ស្វែង សុជាតា ប្រឹងហាត់ក្បាច់គុនល្បុក្កតោ

ក្នុងពិធីក្រុងពាលីរបស់ផលិតកម្ម LD កាលពីថ្ងៃទី១៣ កញ្ញា មុននេះ អ្នកនាង ស្វែង សុជាតា បានអះអាងថា អ្នកនាងរាល់ថ្ងៃ ប្រឹងចំណាយពេលទៅហ្វឹកហាត់ក្បាច់គុនល្បុក្កតោខ្លាំងណាស់ បើទោះជាអ្នកនាងមានវ័យកាន់ជ្រេ និងមិនដែលមានផលិតករណាម្នាក់ តម្រូវអោយអ្នកនាងសម្ដែងជាតួវាយតប់។

អ្នកនាងបង្ហើបថា ហេតុផលដែលនាំអោយអ្នកនាងប្រឹងហាត់រហូតភ្លេចបាយភ្លេចទឹក គឺដើម្បីកុំអោយខ្មាសតារាបរទេសប៉ុណ្ណោះ។

អ្នកនាង ស្វែង សុជាតា និយាយថា ការពិតវ័យរបស់អ្នកនាង មិនមានផលិតករណាម្នាក់អោយសម្ដែងជាតួវាយតប់ ឬលោតហក់នោះទេ ប៉ុន្តែបើទោះជាយ៉ាងនេះក្ដី ក៏អ្នកនាងត្រូវតែចេះអោយបានគ្រប់ទម្រង់ ជាពិសេសគឺក្បាច់គុនខ្មែរ ដោយមិនអាចចេះតែយំ សោក និងសម្ដែងទឹកមុខតែមួយមុខឡើយ។

អ្នកនាងថា តារាបរទេសភាគច្រើន គឺគេចេះទាំងកាន់កាំភ្លេង បាញ់កាំភ្លើង និងក្បាច់គុនបានស្ទាត់ជំនាញខ្លាំងណាស់ ទើបអ្នកនាងគិតថា មិនហួសពេលទេ ដែលអ្នកនាងត្រូវហាត់អោយស្ទាត់នូវក្បាច់គុនល្បុក្កតោ ដែលហោចណាស់ ក៏មិនខុសពីការហាត់ប្រាណ។

អ្នកនាងបញ្ជាក់ថា ហេតុផលដែលអ្នកនាងសម្រេចចិត្តហ្វឹកហាត់ល្បុក្កតោ គឺការពារខ្លាចក្រែងផលិតករបរទេសចុះមកផលិតរឿងនៅក្នុងប្រទេសកម្ពុជាដូចគ្នានឹងតារាហូលីវូដ អេជេលីណាជូលី ហើយត្រូវការតារាខ្មែរដែលអាចសម្ដែងបានទាំងទឹកមុខ កាចឆ្នាស់ និងចេះក្បាច់គុន គឺអ្នកនាងនឹងមានឱកាស។

ជាមួយនឹងការបង្ហើបថា ប្រឹងហាត់ល្បុក្កតោ ដើម្បីត្រៀមទទួលផលិតករបរទេសដើម្បីថតរឿង អ្នកនាង ស្វែង សុជាតាក៏បានបង្ហើបថា ដើម្បីទុកការពារខ្លួននៅពេលមានការបំពានណាមួយ ជាពិសេសពាក់ព័ន្ធនឹងអំពើហិង្សាដែលធ្លាប់បង្កឡើងដោយស្វាមីក្មេង ដែលអ្នកនាងធ្លាប់បានប្រកាសនោះដែរ។

អ្នកនាងពោលនៅចំពោះស្វាមីដែលបានជូនមកក្រុងពាលីរឿងថា៖

មកទល់ពេលនេះ អ្នកនាងថារវាងខ្លួន និងស្វាមី មិនដែលមានរឿងឈ្លោះប្រកែកដូចមុនទៀតទេ ខណៈដែលស្ថានភាពជម្លោះ និងហិង្សា គឺលែងមានទាំងស្រុងតែម្ដង ក្រោយពេលសម្រេចចិត្តត្រូវរ៉ូវគ្នាលើកចុងក្រោយ និងក្រោយពេលអ្នកនាងហាត់ចេះល្បុក្កតោច្រើនស្នៀត៕