ពលរដ្ឋមានជម្លោះដីធ្លីក្នុងខេត្តព្រះសីហុន អះអាងថា ពួកគេប្រមាណ៤០០នាក់នៅថ្ងៃនេះ បាននាំគ្នាប្រមូលផ្តុំឈរលើកបដាមុខលាលាដំបូងខេត្ត ដើម្បីទាមទារឲ្យតុលាការឲ្យទម្លាក់ចោលការចោទដល់តំណាងពួកគេម្នាក់ និងសមាជិក៣នាក់ទៀតដែលជាប់ឃុំដោយសារជម្លោះដីធ្លី។
ពលរដ្ឋម្នាក់លោក យូ វាសនា នៅឃុំអូរត្រេះ ស្រុកស្ទឹងហា ប្រាប់វីអូឌីថា តំណាងពលរដ្ឋម្នាក់ឈ្មោះ ឡុច ទូច និងសមាជិកសហគមន៍៣នាក់ទៀតត្រូវបានតុលាការខេត្តព្រះសីហនុឃុំខ្លួនបណ្តោះអាសន្នទាំងអយុតិធម៌អស់រយៈពេលជាង៤ខែហើយ។
លោកបន្តថា ដោយមើលឃើញភាពអយុត្តិធម៌បែបនេះ បានធ្វើឲ្យអ្នកភូមិនាំគ្នាទៅតវ៉ាមុនតុលាការខេត្ត ដើម្បីសុំដោះលែងតំណាងពួកគេមានសេរីភាពវិញ។
ពលរដ្ឋម្នាក់លោក យូ វាសនា នៅឃុំអូរត្រេះ ស្រុកស្ទឹងហា
តាមរយៈវីដេអូឡាយលើបណ្តាញសង្គមអំពីការតវ៉ានោះ ពលរដ្ឋម្នាក់គឺ អ្នកស្រី អេង វណ្ណ បានស្នើទៅតុលាការឲ្យធ្វើការដោយឯករាជ្យឈរលើគោលការណ៍ច្បាប់ និងត្រូវដោះលែងអ្នកជាប់ឃុំដោយសារដីធ្លីនោះមានសេរីភាពវិញ។
ពលរដ្ឋម្នាក់គឺ អ្នកស្រី អេង វណ្ណ
ប្រធានលេខាធិការដ្ឋានរដ្ឋបាល នៃសាលាដំបូងខេត្តព្រះសីហនុ លោក យឹម ប៉ុណ្ណារ៉េត មានប្រសាសន៍ថា ករណីពលរដ្ឋតវ៉ាទាមទារដោះលែងតំណាងពួកគេនោះ លោកគ្មានតួនាទីអ្វីសម្រេចនោះទេ គឺស្ថិតនៅលើចៅក្រមជាអ្នកសម្រេច។ ប៉ុន្តែលោកថា ការដែលក្រុមពលរដ្ឋមកតវ៉ាបែបនេះវាគ្មានប្រយោជន៍អ្វីសម្រាប់អ្នកជាប់ឃុំនោះទេ ដោយថា ការធ្វើនេះ គឺខុសនីតិវិធីច្បាប់។
ប្រធានលេខាធិការដ្ឋានរដ្ឋបាល នៃសាលាដំបូងខេត្តព្រះសីហនុ លោក យឹម ប៉ុណ្ណារ៉េត
កាលពីខែកក្តដាក្រុមអ្នកភូមិបានខកចិត្តចំពោះសាលាឧទ្ធរណ៍ម្តងរួចមកហើយ បន្ទាប់តុលាការមួយនេះ ប្រកាសសាលដីកាលើសុំណុំរឿងសុំនៅក្រៅឃុំរបស់តំណាងពលរដ្ឋខេត្តព្រះសីហនុ៤នាក់ ដោយសម្រេចបន្តឃុំខ្លួនតំណាងពលរដ្ឋទាំងនោះទៀតក្រោមហេតុផលថា ពួកគាត់គ្មានទីលំនៅច្បាស់លាស់ និងថា សាលាដំបូងខេត្តព្រះសីហនុមិនទាន់បិទការស៊ើបសួរនៅឡើយ។
មេធាវីការពារក្តីឲ្យតំណាងពលរដ្ឋទាំង៤នាក់នោះលោក កែ ប៊ុនធឿន ធ្លាប់មានប្រសាសន៍ថា បើតាមការស្រាវជ្រាវ និង ភស្ភតាងដែលផ្អែកតាមនីតិវិធីច្បាប់ គឺកូនក្តីរបស់លោកមិនត្រូវឃុំឃាំងនោះទេ។ មេធាវីរូបនេះបន្តថា ក្នុងសំណុំរឿងជម្លោះដីធ្លីនោះ គឺស្ថិតក្នុងតំបន់គម្របព្រៃឈើដែលតាមផ្លូវច្បាប់មិនអាចភាគីណាមានសិទ្ធិធ្វើប័ណ្ណកម្មសិទ្ធបានឡើយ ប៉ុន្តែសម្រាប់ភាគីដើមបណ្តឹងបែរជាមានប័ណ្ណកម្មសិទ្ធដែលត្រូវមានទោស បើផ្អែកលើមាត្រា២៥៩ នៃច្បាប់ភូមិបាល។
ប្រធានផ្នែកគ្រប់គ្រងផ្នែកអង្កេតនៅអង្គការលីកាដូ លោក អំ សំអាត មានប្រសាន៍ថា អ្នកដែលជាប់ពន្ធនាគារដោយសារជម្លោះដីធ្លីទាំងនោះគួរតែទទួលបានការលើកលែងទោស ដោយថា កន្លងមកលោកនាយករដ្ឋមន្រ្តីធ្លាប់មានប្រសាសន៍ថា មិនឲ្យពលរដ្ឋណាម្នាក់ជាប់ពន្ធនាគារដោយសារជម្លោះដីធ្លីនោះទេ។
តំណាងពលរដ្ឋ៤នាក់មានអ្នកស្រី ឡុច ទូច លោក ម៉ែន ខេន លោក ញាញ់ ជាតិ និងលោក កៅ ហេង នៅឃុំអូរត្រេះ ស្រុកស្ទឹងហាវ ត្រូវបានសាលាដំបូងខេត្តព្រះសីហនុសម្រេចឃុំខ្លួនកាលពីថ្ងៃទី៦ខែឧសភា បន្ទាប់ពីមានជម្លោះជាមួយឧកញ៉ាម្នាក់ ឈ្មោះ តាន់ តាត់ ដែលមានប័ណ្ណកម្មសិទ្ធិដីធ្លីជាន់លើតំបន់គម្របការពារព្រៃឈើក្នុងខេត្តព្រះសីហនុ៕