រដ្ឋសភាគ្រោងបើកកិច្ចប្រជុំដំបូងរបស់ខ្លួននៅថ្ងៃពុធខាងមុខនេះ ដើម្បីសម្រេចលើសុពលភាពនៃក្រុមតំណាងរាស្ត្រ ៣៨រូប ដែលត្រូវបានផ្លាស់ប្ដូរ។ នេះបើតាមគេហទំព័ររដ្ឋសភានៅថ្ងៃនេះ។
គេហទំព័ររដ្ឋសភា បានឲ្យដឹងថា គណៈកម្មាធិការអចិន្ត្រៃយ៍រដ្ឋសភា បានជួបប្រជុំនៅព្រឹកថ្ងៃនេះ ដោយបានសម្រេចលើរបៀបវារៈនៃកិច្ចប្រជុំរដ្ឋសភាលើកទី១ នីតិកាលទី៦នេះ។
បើតាមគេហទំព័រដដែលនេះ របៀបវារៈដែលនឹងត្រូវយកទៅជជែក និងសម្រេចនៅក្នុងកិច្ចប្រជុំរដ្ឋសភាលើកដំបូងនៅថ្ងៃទី១៩ ខែកញ្ញានោះ គឺការសម្រេចទៅលើសុពលភាពរបស់តំណាងរាស្ត្រ ៣៨រូប ដែលត្រូវបានស្នើដាក់ជំនួសតំណាងរាស្ត្រ ដែលបានលាលែងទៅកាន់តំណែងនៅក្នុងជួររដ្ឋាភិបាល។
មេដឹកនាំគណបក្សប្រជាជនកម្ពុជា លោកនាយករដ្ឋមន្ត្រី ហ៊ុន សែន បានស្នើទៅគណៈកម្មាធិការជាតិរៀបចំការបោះឆ្នោតកាលពីថ្ងៃទី១០ ខែកញ្ញា ឲ្យទទួលស្គាល់បេក្ខជនជាប់ឆ្នោតជាតំណាងរាស្ត្រថ្មី ៣៨រូប ដែលនឹងត្រូវចូលកាន់តំណែងតំណាងរាស្ត្រ ដែលបានលាលែងទៅកាន់តំណែងក្នុងជួររដ្ឋាភិបាល៕