពីឆ្នាំ២០១៦៕

រក្សាសិទ្វិគ្រប់យ៉ាងដោយ ស៊ីស៊ីអាយអឹម

សូមបញ្ជាក់ថា គ្មានផ្នែកណាមួយនៃអត្ថបទ រូបភាព សំឡេង និងវីដេអូទាំងនេះ អាចត្រូវបានផលិតឡើងវិញក្នុងការបោះពុម្ពផ្សាយ ផ្សព្វផ្សាយ ការសរសេរឡើងវិញ ឬ ការចែកចាយឡើងវិញ ដោយគ្មានការអនុញ្ញាតជាលាយលក្ខណ៍អក្សរឡើយ។
ស៊ីស៊ីអាយអឹម មិនទទួលខុសត្រូវចំពោះការលួចចម្លងនិងចុះផ្សាយបន្តណាមួយ ដែលខុស នាំឲ្យយល់ខុស បន្លំ ក្លែងបន្លំ តាមគ្រប់ទម្រង់និងគ្រប់មធ្យោបាយ។ ជនប្រព្រឹត្តិ និងអ្នកផ្សំគំនិត ត្រូវទទួលខុសត្រូវចំពោះមុខច្បាប់កម្ពុជា និងច្បាប់នានាដែលពាក់ព័ន្ធ។