សិស្សានុសិស្សនិងសមាគមគ្រូបង្រៀនបានស្វាគមន៍លទ្ធផលថ្មីនៃការប្រលងសញ្ញាប័ត្រមធ្យមសិក្សាទុតិយភូមិសម្រាប់ថ្នាក់វិទ្យាសាស្រ្ត ហើយពួកគេសង្ឃឹមថានៅឆ្នាំក្រោយនឹងមិនមានកំហុសបច្ចេកទេសណាមួយកើតឡើងទៀតនោះទេ។
សិស្សពូកែគណិតនៅវិទ្យាល័យសម្តេចឪខេត្តបាត់ដំបង យុវសិស្ស សុខ ចាន់យុត្តិពល ដែលទទួលបាននិទ្ទេសFលើមុខវិជ្ជាគណិតវិទ្យាកាលពីពេលប្រកាសលទ្ធផលលើកទី១ ហើយពេលនេះរូបគេទទួលបាននិទ្ទេសA វិញលើមុខវិជ្ជានេះ បានប្រាប់VODនៅព្រឹកនេះថា ខ្លួនពិតជាអរគុណក្រសួងអប់រំដែលបានធ្វើការពិនិត្យលទ្ធផលឡើងវិញ ហើយសង្ឃឹមថាឆ្នាំក្រោយមិនមានបញ្ហាដូចឆ្នាំនេះទេ។
យុវសិស្សរូបនេះប្រាប់យ៉ាងដូច្នេះថា៖
សិស្សពូកែគណិតនៅវិទ្យាល័យសម្តេចឪខេត្តបាត់ដំបង យុវសិស្ស សុខ ចាន់យុត្តិពល
បេក្ខជនដែលលេចធ្លោក្នុងការតវ៉ានិងទើបទទួលបាននិទ្ទេសAវិញ លើមុខវិជ្ជាគណិតវិទ្យារបស់ខ្លួន យុសិស្ស ឆាយ លីអាន ប្រាប់VODនៅរសៀលនេះថា ខ្លួនអរគុណដល់រដ្ឋមន្ត្រីក្រសួងអប់រំដែលបានជួយនិងសំណូមពរឲ្យមន្ត្រីក្រសួងធ្វើការឲ្យមានភាពម៉ដ្ឋចត់ថែមទៀតនៅឆ្នាំក្រោយ។
យុសិស្ស ឆាយ លីអាន
ទីប្រឹក្សាសមាគមគ្រូបង្រៀនឯករាជ្យ លោក រ៉ុង ឈុន សាទរចំពោះលទ្ធផលនៃការទាមទាររបស់បេក្ខជនប្រឡងនិងចង់ឲ្យមានអ្នកទទួលខុសត្រូវចំពោះបញ្ហាកំហុសបច្ចេកទេសនេះ។
ទីប្រឹក្សាសមាគមគ្រូបង្រៀនឯករាជ្យ លោក រ៉ុង ឈុន
អ្នកនាំពាក្យក្រសួងអប់រំ យុវជន និងកីឡា លោក រស់ សុវាចា បានឆ្លើយតបថា ក្រសួងសុំទោសចំពោះកំហុសអចេតនានេះ និងថានឹងពង្រឹងសមត្ថភាពមន្ត្រីក្រសួងបន្ថែមទៀត។
អ្នកនាំពាក្យក្រសួងអប់រំ យុវជន និងកីឡា លោក រស់ សុវាចា
ក្រោយការប្រកាសលទ្ធផលកាលពីលើកទី១ សិស្សានុសិស្សដែលប្រលងសញ្ញាបត្រមធ្យមសិក្សាទុតិយភូមិជាច្រើនបាននាំគ្នាតវ៉ាលើលទ្ធផលមុខវិជ្ជាគណិតវិទ្យា។ ភ្លាមៗក្រសួងអប់រំ យុវជន និងកីឡា បានបង្កើតគណកម្មការកោសល្យវិច្ច័យធ្វើការដោះស្រាយ និងរកឃើញថាមានកំហុសបច្ចេកទេសកុំព្យូទ័រ ដោយមិនបានបូកស្រង់ពិន្ទុគណិតវិទ្យារបស់បេក្ខជនចំនួន៧៤០បន្ទប់។ ក្រសួងអប់រំ យុវជន និងកីឡាឲ្យដឹងពីលទ្ធផលថ្មីដែរថា សិស្សប្រឡងជាប់កើនដល់ចំនួនជាង៧៦០៣៤នាក់ ដែលស្នើនឹងជាង៦៧ភាគរយនៃចំនួនសិស្សប្រឡងសរុប។ ចំណែកសិស្សដែលទទួលបាននិទ្ទេសA មាន៤០៨នាក់៕