សំរាម ឬកាកសំណល់ថង់ប្លាស្ទិក គឺជាបញ្ហាមួយដែលពិបាកដោះស្រាយ និងបង្កផលប៉ះពាល់ដល់បរិស្ថាន សុខុមាលភាពប្រជាពលរដ្ឋ អនាម័យ សោភណ្ឌភាពទីក្រុង និងមុខមាត់របស់ប្រទេសកម្ពុជា។
សំរាមរាប់ម៉ឺនតោន ដែលភាគច្រើនជាកាកសំណល់ថង់ប្លាស្ទិក បានបន្សល់ទុកពាសវាលពាសកាលនៅក្នុងទីក្រុង និងតាមបណ្ដាខេត្ត ដូចជានៅផ្សារលក់ដូរ ទីសាធារណៈ កន្លែងកម្សាន្ដ សាលារៀន និងបន្ទាប់ពីពលរដ្ឋប្រារព្ធពិធីបុណ្យប្រពៃណីជាតិធំៗ។
បញ្ហាសំរាម និងការប្រើប្រាស់ថង់ប្លាស្ទិក បានជំរុញឲ្យយុវជនមួយក្រុមនៅរាជធានីភ្នំពេញ ចាប់ផ្ដើមធ្វើយុទ្ធនាការមួយតាមបណ្ដាញសង្គម ដែលមានឈ្មោះថា «យុទ្ធនាការ ហ្វ អរ» ដើម្បីបង្កើនការយល់ដឹងក្នុងស្រទាប់យុវជន និងរួមចំណែកកាត់បន្ថយការប្រើប្រាស់ថង់ប្លាស្ទិកក្នុងប្រទេសកម្ពុជា។
ជានិស្សិតឆ្នាំទី៣ សិក្សានៅសកលវិទ្យាល័យភូមិន្ទភ្នំពេញ កញ្ញា ហ៊ីង ផាន់ណា បានឲ្យដឹងថា កញ្ញាបានសម្រេចចិត្តចូលរួមក្នុងយុទ្ធនាការនេះ ដើម្បីបំផុសឲ្យយុវជនដទៃទៀត មើលឃើញពីផលប៉ះពាល់ដែលកើតចេញពីការប្រើប្រាស់ថង់ប្លាស្ទិក ទៅលើបរិស្ថាន សុខភាព និងវិស័យទេសចរណ៍របស់កម្ពុជា។
កញ្ញាសង្កេតឃើញថា ពលរដ្ឋមួយចំនួនមិនទាន់យល់ដឹងពីរបៀបបែងចែកសំរាមទៅតាមប្រភេទ កាត់បន្ថយការប្រើប្រាស់ថង់ប្លាស្ទិក និងផលប៉ះពាល់របស់វានោះទេ។
កញ្ញា ហ៊ីង ផាន់ណា ជានិស្សិតឆ្នាំទី៣ សិក្សានៅសកលវិទ្យាល័យភូមិន្ទភ្នំពេញ
និស្សិតម្នាក់ទៀតរៀននៅវិទ្យាស្ថានជាតិសង្គមកិច្ច កញ្ញា ហ៊ុំ ស្រីល័ក្ខ យល់ថា បញ្ហាសំរាម ឬកាកសំណល់ថង់ប្លាស្ទិក មានការកើនឡើងខ្លាំងនៅក្នុងទីក្រុងភ្នំពេញ និងបានបង្កជាផលប៉ះពាល់ដល់បរិស្ថាន សោភ័ណ្ឌភាពទីក្រុង និងសុខភាពរបស់អ្នកប្រើប្រាស់។
ស្រីល័ក្ខនិយាយថា ខ្លួនកញ្ញាផ្ទាល់បានព្យាយាមកាត់បន្ថយប្រើប្រាស់ថង់ប្លាស្ទិក និងបានពន្យល់ដល់សមាជិកគ្រួសារ មិត្តភក្ដិ និងអ្នកជិតខាងអំពីបញ្ហានេះ ប៉ុន្ដែ ពលរដ្ឋមួយចំនួនហាក់មិនចាប់អារម្មណ៍នោះទេ។
កញ្ញា ហ៊ីង ផាន់ណា ជានិស្សិតឆ្នាំទី៣ សិក្សានៅសកលវិទ្យាល័យភូមិន្ទភ្នំពេញ
និស្សិតម្នាក់ទៀតរៀននៅសកលវិទ្យាល័យភូមិន្ទនីតិសាស្ដ្រ និងវិទ្យាសាស្ដ្រសេដ្ឋកិច្ច លោក និត កុសល អះអាងថា លោកបានចូលរួមក្នុងយុទ្ធនាការតាមប្រព័ន្ធអនឡាញនេះ ៣ឆ្នាំមកហើយ។ លោកថា យុវជនមួយចំនួនដែលបានចូលរួមយុទ្ធនាការនេះបានប្ដេជ្ញាចិត្ដថា ពួកគេនឹងកាត់បន្ថយការប្រើប្រាស់ថង់ប្លាស្ទិកក្នុងករណីមិនចាំបាច់ និងនៅក្នុងសកម្មភាពប្រចាំថ្ងៃរបស់ពួកគេ។
យុវជនរូបនេះយល់ថា ដើម្បីកាត់បន្ថយបញ្ហាថង់ប្លាស្ទិក គឺត្រូវមានការចូលរួមពីភាគីពាក់ព័ន្ធ ការអនុវត្តច្បាប់ឲ្យមានប្រសិទ្ធិភាព និងលើកទឹកចិត្ដដល់ប្រជាពលរដ្ឋ ដែលយកចិត្តទុកដាក់លើបញ្ហានេះ។
និស្សិតម្នាក់ទៀតរៀននៅសកលវិទ្យាល័យភូមិន្ទនីតិសាស្ដ្រ និងវិទ្យាសាស្ដ្រសេដ្ឋកិច្ច លោក និត កុសល
មន្ដ្រីគម្រោងចលនាយុវជនសម្រាប់និរន្ដភាពបរិស្ថានរបស់អង្គការកម្មវិធីអភិវឌ្ឍធនធានយុវជន លោក សុខ ចាន់វីរៈ លើកឡើងថា យុទ្ធនាការកាត់បន្ថយការប្រើប្រាស់ថង់ប្លាស្ទិក ឬយុទ្ធនាការ «ហ្វ អរ» បានចាប់ផ្ដើមរយៈពេល ៤ឆ្នាំមកហើយ ក្រោមការផ្ដួចផ្ដើម និងរៀបចំដោយអង្គការកម្មវិធីអភិវឌ្ឍន៍ធនធានយុវជន (YRDP)។
លោកថា យុទ្ធនាការនៅឆ្នាំនេះ មានរយៈពេល ១៤ថ្ងៃ ចាប់ផ្ដើមពីថ្ងៃទី៩ ដល់ថ្ងៃទី២៣កញ្ញា។ យុទ្ធនាការនេះ មានគោលដៅលើកកម្ពស់ការយល់ដឹងពីបញ្ហាបរិស្ថាន និងបញ្ហាប្លាស្ទិក និងជំរុញឲ្យយុវជនចូលរួមផ្សព្វផ្សាយ និងចែករំលែកការយល់ឃើញរបស់ពួកគេអំពីបញ្ហាបរិស្ថានក្នុងប្រទេសកម្ពុជា។
លោក សុខ ចាន់វីរៈ មន្ដ្រីគម្រោងចលនាយុវជនសម្រាប់និរន្ដភាពបរិស្ថានរបស់អង្គការកម្មវិធីអភិវឌ្ឍធនធានយុវជន
លោកបន្ដថា កាកសំណល់ថង់ប្លាស្ទិក ជាប្រភេទសំរាមមួយ ដែលមិនងាយរលាយចេញពីផែនដីនោះទេ ហើយត្រូវការពេលរាប់រយឆ្នាំ ដើម្បីឲ្យកាកសំណល់ប្រភេទនេះ រលាយបាត់។ កាកសំណល់ប្រភេទនេះ ក៏បង្កផលប៉ះពាល់ធ្ងន់ធ្ងរដល់សុខភាពអ្នកប្រើប្រាស់ បញ្ហាខ្យល់ដង្ហើម និងបរិស្ថានទាំងមូល។
លោកជឿថា ការអប់រំ និងផ្សព្វផ្សាយសាធារណៈជនឲ្យយល់ដឹងពីបញ្ហានេះ គឺជាវិធានការចាំបាច់មួយ។ ប៉ុន្ដែ លោកយល់ថា រដ្ឋាភិបាលគួរបង្កើតឲ្យមានរោងចក្រកែច្នៃសំរាមឡើងវិញ ព្រោះថា វាអាចកាត់បន្ថយសំរាមនៅក្នុងប្រទេសកម្ពុជា មួយកម្រិតធំ។
លោក សុខ ចាន់វីរៈ មន្ដ្រីគម្រោងចលនាយុវជនសម្រាប់និរន្ដភាពបរិស្ថានរបស់អង្គការកម្មវិធីអភិវឌ្ឍធនធានយុវជន
ប្រធានមជ្ឈមណ្ឌលវប្បធម៌អនុវត្តន៍ និងសីលធម៌កម្ពុជា លោក ប៉ា ចន្ទរឿន មានប្រសាសន៍ថា យុវជនដែលរៀននៅថ្នាក់ឧត្តមសិក្សា មានការយល់ដឹងពីបញ្ហាសំរាម និងថង់ប្លាស្ទិក ខ្ពស់ជាងយុវជននៅថ្នាក់វិទ្យាល័យ ឬក្រោមនេះ។
លោកថា មូលហេតុចម្បងនៃបញ្ហានេះ គឺដោយសារកម្រិតយល់ដឹងរបស់ពលរដ្ឋ ទម្លាប់នៃការចោលសំរាមពាសវាលពាសកាល ចន្លោះប្រហោងក្នុងប្រព័ន្ធអប់រំ និងចំណាត់ការម៉ឺងម៉ាត់របស់រដ្ឋាភិបាល។
ប្រធានមជ្ឈមណ្ឌលវប្បធម៌អនុវត្តន៍ និងសីលធម៌កម្ពុជា លោក ប៉ា ចន្ទរឿន
កាលពីខែតុលា ឆ្នាំ២០១៧ រដ្ឋាភិបាលកម្ពុជាបានចេញអនុក្រឹត្យមួយស្តីពីការគ្រប់គ្រងថង់ប្លាស្ទិក ក្នុងគោលបំណងបង្កើនប្រសិទ្ធភាពកាត់បន្ថយការនាំចូល ការផលិត ចែកចាយ និងប្រើប្រាស់ថង់ប្លាស្ទិក ដើម្បីធានានូវកិច្ចគាំពារសុខភាពសាធារណៈ បរិស្ថាន និងសោភណ័ភាពទីក្រុង។
រដ្ឋាភិបាលថា បច្ចុប្បន្ន កាកសំណល់ប្លាស្ទិកកំពុងបង្កហានិភ័យដល់ប្រព័ន្ធអេកូឡូស៊ី និងការអភិវឌ្ឍមនុស្សនៅទូទាំងពិភពលោក ដោយថា កាកសំណល់ប្រភេទនេះ ត្រូវប្រើពេលវេលាយូរ ទើបរលួយអស់ពីផែនដី ពោលគឺចាប់ពី ៥០០ទៅ១ ០០០ឆ្នាំឯណោះ។
ប្រធាននាយកដ្ឋានគ្រប់គ្រងសំណល់រឹង នៃក្រសួងបរិស្ថាន លោក ឌី គីដែន មានប្រសាសន៍ថា រដ្ឋាភិបាលបានដាក់ចេញនូវវិធានការមួយចំនួន ដើម្បីកាត់បន្ថយបញ្ហាថង់ប្លាស្ទិកនេះ ដូចជា រឹតបន្ដឹងការនាំចូលប្រភេទថង់ប្លាស្ទិក លើកទឹកចិត្តដល់ការផលិត និងចែកចាយថង់ប្លាស្ទិកដែលគិតពីបរិស្ថាន និងយន្ដការកាត់បន្ថយការប្រើប្រាស់ថង់ប្លាស្ទិក ដែលមិនចាំបាច់។
ប្រធាននាយកដ្ឋានគ្រប់គ្រងសំណល់រឹង នៃក្រសួងបរិស្ថាន លោក ឌី គីដែន
ការសិក្សារបស់អង្គការមូលនិធិអក្ខរា (ACRA Foundation) កាលពីឆ្នាំ២០១៦ ឲ្យដឹងថា រដ្ឋាភិបាលកម្ពុជាបានខាតបង់ថវិកាអស់រាប់លានដុល្លារអាមេរិក ពីកាកសំណល់ប្លាស្ទិក។ មិនតែប៉ុណ្ណោះ កម្ពុជាត្រូវចំណាយថវិកាជាង ៥ម៉ឺនដុល្លារក្នុងមួយឆ្នាំ ទៅលើការសម្អាតថង់ប្លាស្ទិកនៅក្នុងខេត្តក្រុងធំៗចំនួន៣ ដូចជា នៅខេត្តព្រះសីហនុ ខេត្តសៀមរាប និងនៅរាជធានីភ្នំពេញ៕
