កម្មករម្នាក់បានស្លាប់ និង ៤នាក់ទៀត រងរបួស បន្ទាប់ពីអគារភោជនីយដ្ឋានចំណាស់មួយស្ថិតនៅតំបន់ផាប់ស្ទ្រីត ខេត្តសៀមរាប បានបាក់រលំដួលកាលពីយប់មិញនេះ។ នេះបើតាមការចុះផ្សាយរបស់នគរបាលជាតិ។
សារព័ត៌មាននគរបាលជាតិ បានចុះផ្សាយថា អគារភោជនីយដ្ឋាន «ស៊ុបនាគ» ស្ថិតនៅខាងមុខពេទ្យបង្អែកខេត្តសៀមរាប ខាងត្បូងសង្កាត់ទេសចរណ៍ផាប់ស្ទ្រីត ដែលស្ថិតនៅក្រោមការជួសជុលឡើងវិញនោះ បានបាក់រលំនៅម៉ោងប្រមាណ ១រំលងអាធ្រាត្រយប់ថ្ងៃសៅរ៍។
បើតាមសារព័ត៌មាននគរបាលជាតិ កម្មករម្នាក់ បានស្លាប់ ហើយកម្មករ ៤នាក់ទៀត ត្រូវបានបញ្ជូនទៅសង្គ្រោះនៅឯមន្ទីរពេទ្យ បន្ទាប់ពីអគារនោះបានបាក់សង្កត់លើពួកគេ។
ទោះជាយ៉ាងណា មូលហេតុនៃការបាក់រំលំអគារនេះ មិនត្រូវបានគេដឹងនៅឡើយទេរហូតមកដល់ព្រឹកថ្ងៃនេះ៕
